Jean 11 - Testament ke Siki 1960 (Kabba Laka)

¹ Doou kada ke rè tooè, ria na Lazare, to doou ke Béthanie té, béh lo Marie dè ke Marthe ngokönanè.

² Yèn to Marie ke ongou yambo do Mbaibé Seigneur té, ke mbòrou gòlè ke bi dè, ke könanè ke to dingao Lazare rè tooè.

³ Tokou ban könanèdjé ke dènè dèdè djo doula rè té, dèdè mpana, Mbaibé Seigneur, wo, nè ke i ndikè nya, rè tooè.

⁴ Tokou Jésus wo tar nèn, nè mpana, Rò too nèn to kä kwoei ang, yèn to ta kòsou gadji Allah, mbata Ngon lo Allah ase ta kinga piti deoè té.

⁵ A Jésus ndiki Marthe, ke ngoköè ke dènè, ke Lazare tò.

⁶ Tokou ban, tokou nè no rò Lazare tooè, nè nisi ndò djo béh té ke néh kendé.

⁷ Gè té nè mpa nare ndjè kao gè tédjé, Aredjè ntél ke Judée té.

⁸ Ndjè kao gè tédjé pa arè, pana, Ndjè tòdjou tar, loshénè ba Juifdjé ao sange deo ta tilai ke err, i ata tél ke nou bai wa?

⁹ Jésus tél pana, Kade dökou gérè djo to ndò kada ang wa? Tokou doou ndja kade, a touka gòlè ang, mbata nè no lokarè ke nange nèn.

¹⁰ Tokou doou ndja tilti, a touka gòlè, mbata lokarè to mèa té ang.

¹¹ Gè té ke nè mpa tar nèn mbä, nè mpa naredè, Namdjè Lazare tibi, a mao ta ndolè.

¹² Tokou ban ndjè kao gè tédjé pa arè, Mbaibé Seigneur, tokou nè ntibi, rò too la a goto.

¹³ Jésus pa tar kwoei la, a mè ndjè kao gè tédjé pana mpa tar ta kwaa rò ke bi.

¹⁴ Tokou ban Jésus pa aredè tesèrè, Lazare woei mbä.

¹⁵ A mbata losè, ròm nèlem nya mbata méh nou dongor ang, baa ta kare woidjé mèsè té, aredjè djao rè té.

¹⁶ Tokou ban Thomas, nè ke mmarè na Ndounga, pa ke mare ndjè kao gè tédjé, Aredjè djao tò, baa ta kare djèdjè djase kwoei sa.

¹⁷ Tokou ban, tokou Jésus téh mbä, nè no ke Lazare to bwa yo té ndò sò loshénè.

¹⁸ Béthanie to ngosiba ke Jérusalem, ase kourou deo mouta.

¹⁹ Juifdjé tokou baya dé rò Marthe té dè ke Marie ta ndedjidè mbata kare mèdè dé madji mbä tar lo kònandè.

²⁰ Tokou ban, tokou Marthe wo Jésus ao dé, nao ta kingè ke deo, Marie nai isi kei.

²¹ Tokou ban Marthe pa are Jésus, Mbaibé Seigneur, tokou i éh nèn dongor, könanem woei ang.

²² Loshénè nèn nga mam ngeré, né ke i a doudjou Allah, Allah a kari.

²³ Jésus pa arè, pana, Könani a kï bai.

²⁴ Marthe pa are, pana, Mam ngeré nè na kï ndò té ke goukou, ndò kï té lo ndjè yodjé.

²⁵ Jésus pa arè, pana, Mam nto singa kï lo ndjè yodjé, ke mam nto tebe, doou ke wo mèa té sem, lé a woei, ka a kisi ke tébe.

²⁶ Doou ke nai ke tébe, ke wo mèa té sem, a ndjè a kwoei ndò kada ang. I wo tar nèn wa?

²⁷ Marthe pa arè, pana, Tokoro, Mbaibé Seigneur, ma mo mem té sei, i to Christ, Ngon lo Allah, nè ke nase ta dé nange nèn.

²⁸ Tokou nè mpa ban mbä, nè nao mmar ngoköè Marie, mpa narè yòrong, mpana, Ndjè tòdjou tar téh mbä, nao mmari.

²⁹ Tokou Marie wo tar nèn, nè nï ke tòkè, nao rò Jésus té.

³⁰ Jésus nai téh mè béh té ang bai, nè nai loou té ke Marthe ingè kendé.

³¹ Tokou ban Juifdjé ke éh ke Marie mè kei té, ao ndedjè, tokou dèdè do Marie ï ke tòkè ntéh daka, dèdè dao gè té, mbata dèdè dedji mèdè té, nè nao ke ta bwa yo té ta no ke nou.

