Jacques 4 - Testament ke Siki 1960 (Kabba Laka)

¹ Doo ï da wa ke ngätar ï horosè té da wa? Ï ke boo losè ke da doo mè barkem ròsè té nèn ang wa?

² Boo né dasè, ke sésè ingaidjé ang, bana etòlidjé doou. Sésè edaidjé mè, a asidjé kinga né ang, tokou ban waaidjé moula ke edaidjé dòò. Sésè éhdjé ke né ang mbata edoudjidjé ang.

³ Sésè edoudjidjé a ingaidjé ang, mbata edoudjidjé ke deoè ang, a ta kon mbata boo losè.

⁴ Sè dooudjé ke ndjè kaiya. Egeridjé ang wa, ta kwaa bokora ke nange nèn to ngä mbeté Allah? Tokou ban, doou ke ndiki ta dé to bokora lo nange nèn, nè nda rè ndja to ndjè kembaa lo Allah.

⁵ Aséh mèsè pana maketourou lo Allah pa tar ba wa, ke pana, Ndil ke nè nare to mèdjè té da nderèng mè tooè mbata lodjè.

⁶ A nè nare tokou mè madji wota, mbata yèn maketourou pa, Allah mbeté dooudjé ke ndjè do ngeng, a nè nare tokou mè madji dooudjé ke ndoi ròdè ang.

⁷ Tokou ban woidjé ta Allah, mbetidjé Satan ke nè na kaïnsè.

⁸ Edéidjé ngosiba ke Allah, ke nè na dé ngosiba kesè. Etokoidjé djisè, sè ndjè né da ke madjang, etokoidjé mèsè, sè dooudjé ke ndjè mè kedji djo.

⁹ Isidjé ke ongou, edaidjé ndoo ke enòidjé. Ase kare koukou losè tél ongou, ke rònèl tél ròkoul.

¹⁰ Edaidjé ròsè ndja ngadji kem Mbaibé Seigneur té, a na kòsou gadjisè.

¹¹ Ngakömdjé, epaidjé tar madjang do maredjé té horosè té ang. Doou ke pa tar madjang dò ngoköè té, aséh nè ngange saria ke ngoköè, nè mpa madjang dò tar ndedji té, ke ngange saria ke tar ndedji. A tokou i gange saria ke tar ndedji, i to doou ke da né ke tar ndedji pa ang, a i to ndjè gange saria.

¹² Doou kadaba to ndjè doubou tar ndedji ke ndjè gange saria, nè ke nase ta kadji ke ta tòl. A i to na ke i gange saria ke doou ke ndjè nin kei mari wa?

¹³ Edéidjé loshénè, sésè ke epaidjéna, Bokonè aséh bara dja kao béh té ke yon ta kisi bal kada, ke dja labe né narè ke dja kinga né.

¹⁴ Sésè ke egeridjé né ke a téh bara ang. Tébe losè to di wa? Mbata sésè etoidjé to sa man ke téh ngadji a goukoudang goto.

¹⁵ A to tar losè ta pa tokou ban, Tokou Mbaibé Seigneur ndiki, dja kisi tébe ke djèdjè dja da yéh ke nèn, aséh yéh ke ton.

¹⁶ A sésè edaidjé piti ke kedji boro losè. Piti toï tokou ban to madjang.

¹⁷ Tokou ban, doou ke geré ta da madji baa da ang, yèn to né ke madjang mbata la.