Ebərəje 4 - Testament ke Siki 1960 (Kabba Laka)

¹ Mbata yèn, ase kare djèdjè nda bel, mbata tokou tar kande loou kwaa rò té ke nè mpa nai bai, ta kare mare kada horosè té a dé to nè ke goukou ang.

² Mbata mpa tar ke madji daredjè deo kadaba tokou mpa daredè to, a tar ke dèdè do dadè madji kada ang, mbata dèdè ke do dòrè ke ko mè té ang.

³ Mbata djèdjè ke djo mèdjè té djande loou kwaa rò té tokou nè mpa, Deo kadaba tokou ma mpa ke mongou tokou mem öm leo, Dèdè da kande loou kwaa rò té lom ndò kada ang, lé tokou koula la ase mbä ke ndò da gòl nange nèn.

⁴ Mbata nè mpa tar ndò ke shiri mare loou té tokou ban, Allah waa rè ke ndò ke shiri da koula la toï.

⁵ Ke loou té nèn, nè mpa marè, Da kande loou kwaa rò té lom ndò kada ang.

⁶ Tokou ban, mbata ngem ta kare maredjé ande kendé, ke dèdè ke dinga tar ke madji kèté, doudè ta kande kendé mbata do mèdè té ang,

⁷ Allah tél toura mare ndò bai, Bokonè, gè té ndò baya ban nè mpa deo té lo David, deo kadaba tokou nè mpa dongor, Bokonè, tokou woidjé ndouè, aridjé mèsè ketere ang.

⁸ Mbata tokou Josué aredè dwaa ròdè, a lé Allah a pa tar mare ndò ke goukoudang ang.

⁹ Tokou ban ndò kwaa rò nai bai mbata dooudjé lo Allah.

¹⁰ Mbata nè ke nande loou kwaa rò té lo Allah, nè neo koula la deo kadaba tokou Allah eo ngë tò.

¹¹ Tokou ban ase kare djèdjè nda ngeng ta kande loou kwaa rò té nèn, baa ta kare mare kada oso ang, deo ko tar té ang tokou dèdè.

¹² Mbata tar lo Allah éh ke tébe ke singa, ate wota tokou kiaa ke ndë djo, nè nòsou ase ta kai kem ke ndii, ke ase ta kai mëre rò ke keme singa, nè ngange kedji ke né ke mè edji ta da.

¹³ Mare né kada ke nda yarè kèmè té ang, a né toï to daka, ke to ba kem nè té ke djase todjé tar lodjè.

¹⁴ Tokou ban, mbata djèdjè djéh ke tokou ndjè kòr boui wota ke ande mè dara té, Jésus Ngon lo Allah, ase kare djwaa ngeng tar ko mè té ke djèdjè mpa tarè.

¹⁵ Mbata djèdjè djéh ke mare tokou ndjè kòr ang ke ase ta da mè madji kedjè ang tokou singadjé goto, a nnèè mè né té toï deo kadaba tokou djèdjè, a nè nda né ke madjang kada ang.

¹⁶ Tokou ban, ase kare djèdjè ngese ngosi ke mè koso pon ngèndé tokou mè madji té, baa ta kinga mè madji ke ta kinga né ke oumadjè ndò té ke né doudjè.