Jacques 5 - Testament ke Siki 1960 (Kabba Laka)

¹ Edéidjé loshénè, sè ndjè né kinga, enòidjé ke esomidjé ròsè, mbata né ongou ke ao dé dèsè té.

² Né kinga losè ndoum mbä, ke ndirbòrou ousa koubou losè.

³ Mbòrkasè ousa narè lor ke narè argent losè, ke kwaa mbòrkasè lodè a pa tar nadji dòsè té, ke a kousa ròsè tokou pourou. Sésè mbòidjé né kinga losè mbata ndò ke ao dé.

⁴ Woidjé, kouka lo ndjè kouladjé ke oudja ko losè, ke òkidjédè ke boukou, dèdè nnò ke daka ke no lo ndjè koudja ko téh mbi Mbaibé Seigneur té lo Sabaoth.

⁵ Sésè isidjé nange gè eo ke né ke mèsè ndiki ke rònèl, ndò tòl doou sésè edaidjé mèsè are dousou ke né ke madji nya.

⁶ Sésè egangidjé saria mbä, etòlidjé doou ke gaté gaté mbä, nè mbetésè ang.

⁷ Tokou ban ngakömdjé, isidjé ke mè ke enge ang sar téh lo Mbaibé Seigneur. Woidjé, ndjè ndòò ngebe kandé ke madji lo nange nèn, nè ngebe ke mè ke enge ang sar nè ninga ndi bia ke dongor ke nai ndi ke goukou.

⁸ Isidjé ke mè ke enge ang tò. Etoidjé mèsè ngeng, mbata téh lo Mbaibé Seigneur éh ngosiba.

⁹ Ngakömdjé, namdjé kena horosè té ang, baa ta kare ingaidjé saria ang, woidjé ndjè gange saria arr tadeo kei té.

¹⁰ Ngakömdjé, etaaidjé tar lo prophètedjé ke pa tar ke ri Mbaibé Seigneur leo, to né tòdjou lo né ongou ke mè ke enge ang.

¹¹ Woidjé, djèdjè mpana koukou éh ke dèdè ke dwaa dare ngeng. Sésè woidjé tar lo Job ke waa are ngeng, ke sésè woidjé né ke Mbaibé Seigneur da sa gè té ke goukoudang, mbata Mbaibé Seigneur dousou ke mè ndiki ke mè madji.

¹² A tar ke wota maredjé toï ngakömdjé, ase kare oubidjé yo ke ri dara ang, aséh ke ri nange ang, aséh ke mare yo koubou ang, a ase kare aa losè to aä, ke eë losè to eë, ta kare saria oso dòsè té ang.

¹³ Mare doou horosè té inga ongou wa? Ase kare nè ndoudjou Allah. Mare doou éh ke koukou wa? Ase kare nè nòsou pa lo Allah.

¹⁴ Mare doou éh ke rò too horosè té wa? Ase kare nè mmar tokou dooudjé ke kei Allah té, ta kare ndoudjou Allah mbata la, ke ta kila oubou dè té ke ri Mbaibé Seigneur.

¹⁵ Doudjou Allah ke ko mè té a kadji doou ke ndjè rò too nèn, ke Mbaibé Seigneur a kwèè ke tarr, tokou nè nda né ke madjang mbä, né ke madjang la toï a goto.

¹⁶ Tokou ban, epaidjé né ke madjang losè ke daka horosè té, ke edoudjidjé Allah mbata maredjé horosè té, baa ta kare sésè a déidjé madii. Doudjou Allah ngeng lo doou ke gaté gaté éh ke singa ta da né nya.

¹⁷ Élie to doou ke da rò té deo kadaba kedjè, nè ndoudjou Allah ngeng ta kare ndi ere ang, ke ndi ere nange nèn ang mbata bal mouta ke nnè misä.

¹⁸ Bana nè ntél ndoudjou mare bai, ke dara are ndi ere, ke nange an kandé la.

¹⁹ Ngakömdjé, tokou mare doou horosè té ndem deo tar ke tokoro, ke mare ntél sa deoè té,

²⁰ Ase kare nè ngeré doou ke tourou mè doou ke da né ke madjang, ta karè nïya deo ke gatang la, doou nèn adji ndii kada mè yo té, ke nè nòkou do né ke madjang nya.