Jean 1 - Testament ke Siki 1960 (Kabba Laka)

¹ Ke dongor kèté, Tar ndja éh tén, ke Tar ndja éh ke Allah, ke Tar ndja éh to Allah.

² Nè ndja néh ke Allah dongor kèté nou.

³ Nè nda né toï, né kada ke nè nda ang goto.

⁴ Tébe to mèa té, ke tében lé to lokarè lo dooudjé.

⁵ Lokarèn lé ndokoo londoul té, a londoul ndoulè ang.

⁶ Doou kada dé mba, doou ke Allah oulè leo, ria na Jean.

⁷ Nè ndé mbata tar nadji, ke ta pa tar nadji lo lokarè, baa dooudjé toï ase ta ko mèdè té deo té la.

⁸ Doou nèn to lokarèn lé ang, a nè ndé ta pa tar nadji lo lokarèn.

⁹ Lokarè nèn ke tokoro, to lokarè ke dé nange nèn ke ndokoo horo dooudjé té kada kada toï.

¹⁰ Nè néh nange nèn, ke nè nda nange nèn mba, a dooudjé ke nange nèn geré leo ang.

¹¹ Nè ndé horo nédjé té la, a dooudjé la tèè ke ròdè té ang.

¹² A dooudjé kada kada toï ke tèè ke ròdè té, ke wo mèdè té ke ria, nè naredè singa ta kare ndé to ngandjé lo Allah,

¹³ Ke doudjou ke mese ang, ke né ke rò ndiki ang, ke né ke doou ndiki ang, a to ngà Allah ndja.

¹⁴ Tar ndja dé to rò doou, ke nè nisi horodjè té, tòkou mè madji dousou mèa ke tar ke tokoro tò, djèdjè djo ndokoo la, ndokoo tokou mare lo Ngon kada lo Bò ngondjè.

¹⁵ Jean pa tar nadji la, nè mpa ke tarr, mpana, Yèn to nè ke ma mpa tar la kèté, nè ke nao ndé gom té, nè mbo noutam, mbata nè néh kèté dongor narem.

¹⁶ Djèdjè toï ntaa né la nya mbä, tokou mè madji mbata tokou mè madji.

¹⁷ Mbata dare tar ndedji dé leo deo té lo Moïse, tokou mè madji ke tar ke tokoro dé deo té lo Jésus Christ.

¹⁸ Doou kada nai wo Allah ang bai ndò kada ang. Ngon kada ke éh kare Bèdjè té, nè ntòdjou Allah ke daka.

¹⁹ Yéh nèn to tar nadji lo Jean, ndò ke Juifdjé oula ndjè kòrdjé ke Lévitedjé ke Jérusalem té mbata doudjè, I to doou di wa?

²⁰ Nè mpa ke daka, nè mmai ang, nè mpa ke daka, Mam nto Christ ang.

²¹ Dèdè ndoudjè, I to doou di wa? I to Élie? Nè mpana, Mam nto Élie ang. I to prophète nèn wa? Nè ntél mpana, Ban ang.

²² Tokou ban dèdè mpa sa, I to doou di wa? Mbata kare djèdjè ntél djao mpa djare ndjè ke ouladjè. Di a epa mbata loi ndja wa?

²³ Nè mpana, Mam nto ndou doou ke ourouki mè kòr té, Edaidjé deo lo Mbaibé Seigneur ke dana gaté gaté, tokou prophète Ésaïe pa.

²⁴ Dooudjé ke douladè to Pharisiendjé.

²⁵ Dèdè ntél ndoudjè, mpa darè, Mbata di a i da baptême wa, tokou bo i to Christ ang, aséh i to Élie ang, aséh i to prophète nèn ang wa?

²⁶ Jean tél pa aredè, pana, Mam nda baptême ke man, a doou kada arr horosè té nèn ke sésè egerèdjé ang.

²⁷ Nè ke ndé gom té, ma mase ta toutou ndar gòlè té ang.

