Ebərəje 6 - Testament ke Siki 1960 (Kabba Laka)

¹ Mbata yèn, ase kare djïya gel né tòdjou ke dongor tar lo Christ, djao kèté ta dé kase tòkou doou, ta tél ta da gòl tar mbeté kedji dò koula yo té ang, ke dò ko mè té ke Allah.

² Ta tòdjou tar baptême, tar kila dji do té, tar kï mè bwa yo té, tar saria ke ke ndò ke ndò.

³ Yèn to né ke dja da tokou Allah ndiki.

⁴ Mbata dèdè ke tar lo Allah ndokoo kemdè té dongor mbä, ke dèdè nnaa né kare ba ke dara, ke nnaa né lo Ndil ke madji toï,

⁵ Ke dèdè ke nnaa né ke madji tar lo Allah, ke do singa bal ke ao dé,

⁶ Tokou dèdè ntél doso, a kase ta téldè ta karedè mbeté kedji né da ke madjang ang, mbata dèdè ntòl Ngon lo Allah kake dèse té mbata lodè ndja, ke dila ròkoul kèmè té no dooudjé té.

⁷ Mbata nange ke aih man ndi ke oso dè té gar baya, ouba kamnai mbata dèdè ke ndoo nange mbata lodè, nange ke ban inga madji lo Allah.

⁸ A tokou nè nouba konn ke kourengangeya, doè tokou né kada ang ke néh ngosiba ta kinga tadji, ke gelè to ta kare pourou öè toï.

⁹ A lé tokou djèdjè mpa tar ban, sésè ke ndikisè nya, djèdjè ngebe né ke madji wota mbata losè, né ke to ngà kadji.

¹⁰ Mbata Allah to doou ke gatang ang ta kare mèa woei do koula té losè, ke do ndiki té ke sésè etòdjidjé mbata ria ndja, deo koula té ke sésè edaidjé mbata ndjè ko mè tédjé, ke naidjé ta da tokou ban.

¹¹ Djèdjè ndiki ta kare sésè kada kada toï tòdjou né da ke madji ban, ta ngem mè ngebe sar ndò té ke goukou.

¹² Baa ta kare sésè edaidjé dabe ang, a ta ndadji dèdè ke dinga né ndouba, deo ko mè té ke mè ke ïya ang.

¹³ Mbata tokou Allah to Abraham, mbata Allah ase koubou yo ke mare ri né ke wotè ang, nè noubou yo ke ria ndja.

¹⁴ Nè mpana, Tokoro ma ma bar tar dòi té, ke ma ma kare geli dé baya nya.

¹⁵ To tokou ban, mbata Abraham ngem ke mè ke ïya ang, nè ninga né ke mpa tarè.

¹⁶ Dooudjé oubou yo ke ri né ke wotadè, ke koubou yo to dòbon né ke to do tar maina horodè té.

¹⁷ Mbata yèn, tokou Allah ndiki ta tòdjou ndjè kwaa né ndouba né ke nè nto tarè gaté gaté wota, ke né ke nè ndiki nase ta tourou ang, nè noubou yo dè té.

¹⁸ Baa ta kare deo té lo né djo nèn ke ase tourou ang, ke Allah ase ta kere ngem kendé ang, djèdjè ke djaïn loou ngem ròdjè té, ta kare djinga singa rò kwoei ang, ta kwaa tar mè ngebe ke dounda nodjè té.

¹⁹ Djèdjè djéh ke mè ngebe nèn tokou né ke waa kem lodjè ngeng ke yè ang, mè ngebe nèn ande loou ke giri koubou té.

²⁰ Loou té ke Jésus ande kendé mbata lodjè, tokou ndjè koula ke ao kèté, mbata nè ndé to tokou ndjè kòr mbata ndò ke ndò, ase deo té lo Melchisédec.