Jean 10 - Testament ke Siki 1960 (Kabba Laka)

¹ Tokoro, tokoro, ma mpa maresè, doou ke ande mè ndooko té lo batidjé ke tè ang, a nande mè té ke mare deo ke dang, doou nèn to ndjè boukou ke ndjè to ndjè boukou ke bel ang.

² A doou ke ande mè té ke tè ndja, doou nèn to ndjè koul batidjé.

³ Ndjè ngemdè òrou tè arè, batidjé wo ndouè, ke nè mmar batidjé la ndja ke ridè kada kada, nè ndja nodè té ta tòdjoudè deo.

⁴ Tokou nè ntéh ke batidjé la ndja toï ke daka, nè ndja nodè té, ke batidjé la ndja gè té, mbata dèdè ngeré ndouè.

⁵ Dèdè ndja go doou té ke dang ang, a dèdè daïè, mbata dèdè ngeré ndou dooudjé ke dang ang.

⁶ Jésus pa tar gousou nèn aredè, a dèdè ngeré gel tar ke nè mpa naredè ang.

⁷ Tokou ban Jésus pa aredè bai, Tokoro, tokoro, ma mpa maresè, mam nto ta ndooko lo batidjé.

⁸ Dèdè toï ke ndé dongor darem, dèdè nto ndjè boukoudjé ke dooudjé ke ndjè boukou ke bel ang, a batidjé wo tadè ang.

⁹ Mam nto tadeo, tokou doou ande mè té ke deo lom, ndjè a kinga kadji, nè nase dé mè té ke ta téh daka, ke na kinga né kousa madji.

¹⁰ Ndjè boukou dé mbata boukou, ke ta tòl, ke ta toudjou né. Mam ndé baa ta kare dèdè dase kinga tébe, ke ta kéh ke tébe nèn nya.

¹¹ Mam nto ndjè koul bati ke madji, ndjè koul bati ke madji ïya tébe la mbata batidjé.

¹² Nè ke nto ngonlokisi, nè nto ndjè koul né ang, batidjé to ngë ang, tokou nè no ndjakemdjar ao dé, nè nïya batidjé nè naïn, ndjakemdjar dé waadè, nsärèdè.

¹³ Ngonlokisi aïn ban mbata nè nto ngonlokisi ba, mèa ndiki batidjé ang.

¹⁴ Mam nto ndjè koul bati ke madji. Mam ngeré batidjé lom, ke batidjé lom gerem.

¹⁵ Deo kadaba tokou Bòi Allah gerem, ke mam ngeré Bòi Allah, ke mïya tébe lom mbata batidjé.

¹⁶ Ma méh ke mare batidjé, ke to yéh ke mè ndooko té nèn ang, to tar lom ta dé kedè to, ke da ko ndoum, ta kare dèdè da to ndjè ke mè singaa té kadaba, ke ndjè kouldè kadaba.

¹⁷ Mbata tar nèn a Bòi Allah ndikim, mbata ma mïya tébe lom, baa ta karem mase ta tél taa tébe nèn bai.

¹⁸ Doou kada òrou tébe nèn djim té ang, ma mïya tébe nèn ke mem ndja. Ma méh ke singa ta kïya, ke ma méh ke singa ta tél taa tébe nèn bai. Bòi arem ta da né nèn.

¹⁹ Mbata tar nèn tar tina ï horo Juifdjé té.

²⁰ Dooudjé lodè nya pana, Nè néh ke ndii ke madjang, nè nto mbe, mbata di a woidjé tar la wa?

²¹ Maredjé pana, Tar nèn to ngà doou ke yéh ke ndii ke madjang ang. Ndil ke madjang ase ta teï kem doou wa?

²² Ndò ke bo ke to ndò Dédicace to Jérusalem té.

²³ To nai koul té, ke Jésus ao ndja tokou kei Allah té, kare kei té lo Salomon.

²⁴ Tokou ban Juifdjé dé, ngoukou dè, dèdè mpa darè, I ndiki ta kare djèdjè ngem tar loi ndò ban wa? Tokou i to Christ ke tokoro epa aredjè tesèrè.

²⁵ Jésus tél pa aredè, Ma mpa maresè kao, ke woidjé ang, koula ke mao nda ke ri Bòi, koula nèn a pa tar nadji lom.

²⁶ A woidjé mèsè té ang, mbata sésè etoidjé batidjé lom ang.

²⁷ Batidjé lom wo ndoum, ke mam ngerédè, ke dèdè ndja gom té.

²⁸ Ma maredè tébe ke ke ndò ke ndò, a da kwoei ngadji ang, ke doou kada a kòroudè djim té ang.

²⁹ Bòi ke aremdè, nè mbo nouta toï, doou kada ase ta kòroudè dji Bòi Allah té ang.

³⁰ Ma djéh ke Bòi Allah kadaba.

³¹ Juifdjé tél ndë err ta tilè né bai.

³² Jésus tél pa aredè, Mam ntòdjousè koula ke madji lo Bòi Allah nya, ata tilamdjé mbata koula di wa?

³³ Juifdjé tél pa arè, Djèdjè ndiki ta tilai ke err mbata koula ke madji kada ang, a mbata i pa tar sä. Mbata i ke to doou, i pana i to to Allah.

³⁴ Jésus tél pa aredè, Maketourou tar ndedji losè pa ang, Ma mpa, sésè etoidjé allahdjé wa?

³⁵ Tokou nè mmardè allahdjé, dooudjé ke tar lo Allah dé ròdè té leo, maketourou lo Allah ase ta dé to né ke kari ba ang.

³⁶ Sésè epaidjé tar la, nè ke Bòi Allah barè ke daka mbata la ndja, ke noulè narè ndé nange nèn, I pa tar sä, mbata ma mpana, mam nto Ngon lo Allah wa?

³⁷ Tokou mam nda koula lo Bòi ang, woidjé tar lom ang.

³⁸ A tokou mam nda koula nèn, tokou woidjé tar lom ang, woidjé tar koula nèn, baa sésè asidjé ta geré mèsè té toï, Bòi Allah éh mem té, ke ma méh mè Bòi Allah té.

³⁹ Tokou ban dèdè nsange deo ta kwèè bai, a nè nòte djidè té.

⁴⁰ Nè ntél toura man Jourdain té, loou té ke Jean da baptême kendé dongor. Nè nisi kendé nou.

⁴¹ Dooudjé baya dé rè té, dèdè mpana, Jean da né mori kada ang, a né toï ke nè mpa mbata doou nèn to tokoro.

⁴² Ke dooudjé nya ke nou wo mèdè té sa.