Jacques 1 - Testament ke Siki 1960 (Kabba Laka)

¹ Jacques, bere lo Allah ke Mbaibé Jésus Christ, oula maketourou nèn are gel dooudjé dòkou gérè djo, ke särèna dang dang. Mam ndasè laphia.

² Ngakömdjé, tokou osoidjé né té ke naasè dang dang, woidjé toï tokou né koukou.

³ Mbata sésè egeridjé naa ko mè té losè da ta kare mè ïya ang.

⁴ A ase kare mè ke ïya ang da koula la toï, tokou ban asidjé toï ke né toï, ke né kada dousè ang.

⁵ A tokou mare doou horosè té éh ke kemkarè ang, ase kare nè ndoudjou Allah, nè ke nare dooudjé toï ba, nè nòkoudè ang, a na karè.

⁶ A ase kare nè ndoudjou ke ko mè té, a ke maitar ang, mbata nè ke mmaitar nto tokou lo poum man katé ke lél oula yè dang dang.

⁷ Ase kare doou ban edji mèa té ang, nè na kinga mare né dji Mbaibé Seigneur té.

⁸ Doou ke mèa djo to gatang deo té la toï.

⁹ Ase kare ngokö ke ba koukou mbata loou ke bo ke darè,

¹⁰ A doou ke ndjè né kinga koukou mbata darè ndé doou ke ngadji, mbata nè na ndai tokou poutou mou.

¹¹ Mbata kade téh ke kòsou la nya toutou mou, poutè toï gaï, koura ke rè té goto. Tokou ban doou ke ndjè né kinga a ken horo né té ke nè ninga.

¹² Koukou éh ke doou ke waa ngeng mè né kere té, mbata tokou nèè doè nase, na kinga djòkedò ke siki ke Allah to ta kare dèdè ke ndikè.

¹³ Tokou né ere doou, ase kare nè mpa ang, Allah erem, mbata né ke madjang ere Allah ang, ke nè ndja nere doou kada ang.

¹⁴ Boo ke mè dooudjé té kada kada ndja öè orè, yèn ere doou.

¹⁵ Gè té tokou boo nèn waa sem, oudjou né ke madjang, ke né ke madjang tokou tokou mbä, oudjou yo.

¹⁶ Eridjé ròsè ang, ngakömdjé ke mam ndikisè nya.

¹⁷ Né kare ba ke madji toï ke yéh ke ase toï, ï dara disi ke dji bo lokarè té. Ke mèa té nè ntourou aséh ndilè tél dang ang.

¹⁸ Nè noudjoudjè deo tar té ke tokoro ke né ke nè ndja ndiki, ta kare djase ndé to kandé ke dongor lo né toï ke nè nda.

¹⁹ Egeridjé yèn, ngakömdjé ke mam ndikisè nya, ase kare dooudjé kada kada toï wo tar loshénè loshénè, a mpa tar ndjange ndjange ang, nda ongou ndjange ang.

²⁰ Mbata ongou lo doou da né ke gaté gaté lo Allah ang.

²¹ Mbata tar nèn, ïyaidjé né yèdo toï ke né ke to madjang nya, etaaidjé ke mè ke dèkèkè tar ke ndoubou mèsè té, ke ase kadji ndilsè.

²² Ase kare edaidjé né ke tar ndja tòdjousè, woidjé ba ang ke ta kere né ròsè.

²³ Mbata tokou mare doou to ndjè ko tar ba, nè nto doou ke da ang, nè nto tokou doou ke wo kèmè ke né ko kem.

²⁴ Tokou nè no mbä, nè nao, loshénè loshénè ikè nè nto tokou di wa.

²⁵ A doou ke wo mè tar ndedji té ke gaté gaté, tar ndedji ke to do to lél pè, ke nè nda deoè té, mbata nè nto doou ke wo tar ba ta kare ikè ang, a nè nto doou ke da né, nè na kinga né ke madji deo koula té la.

²⁶ Tokou mare doou pa mèa té na, nè nto doou ke wo tar lo Allah, tokou nè ntò ndë ang a nere mèa, tar Allah lo doou nèn to né ke ba.

²⁷ Tar Allah ndja ke madji ke éh ke madjang kada ang kem Allah bòdjèdjè té to tokou ban, ta kao ko dèdè ke nto nganaldjé ke dènè ndoubadjé mè né ongou té ke dadè, ke ta ngem ròdjè ndja mbata waa yèdo madjang ke nange nèn ang.