Ebərəje 7 - Testament ke Siki 1960 (Kabba Laka)

¹ Mbata Melchisédec nèn, Mbaibé ke Salem, ndjè kòr lo Allah ke wota toï, tila kem Abraham tokou nè nao ntél loou té ke nao ntòl mbaibédjé té, ke nè mmar tar ke madji dè té.

² To nè ke Abraham òrou né arè, né kada mè né té ke dòkou lo né la toi. Ke dongor nè nto mbaibé ke gaté gaté tokou ria pa, gè té nè nto mbaibé ke Salem té to, yèn pana, Mbaibé mè woul.

³ Nè ke bèdjè ke këndjè ngoto, gel kèèdjédèdè goto, ke kounkoutou ndò la goto, aséh tébe la eo ang, a ndé darè nounda rò tokou Ngon lo Allah, nè nisi ndjè kòr ke ndò ke ndò.

⁴ Woidjé boui lo doou nèn, nè ke Abraham bòdjèdjè òrou né arè, né kada mè né té ke dòkou lo né kada kada ke noto doo té.

⁵ Dèdè ke horo ngandjé té lo Lévi ke daredè koula kòr, déh ke ta deo ndedji ta taa né kada mè né té ke dòkou dji dooudjé té, yèn pana, dji ngaköè té lé tokou dèdè nto dooudjé ke gel Abraham té to.

⁶ A doou nèn ke to noudjoudè ke kadaba ang, inga né kada mè né té ke dòkou dji Abraham té, ke nè nòrou ndou dò nè té ke néh ke tar né ke Allah tò.

⁷ To tar maina ang, ke nè ke boui nòrou ndou do nè té ke ngadji.

⁸ Ke nèn, dèdè ke mbòn né kada mè né té ke dòkou to dooudjé ke ase kwoei, ke nou, to nè ke mpa tar nadji la ke nè nisi tébe.

⁹ Dase ta pa, Lévi ndja ke mbòn né darè, ouka né mbòn to deo té lo Abraham.

¹⁰ Mbata Lévi nai mè bèdjè té bai tokou Melchisédec tila kem Abraham.

¹¹ Tokou né ke ase toï ase dé deo koula kòr té lo Lévi, mbata to deo koula té nèn ke dooudjé inga tar ndedji, mbata di a ndiki mare ndjè kòr ta kï ase deo té lo Melchisédec, a ase deo té lo Aaron ang wa?

¹² Mbata tokou ntourou koula kòr, dase ta tourou tar ndedji tokou ban tò.

¹³ Mbata nè ke dèdè mpa tar nèn dè té, nè nto doou ke gelè dang, ke geldè kada da koula do bann té ang.

¹⁴ Mbata dase ta geré Mbaibé Seigneur lodjè téh gel Juda té, gel dooudjé té ke Moïse pa tar ndjè kòr dodè té kada ang.

¹⁵ Dase geré yèn madji wota, tokou mare ndjè kòr ï ase deo té lo Melchisédec,

¹⁶ Nè ke doundè to ndjè kòr ke to deo tar ndedji té, ke da rò té ang, a deo singa té lo tébe ke ase ta toudjou ang.

¹⁷ Mbata mpa tar nadji nèn dè té, I to ndjè kòr ke ndò ke ndò, ase deo té lo Melchisédec.

¹⁸ Tokou ban er té ke kada, dare tar ndedji ke dongor oso nange mbata singè goto, ke mbata nase ta da né kada ang,

¹⁹ Mbata tar ndedji da né ase kada ang, a er té ke marè, dare tar mè ngebe ke madji wota, ke deoè té djèdjè ndé ngosiba ke Allah.

²⁰ Nda né nèn ba ang sè deo koubou yo té.

²¹ Dèdè ke dongor ke doundadè to ndjè kòrdjé, ntaa koula kòr ke koubou yo ang, a nè nèn, doubou yo dè té deo té lo nè ke mpana, Mbaibé Seigneur oubou yo mbä, ke nè na tourou ndouè ang, I to ndjè kòr ke ndò ke ndò.

²² Deo yèn té, Jésus to ndjè kare tar kwaana medji ke madji wota.

²³ Ndjè kòrdjé ke leo to baya baya, mbata yo òkoudè dèdè disi ke ndò ke ndò ang.

²⁴ Mbata nè nisi ke ndò ke ndò, nè néh ke koula kòr ke marè mbelè kendé ang.

²⁵ Mbata yèn, nè nase ta kadji ke ndò toï dèdè ke ndé ngosi ke Allah deo té la, mbata nè nisi tébe ke ndò ke ndò ta doudjou Allah mbata lodè.

²⁶ Mbata to madji mbata lodjè ta kéh ke tokou ndjè kòr tokou ban, ke to madji toï ke tar kada dè té ang, ke yèdo kada ang, ke nkai rè ke ndjè da né ke madjang, ke darè nï tarr nouta dara.

²⁷ Nè nto dang ke mare tokou ndjè kòrdjé, mbata nè nase ta nounga né pouro ke ndò ke ndò ang, mbata né ke madjang la ndja dongor ang, gè té mbata lo dooudjé ang, mbata nè nda gar kada mbata ndò toï, ndò ke nè nare rè ndja.

²⁸ Mbata tar ndedji ounda dooudjé ke ndjè kòrdjé, dèdè ke déh ke mongou ang, a tar koubou yo ke dé gè té goukoudang, ounda ngon ke dé ase toï mbata ndò ke ndò.