Ebərəje 5 - Testament ke Siki 1960 (Kabba Laka)

¹ Mbata tokou ndjè kòrdjé kada kada ke mberedè horo dooudjé té, ke doundadè ta da né mbata dooudjé deo té lo Allah, baa ta kare né kare ba ke né ta nounga pouro mbata né ke madjang.

² Nè nase ta da ke mè madji ke ndjè ke geré né ang ke ndjè ke ndem deo, mbata nè ndja nè mongou ang to.

³ Mbata né nèn, nè nase nounga né pouro mbata né ke madjang la ndja, ke mbata ngä dooudjé to.

⁴ Doou kada ndoi rè ndja ke piti nèn ang, sè tokou Allah barè deo kadaba tokou Aaron.

⁵ Tokou ban to, Christ ndoi rè ndja ang ta dé to tokou ndjè kòr, a nè ke noundè to nè ke mpa narè, I to Ngonem, ma moudji bokonè.

⁶ Deo kadaba tokou nè mpa mare loou té to, I to ndjè kòr ke ndò ke ndò, Ase deo té lo Melchisédec.

⁷ Ndò té ke nè néh mè da rè té, nè ndoudjou Allah ke nè nkoi nya, ke nourouki ke no ke man kem nare nè ke nase kadjè yo té, ke Allah wo tar la mbata mmelè.

⁸ Lé tokou nè nto Ngon, nè ngeré ta ko tar mbata né ndoo ke nè no.

⁹ Tokou nè ndé ase toï, nè ndé to ndjè gel kadji ke ke ndò ke ndò, mbata dèdè toï ke do tar la.

¹⁰ Allah barè tokou ndjè kòr ase deo té lo Melchisédec.

¹¹ Djèdjè djéh ke mare né nya ta pa do tar té nèn, ke to ngeng ta tòdjou gelè, mbata mbisè outou ta ko.

¹² Mbata bal baya leo ba to tar losè ta kase dé ndjè né tòdjou, a ase kare mare doou tél tòdjousè to ke siki gel né ke dongor lo tar lo Allah. Ase kare daresè mba, bo asidjé né kousa ke tòkou ang.

¹³ Mbata dèdè kada kada toï ke né kousa lodè to mba kadaba, déh ke kemkarè tar ke gaté gaté ang mbata dèdè nto ngandjé.

¹⁴ A né kousa ke tòkou to mbata tòkou dooudjé, mbata dèdè ke gousou geré né lodè deo da né té, ngeré ta gange né ke madji ke né ke madjang.