²⁸ Tar nèn toï téh Béthanie té, ke téh toura Jourdain té, ke loou ke Jean ao da baptême kendé.

²⁹ Ndò kada gè té, nè no Jésus ao dé ke rè té, nè mpana, Woidjé, Ngon bati lo Allah, nè ke nòrou né ke madjang ke nange nèn.

³⁰ Yèn to nè ke ma mpa tar la kèté, doou kada ao dé gom té ke bo wotam, mbata nè néh kèté dongor narem.

³¹ Mam ngerè leo ang, a mbata nè nase ta téh gel Israël té, mbata lo yèn a mam ndé ta da baptême ke man.

³² Jean pa tar nadji, nè mpana, Ma mo Ndil téh mè dara té disi tokou egoutou ke nisi dè té.

³³ Mam ngerè leo ang, a doou ke oulam ta karem nda baptême ke man, nè mpa narem, Tokou wo doou ke Ndil disi isi dè té, a nè nto doou ke da baptême ke Ndil ke madji toï.

³⁴ Ma mo, ke ma mpa tar nadji mba, nè nèn nto Ngon lo Allah.

³⁵ Gè té ndò kada, Jean arr ke mare ndjè kao gè tédjé djo.

³⁶ Tokou nè no Jésus ao ndai, nè mpana, Woidjé, Ngon bati lo Allah.

³⁷ Ndjè kao gè té ke djo wo tar ke nè mpa, dèdè dao go Jésus té.

³⁸ Jésus tourou rè, nè no dèdè ke ndé gè té, nè mpa naredè, Ao sangidjé di wa? Dèdè mpa darè, Rabbi (yèn pana, Ndjè tòdjou tar), I to da wa?

³⁹ Nè mpa naredè, Edéidjé, sésè a koidjé. Tokou ban dèdè dao do loou to la, dèdè disi sa ndè tén, kade dé ngosiba ta kwoei.

⁴⁰ André, ngokö Simon Pierre, to doou kada lo dèdè ke djo ke wo tar lo Jean, nè nao go Jésus té.

⁴¹ Nè nsange ngoköè Simon dongor, nè mpa narè, Djèdjè djinga Messie mba (yèn pana, Christ).

⁴² Nè ndé ke ngoköè rò Jésus té. Tokou Jésus woè, nè mpana, I to Simon, ngon lo Jonas, dèdè da bari Céphas, (yèn pana, Pierre, aséh err).

⁴³ Gè té mare ndò kada, Jésus ndiki ta kao Galilée. Nè ninga Philippe, nè mpa narè, Edé gom té.

⁴⁴ Philippe to doou ke Béthsaïda, béh lo André ke Pierre.

⁴⁵ Philippe inga Nathaniel, nè mpa narè, Djèdjè djingè mbä, nè ke Moïse pa tar la mè maketourou tar ndedji té, prophètedjé pa tar la mè maketourou té to, Jésus ke Nazareth, ngon lo Joseph.

⁴⁶ Nathaniel pa arè, Né kada ke madji ase ta téh Nazareth té wa? Philippe pa arè, Edé wo.

⁴⁷ Jésus wo Nathaniel ao dé rè té, nè mpa tar la, Wo, doou ke tokoro lo Israël, nere ngem ngadji ang.

⁴⁸ Nathaniel pa arè, I gerem loou té ke da wa? Jésus tél pa arè, Dongor Philippe bari, tokou i éh ko kake toungoutisa té nou, ma moi.

⁴⁹ Nathaniel pa arè, Ndjè tòdjou tar, i to Ngon lo Allah, i to Mbaibé lo Israël.

⁵⁰ Jésus tél pa arè, Mbata lo ma mpa mari, ma moi kò kake toungoutisa té, i wo mei té wa? I a ko né ke wota yéh nèn.

⁵¹ Nè mpa narè, Tokoro, tokoro, ma mpa maresè, sésè a koidjé dara a teï, angedjé lo Allah al ke disi dò Ngon té lo doou.