Ebərəje 8 - Testament ke Siki 1960 (Kabba Laka)

¹ Dòbon tar toï ke djèdjè mpa to yèn, djèdjè djéh ke tokou ndjè kòr ke isi dara do dji kòl ngèndé té lo nè ke nouta toï.

² To doou ke ndjè da loou té ke madji toï, ke mè kei koubou té ke tokoro, ke Mbaibé Seigneur da, doou kada da ang.

³ Mbata dounda tòkou ndjè kòr ta kare né kare ba ke né nounga pouro, tokou ban nè nase kéh ke né ta kare tò.

⁴ Tokou nè nto nange nèn, nè na to ndjè kòr ngadji ang, mbata ndjè kòrdjé to ke are né kare ba deo té lo tar ndedji.

⁵ Dèdè nda yèn to né ke ounda ròna ke ndii né ke dara, mbata ndò ke Moïse ao da kei koubou, Allah todjé pana, Ngem madji ta da né toï tokou yéh ke wo do err té.

⁶ A bashénè Christ inga koula ke madji wota yéh ke leo, mbata nè nto ndjè moso tar ke kwaana medji ke madji wota, ke doundè deo tar té ke Allah tò ke to madji wota.

⁷ Mbata tokou tar kwaana medji ke dongor ase madji toï, a deo tourou yéh ke djo la goto.

⁸ Mbata tokou nè no tar lodè gatang, nè mpa, Ndò ao dé, Mbaibé Seigneur pa, Ndò ke ma ma da tar kwaana medji ke siki ke kei lo Israël, ke kei lo Juda to.

⁹ To tokou tar kwaana medji ke mam nda ke bòdèdè ang, ndò té ke mam nwaa djidè ta kòroudè ke daka nange Egypte té, mbata dèdè ngem tar kwaana medji lom ang, ma medji dodè té ang, Mbaibé Seigneur pa.

¹⁰ Yèn to tar kwaana medji ke ma ma da ke kei lo Israël ke go ndò tén, Mbaibé Seigneur pa, Ma ma kila tar ndedji lom kedji té lodè, ke ma ma da tokou maketourou mèdè té, ke ma ma to Allah lodè ke dèdè da to dooudjé lom.

¹¹ Mare kada a tòdjou gel dooudjé la kada ang aséh mare ngoköè kada ang, ta pana, Egeridjé Mbaibé Seigneur, mbata toï a gerem, ounkotè ke ndjè ke ngadji nderèng ndjè ke tòkou.

¹² Mbata ma ma da mè madji ke mbeté tar ndedji lodè, ke ma ma kolè mem do né ke madjang té lodè marè ang.

¹³ Tokou nè mpa tar kwaana medji ke siki, nè nda yéh ke dongor to konè, mbata né ke tél konè ke dé bouka to ngosiba ta goto.