Ebərəje 3 - Testament ke Siki 1960 (Kabba Laka)

¹ Tokou ban, ngakömdjé ke madji toï, sésè ke ingaidjé né deo bar té ke dara, woidjé Jésus, ndjè koula ke tokou ndjè kòr lo tar ko mè té ke djèdjè mpa tarè.

² Nè ke nto ndjè mè ndaa kaï ke noundè koula té, deo kadaba tokou Moïse to ndjè mè ndaa kaï mè kei té lo Allah leo tò.

³ A do Jésus ase kinga ndokoo wota Moïse nya, deo kadaba tokou doou ke da kei inga piti wota kei ndja.

⁴ Mbata kei kada kada to koula ke mare doou da, a nè ke nda né toï to Allah.

⁵ A Moïse to ndjè mè ndaa kaï mè kei té lo Allah toï tokou ngonlokisi, ke darè ta pa tar nadji né ke dase pa tarè ndò té ke goukoudang.

⁶ A Christ to ndjè mè ndaa kaï mè kei té lo Allah tokou ngon ndja. Ke djèdjè nto kei la, tokou djèdjè djwaa ngeng sar doutou ndò, ke mè koso pon ke mè ngebe ke djèdjè ndoi ròdjè kendé.

⁷ Mbata yèn, deo kadaba tokou Ndil ke madji toï pa, Bokonè, tokou sésè woidjé ndouè,

⁸ Aridjé mèsè ketere ang, tokou dèdè nda ndò mbeté tar té leo, ke ndò naa té ke mè kòr té.

⁹ Loou té ke bòsésè naam, ke dèdè do koula lom bal dòsò.

¹⁰ Mbata yèn mem öm ke gel dooudjé nèn, ma mpana, Mèdè ao madjang dang dang ke ndò toï, dèdè ngeré go deo lom ang.

¹¹ Deo kadaba tokou ma mpa tar ke mongou leo tokou mem öm, Dèdè da kande loou kwaa rò té lom kada ang.

¹² Ngakömdjé, ngemidjé madji, ta kare mare kada losè éh ke mè ke to madjang ke wo tar ang, ke aresè kaidjè ròsè ke Allah ke tébe.

¹³ A ndedjidjéna horosè té ke ndò toï, ke ndò toï ke dase pa bokonè, ta kare doou kada horosè té mèa ketere ang deo kere té ke madjang.

¹⁴ Mbata djèdjè ndé to ndjè kinga né ke Christ, tokou djèdjè djwaa ko mè té ke dongor ngeng sar doutou ndò.

¹⁵ Tokou nai bokonè, tokou sésè woidjé ndouè, aridjé mèsè ketere ang tokou nda ndò mbeté tar té leo.

¹⁶ Dèdè ke mbeté Allah gè té ke do ndouè to ndjè ke da wa? Sè to dèdè toï ke ntéh Egypte té deo té lo Moïse ang wa?

¹⁷ Ke ndjè ke da mèa öè kedè bal dòsò wa? Sè to dèdè ke nda né ke madjang ke nindè to mè kòr té ang wa?

¹⁸ Ke ndjè ke da nè mpa tar mongou, dèdè da kande loou kwaa rò té la ndò kada ang wa? Sè to dèdè ke mbeté ta ko tar la ang wa?

¹⁹ Tokou ban djèdjè djo dase ta kande mè té ang mbata ko mè té lodè goto.