Jean 16 - Testament ke Siki 1960 (Kabba Laka)

¹ Ma mpa tar nèn maresè, ta karesè osoidjé ang.

² Dèdè da kilasè daka giri kei Allah té. Tokoro, ndò ao dé, tokou doou tòlsè a ndjè a pa mèa té, pana, nè nda koula nare Allah.

³ Dèdè da da nèn mbata dèdè ngeré Bòi Allah leo ang, ke dèdè ngerem ang.

⁴ A ma mpa tar nèn maresè mbä, mbata tokou ndò lodè dé, sésè asidjé kounda mèsè do tar té ke ma mpa maresè leo. Ma mpa tar nèn maresè tokou dongor ang, mbata ma méh kesè.

⁵ Loshénè ma mao rò nè té ke noulam, doou kada horosè té a doudjoum ang, i ao ke da wa?

⁶ A ongou dousou mèsè, mbata tar nèn ke ma mpa maresè.

⁷ Ma mpa tar ke tokoro maresè, to madji mbata losè ta kare ma mao, mbata tokou ma mao ang, Ndjè moso tar a dé ròsè té ang. Tokou ma mao, ma ma koulè karesè.

⁸ Tokou nè ntéh, nè na ndange dooudjé ke nange nèn, mbata tar madjang, ke tar gaté gaté, ke tar saria.

⁹ Nè na ndange mbata tar madjang, mbata dèdè do mèdè té sem ang.

¹⁰ Nè na ndange mbata tar gaté gaté, mbata ma mao rò Bòi Allah té, ke sésè a komdjé ang nga.

¹¹ Nè na ndange mbata tar saria, mbata ngange saria lo mbai ke nange nèn mbä.

¹² Ma méh ke tar baya ta pa karesè, a sésè a kasidjé ta ko ke loshénè nèn ang.

¹³ Tokou nè ntéh, Ndil tar ke tokoro, nè na tòdjousè deo tar ke tokoro toï, mbata nè na pa tar ke mèa té ndja ang. Né ke nè no, nè na pa tar nèn, ke nè na tòdjousè né toï ke ata dé.

¹⁴ Nè na kòsou gadjim, mbata nè na taa né lom, ke nè na pa tar nèn karesè.

¹⁵ Né toï ke to nga Bòi Allah to ngäm. Mbata yèn ma mpa leo, nè na taa né lom ke nè na pa tar nèn karesè.

¹⁶ Nai ngadji, sésè a komdjé ang nga, a gè té ngadji, sésè a komdjé.

¹⁷ Tokou ban mare ndjè kao gè tédjé pa horodè té. Tar ke nè mpa kedjè to di wa, Nai ngadji, sésè a komdjé ang, a gè té ngadji sésè a komdjé, a tar nèn mbata ma mao ke rò Bòi Allah té?

¹⁸ Tokou ban dèdè mpana, Tar ke nè mpa to di wa, Nai ngadji? Djèdjè ngeré tar ke nè mpa nèn ang.

¹⁹ Jésus geré dèdè ndiki ta doudjè, bana nè mpa naredè, Sésè ao doudjidjé gel tar nèn horosè té, mbata ma mpana, nai ngadji, sésè a komdjé ang, a gè té ngadji sésè a komdjé wa?

²⁰ Tokoro, tokoro, ma mpa maresè, sésè a nòidjé ke sésè a nòidjé ke ongou ke tarr, a dooudjé ke nange nèn a koukou. Ongou a dasè, a ongou losè nèn a tél rònèl.

²¹ Tokou mare lo ndoo ke too dènè, ongou dè mbata ndò la dé mbä, goukoudang ngon téh ke daka mbä, nè nounda mèa do ongou té nèn ang nga, mbata nè noudjou doou ke nange mbä, a rè nèlè.

²² Tokou ban ongou dasè loshénè nèn, a ma ma tél dé kosè, ke koukou a dé mèsè té, ke doou kada òrou koukou losè ang.

²³ Ke ndè té nou, sésè a doudjoumdjé mare né kada ang. Tokoro, tokoro, ma mpa maresè, tokou sésè a doudjidjé Bòi Allah mare né, nè na karesè ke rim.

²⁴ Dongor loshénè sésè edoudjidjé né kada ke rim ang. Edoudjidjé, ke sésè a kingaidjé, baa ta kare koukou losè a kase toï madji.

²⁵ Ma mpa tar nèn maresè ke tar gousou. Ndò ao dé, ma ma pa tar karesè ke tar gousou ang nga, a ma ma tòdjousè né lo Bòi Allah tesèrè.

²⁶ Ndò té ke nou sésè a doudjidjé ke rim, a ma mpa maresè ang, ma ma doudjou Bòi Allah mbata losè,

²⁷ Mbata Bòi Allah ndja ndikisè, mbata sésè ndikimdjé, ke sésè woidjé mèsè té ma mï rò Bòi Allah té mbä.

²⁸ Ma mï rò Bòi Allah té, mam ndé nange nèn mbä. Loshènè ma mïya nange nèn, a mao ke rò Bòi Allah té.

²⁹ Ndjè kao gè tédjé pana, Wo, loshénè i pa tar tesèrè, i pa ke gousou ang.

³⁰ Loshénè djèdjè ngeré i geré né toï, i ase ta kare doou kada doudji ang. Mbata tar nèn djèdjè djo mèdjè té ke i ï rò Allah té.

³¹ Jésus tél pa aredè, Sésè woidjé mèsè té loshénè wa?

³² Woidjé, ndò ao dé, tokoro dé mbä, ke da kaisè doou kada kada ke loou la ndja, sésè a kïyamdjé ke kadam, a ma méh ke kadam ang, mbata Bòi Allah éh sem.

³³ Ma mpa tar nèn maresè, baa sésè asidjé kinga mè woul mem té. Sésè éhdjé ke né ongou ke nange nèn, a isidjé dèkèkè, mam ndai nange nèn ke singa mbä.