Jacques 3 - Testament ke Siki 1960 (Kabba Laka)

¹ Ngakömdjé, ase kare dooudjé baya horosè té to ndjè tòdjou tar ang, mbata sésè egeridjé djèdjè ke ntòdjou tar, da gange saria dòdjè té ngeng wota.

² Mbata djèdjè toï nda né touka gòl nya, a tokou mare doou da né touka gòl ang deo tar té ke nè mpa, nè nto doou ke ase toï, nè nase ngem rè toï to.

³ Tokou djèdjè ntò ta soundadjé ke kèngèlèng mbata karedè do tar lodjè, djèdjè ntourou ròdè toï tò.

⁴ Woidjé tòkou to to, dèdè nto to ke boui ke lél ke ngeng oula ngesedè, a ntouroudè ke hai ngadji loou té ke ndjè lél to ndiki.

⁵ Tokou ban ndö to barkem rò ke ngadji, a nè mboro ke tar nya. Woidjé ngon yél pourou ase ko tokou koutou kake toï.

⁶ Ndö to to pourou. Ndö to tokou nange ke madjang horo barkem ròdjè té, nda ròdjè toï madjang, yélè ndò té lodjè toï, loou kem pourou ke yélè kendé.

⁷ Mbata doou ase da ke mare dadjé toï ke eldjé ke né toï ke ake nange, ke dadjé ke mè tokou man katé té, baa ta karedè do tar, aséh ndadè leo baa dare do tar.

⁸ A doou kada ase ta kö dò ndö ang, nè nto né ke madjang, nè ndousou ke kouma ta tòl né.

⁹ Djèdjè mpa tar ke madji ke Mbaibé Seigneur Bòdjèdjè ke ndò nèn, ke djèdjè ntadji dooudjé ke té, dèdè ke ndadè tokou rò Allah.

¹⁰ Tar ke madji ke tar tadji téh deo ta té kadaba. Ngakömdjé, ase kare nèn to tokou ban ang.

¹¹ Man ke madji ke yéh ke madjang aïn mè bwa man té ke kadaba wa?

¹² Ngakömdjé, toungoutisa ase kan kandé Olivier, aséh ndouou ase kan kandé toungoutisa wa? Deo kadaba ban man katé ase ta kare man ke madji téh ang tò.

¹³ Doou ke da horosè té éh ke kemkarè ke gousou wa? Deo ndja té ke madji la, ase kare nè ntòdjou koula la ke mè ke dèkèkè ase kemkarè.

¹⁴ A tokou sésè éhdjé ke mè madjang ke kòl mèsè té, òsidjé gadjisè ang, eridjé ngem mbòr tar té ke madji ang.

¹⁵ Kemkarè nèn to kemkarè ke ï dara dé ang, a to yéh ke nange nèn, ngä ndii da rò ke ndii lo Satan.

¹⁶ Mbata loou té ke mè madjang ke kòl éh kendé, né ke gatang ke koula ke madjang toï a kéh kendé.

¹⁷ A kemkarè ke ï dara dé, ke dongor éh ke madjang ngadji ang, gè té to mè woul, mè ke dèkèkè, wo tar ndjange, dousou ke mè madji ke kandé ke madji, wo dooudjé ke kem ke djo ang, aséh ere ngem ang.

¹⁸ Gaté gaté to kandé ke ndoubou ke mè woul, deo té lodè ke nsange mè woul.