³² Tokou ban, tokou Marie téh loou té ke Jésus éh kendé, nè noè, nè noso nange ko gòlè té, nè mpa narè, Mbaibé Seigneur, tokou i éh nèn dongor, könanem woei ang.

³³ Tokou ban, tokou Jésus woè nè nao no, ke Juifdjé ke dé sa ao no to, nè nila mèa ke ndilè, ongou öè nya.

³⁴ Nè mpana, Ilèdjé da wa? Dèdè mpa darè, Mbaibé Seigneur, edé wo.

³⁵ Jésus no do moundou ba.

³⁶ Tokou ban Juifdjé pana, Woidjé nè ndikè to di wa?

³⁷ A maredjé pa horodè té, Doou ke teï kem ndjè kem to, nè nase ta da dongor a doou nèn a kase ta kwoei ang tò wa?

³⁸ Tokou ban Jésus ila mèa ke ndilè bai, ao kare dòbarè té ke to boudja ke doutou tè ke err.

³⁹ Jésus pana, Òridjé err. Marthe, könan doou ke woei, pa arè, Mbaibé Seigneur, loshénè yo nèn ndoum, mbata nè noei ndò sò mbä.

⁴⁰ Jésus pa arè, pana, Ma mpa mari dongor ang, tokou i wo mei té, i a ko ndokoo lo Allah wa?

⁴¹ Tokou ban dòrou err. Jésus oula kèmè ke tarr, nè mpa, Bòi, mam ndai woio mbata i wo tar lom mbä.

⁴² Mam ngeré i wo tar lom ke ndò toï, a ma mpa ban mbata dooudjé toï ke goukoum, ase karedè do mèdè té ke i oulam mbä.

⁴³ Gè té ke nè mpa ban mbä, nè mpa ke tarr, Lazare, etéh ke daka.

⁴⁴ Nè ke noei leo, nè ntéh daka, ke koubou yo ke nto né dja ke gòlè toï, ke koubou ke nto né kèmè. Jésus pa aredè, Etoutèdjé, ïyèdjé arè nao.

⁴⁵ Tokou ban Juifdjé nya horodè té ke dé ke Marie, ke wo né ke Jésus da, do mèdè té sa.

⁴⁶ A maredjé ao pa tar nèn toï ke Jésus da are Pharisiendjé wo.

⁴⁷ Tokou ban tokou ndjè kòrdjé ke Pharisiendjé ndedjina, mpana, Di a dja da wa? Mbata doou nèn ao da né mori nya.

⁴⁸ Tokou djïyè ban ba, dooudjé toï a kao ko mèdè té sa, ke Romaindjé a dé taa loou lodjè ke gel dooudjé lodjè.

⁴⁹ Mare doou lodè kada, ria na Caïphe, mbata nè nto mbai lo ndjè kòrdjé bal té ke nou, nè mpa naredè, Sésè egeridjé né kada ang.

⁵⁰ Edjidjé mèsè té ang, to madji mbata losè tokou doou kada woei mbata dooudjé, a geldjè toï a kwoei ang.

⁵¹ Nè mpa yèn ke mèa ang, mbata nè nto mbai lo ndjè kòrdjé bal té ke nou, nè mpa tokou prophètedjé, Jésus ase kwoei mbata gel dooudjé lodè.

⁵² Mbata gel Juifdjé kadaba ang, a tokou ban nè nase ta mbòn ngandjé lo Allah ke särèna kada kada loou kadaba.

⁵³ Tokou ban dèdè dounkotè ndè té nou dao ndedjina ta tòlè.

⁵⁴ Tokou ban Jésus ndja tesèrè horo Juifdjé té ang nga, a nè nï nou nao nange ngosiba ke mè mou té, béh té ke mmar na Ephraim, nisi nou ke ndjè kao gè tédjé.

⁵⁵ Ndò Pâque lo Juifdjé dé ngosiba, dooudjé baya baya ke béh ke dang dang ao Jérusalem té dongor mbata ndò Pâque, mbata toko ròdè.

⁵⁶ Tokou ban dèdè nsange Jésus, tokou dèdè darr mè tòkou kei Allah té, dèdè dao mpa tar horodè té, Edjidjé di wa? Nè na dé ndò ke bo té nèn ang wa?

⁵⁷ Tokou ndjè kòrdjé ke Pharisiendjé mpa tar dongor, tokou mare doou geré loou la, ase kare ntòdjoudè, baa ta karedè dao dwèè.