Jacques 2 - Testament ke Siki 1960 (Kabba Laka)

¹ Ngakömdjé, epitidjé doou kada wota maredjé ang tokou ngemidjé ko mè té lo Mbaibé lodjè Jésus Christ, ke ndjè ndokoo.

² Mbata tokou mare doou kada dé kei Allah té losè ke ndèrè lor dja té, ke noula koubou ke koura nya, a dangeté ke oula koubou ke madji ang dé tò,

³ Ke sésè oundaidjé kemsè do doou té ke oula koubou ke koura nya, epaidjé sa, Isi loou té ke madji nèn, a epaidjé ke dangeté na, Arr nou, aséh edé isi kò gòlem té nèn,

⁴ Bana sésè epitidjé doou dang dang horosè té ang wa, ke edéidjé to dooudjé ke ndjè gange saria ke kedji ke madjang ke mèsè té ang wa?

⁵ Woidjé, ngakömdjé ke mam ndikisè nya, Allah mbere dèdè ke nto dangetédjé ke nange nèn ang wa, ta karedè ndé to ndjè né kinga deo ko mè té, ke ndjè kwaa né ndouba béh kö la, ke nè nto ta kare dèdè ke ndikè?

⁶ A sésè ilaidjé ròkoul kem dangetédjé té. To ndjè né kingadjé ke toula dòsè ang wa, dèdè ke dwaasè ke dao kesè loou gange saria té ang wa?

⁷ To dèdè ke ntadji ri ke madji ke ebaridjé dòsè té ang wa?

⁸ Tokou sésè edaidjé né ke tòkou tar ndedji pa toï, deo kadaba tokou maketourou lo Allah pa, Ase kare ndiki doou ke ndjè nin kei mari tokou i ndiki ròi ndja, sésè edaidjé madji.

⁹ A tokou sésè epitidjé doou kada wota maredjé, sésè edaidjé né ke madjang, mbata tar ndedji gange saria dòsè té ke sésè etoidjé ndjè mbeté tar la.

¹⁰ Mbata doou ke ngem tar ndedji toï a lal mare kada, saria lo tar ndedji toï to dè té.

¹¹ Mbata nè ke mpana, Eto loou to madjang ang, nè mpa tò, Etòl doou ang. Tokou ban, tokou i to loou to madjang ang, a i toï doou, i dé to doou ke mbeté tar ndedji.

¹² Epaidjé tar ke edaidjé né ase dooudjé ke da gange saria lodè deo tar ndedji té ke ngä dò to lél pè.

¹³ Mbata saria éh ke mè madji kada ang ke doou ke da mè madji ang, mè madji ndai saria.

¹⁴ Ngakömdjé, tokou mare doou pana nè nto doou ke ndjè ko mè té, a nè néh ke koulè ang, yèn dè madji to di wa? Ko mè té la ase kadjè wa?

¹⁵ Tokou ngokö ke dingao aséh könan ke dènè éh ke koubou ang, ke mourou ke bokonè douè,

¹⁶ Ke doou kada horosè té pa kedè, Abidjé madji, ndibidjé pourou ke mèsè ndan, a aridjédè né ke ase ròdè ang, yèn dadè madji to di wa?

¹⁷ Tokou ban ko mè té ke éh ke koulè ang, woei rè té ndja.

¹⁸ A mare doou a pana, I éh ke ko mè té ke ma méh ke koula. Etòdjoum ko mè té loi ke éh ke koulè ang, ke ma ma tòdji ko mè té lom ke deo koula té lom.

¹⁹ I wo mei té Allah to kadaba, i da madji. Ndildjé ke madjang do mèdè té to ke ròdè isa.

²⁰ A i ndiki ta kare ntòdji, i doou ke ndjè boro ke ba, ko mè té ke to ke koulè ang to to né ke ba ang wa?

²¹ Abraham bòdjèdjè dé gaté gaté deo koula té ang, tokou nè noun ngonè Isaac to né nounga pouro do bann té wa?

²² I wo ko mè té da deo kadaba ke koula la, ke ko mè té da ase toï deo koula té.

²³ Tar ke maketourou pa dé tokou tokoro, Abraham wo mèa té ke Allah, ke ntoura ko mè té la to gaté gaté, ke mmarè nam Allah.

²⁴ Tokou ban woidjé doou dé gaté gaté deo koula té, sè ke deo ko mè té ke kadèba ang.

²⁵ Deo kadaba ban to, Rahab dènè kaiya dé gaté gaté tokou nè ntaa ndjè ke douladè, naredè dao ke deo ke dang ang wa?

²⁶ Deo kadaba tokou rò ke éh ke ndii ang woei, tokou ban ko mè té ke éh ke koulè ang woei tò.