Ebərəje 9 - Testament ke Siki 1960 (Kabba Laka)

¹ Tar kwaana medji ke dongor éh ke deo ta doudjou Allah, ke éh ke loou ke madji ke nange nèn.

² Mbata nda kei koubou, loou té ke kèté mmarè to loou ke madji toï, loou ke lampe ke table ke mourou kare Allah nto kendé

³ Ke giri koubou té ke djo, kei to ke mmarè loou ke madji toï ke madji toï.

⁴ Loou ke bann narè lor ta nounga poutou kam ke ete to kendé, ke sandoukou tar kwaana medji ke nda girè té toï ke narè lor, ke djo narè lor ke mourou manne to mè té, ke kake lo Aaron ke poutou, ke maketourou tar kwaana medji to mè sandoukou té nèn.

⁵ Angedjé ke to chérubin ke ndokoo to do sandoukou té nèn, ndildè goukou loou kinga mè madji. A djase ta pa gel né nèn toï loshénè ang.

⁶ A tokou né nèn toï da mbä, ndjè kòrdjé ande mè kei koubou té ke dongor ke ndò toï, ta da koula mè té.

⁷ A mè kei té ke djo, tokou ndjè kòr kadaba ande mè té, gar kadaba mbata bal kada, nè nao ke mese mbata nè ndja, ke mbata né ke madjang lo dooudjé.

⁸ Deo té lo tar nèn, Ndil ke madji toï tòdjou deo kao loou té ke madji toï òrou ang bai, tokou kei koubou ke dongor nèn arr ba.

⁹ Yèn to né tòdjou mbata bal ke loshénè nèn, deo té lo né nèn dare né kare ba ke né polo, ke ase kare kedji né geré lodè ke doudjou Allah dé ase toï ang.

¹⁰ Mbata yèn to tar mourou, ke né kaih, ke tar toko rò dang dang, ke dèdè nda deo té lo da rò sar ndò ta da né gaté gaté.

¹¹ A ndò ke Christ téh tokou tòkou ndjè kòr lo né ke madji ke ata dé, deo kei koubou té ke boui wota ke ase wota toï, ke dji doou da ang, yèn pana to ngä nange nèn ang.

¹² Nè nande mè loou té ke madji toï gar kada mbata toï, nè nao ke mese biandjé ke ngan mangedjé ang, a ke mèsè ndja, tokou ban ninga kadji ke ke ndò ke ndò.

¹³ Mbata tokou mese biandjé ke boro mangedjé, ke bou pourou ngon mandé mange ke dèdè ntousou do dooudjé té ke da madjang, ndadè madji toï ta kare yèdo da rò goto,

¹⁴ Wota yèn, mese Christ, nè ke nare rè ndja Allah deo té lo Ndil ke ke ndò ke ndò, ke yèdo kada ang, a toko kedji né geré losè ta kïya koula ke woei ta da kare Allah ke tébe.

¹⁵ Mbata yèn, nè nto ndjè moso tar kwaana medji ke siki, baa ta kare dèdè ke mmardè dinga né ndouba ke ndò toï, ke Allah tòdè, deo kwoei té la ke adji dèdè ke nda madjang ko tar kwaana medji té ke dongor.

¹⁶ Mbata tokou tar kwaana medji to, doou ke da né, ase ta kwoei dongor.

¹⁷ Mbata tar kwaana medji dé to tar ke ngeng go kwoei té, a to tar ke ngeng ang tokou doou ke da nai tébe ba.

¹⁸ Tokou ban tar kwaana medji ke dongor dé ngeng sè deo té lo mese.

¹⁹ Tokou Moïse pa tar ndedji toï are dooudjé toï, nè noun mese ngan mangedjé ke biandjé, ke man ke bi bati ke kasè, ke kake hysope, nè ntousou do maketourou té ndja ke do dooudjé té toï.

²⁰ Nè mpana, Yèn to mese tar kwaana medji ke Allah pa mbata losè.

²¹ Deo kadaba ntousou mese do kei koubou té, ke do né té toï ke nda koula lo Allah kendé tò.

²² Ke deo té lo tar ndedji, nai ngadji né toï toko ke mese, tokou mese aïn ang, kïya né ke madjang goto.

²³ Tokou ban ase ta toko né ke ounda ròna ke ndii né ke dara deo té lo né ban, a né ke dara ndja ase ta toko deo né polo té ke madji wota yèn.

²⁴ Mbata Christ ande loou té ke madji toï ke dji doou da ang, ke to né ndadji yéh ke tokoro, a nè nande dara ndja, baa ta téh loshénè no Allah té mbata lodjè.

²⁵ Ke ta kare rè ndja gar baya ang, tokou tòkou ndjè kòr ke ande loou té ke madji toï bal ke bal ke mese ke to ngë ang.

²⁶ Tokou to ban, nè nase ko né ndoo gar baya leo baa kounkoutou da nange. A bashénè ke dòbon ndò, nè ntéh gar kadaba ta toudjou né ke madjang deo kare rè té ndja to né polo.

²⁷ Deo kadaba tokou ban to tar lo dooudjé ta kwoei gar kada, ke gè té saria a dé.

²⁸ Tokou ban Christ are rè ndja gar kada ta koto né ke madjang lo dooudjé nya, nè na téh gar djo, mbata né ke madjang ang, a ta kadji ndjè ke ngebè.