Ebərəje 2 - Testament ke Siki 1960 (Kabba Laka)

¹ Mbata yèn, djèdjè djase ta ngem madji wota, né ke djèdjè djo mbata dòmadjang a na kikidjè.

² Mbata tokou tar ke angedjé pa to tar ke tokoro, ke tokou tar mbeté tar ndedji ke ta ko tar ang inga saria gaté gaté,

³ Djèdjè dja kaïn to di tokou djèdjè nda sa ke kadji ke boui ban wa? Mbaibé Seigneur ndja pa tar nèn dongor, ke dèdè ke do tarè mpa daredjè.

⁴ Allah ounda tar nadji deo kadaba to, deo né tòdjou té, ke né ke ta kare mè dooudjé ounda do bia, ke né mori dang dang, ke deo né kare ba lo Ndil ke madji toï ke nè nare ndjè ke mèa ndiki.

⁵ Mbata nange nèn ke ao dé ke djèdjè mpa tarè, Allah ïyè dji angedjé té ang.

⁶ Mare doou pa tar nadji mare loou té pana, Doou to to di baa ta kare ounda mei dè té wa, aséh ngon lo doou di baa ta kare etèè wa?

⁷ I doukou tar la ko angedjé té ngadji, mbata ndò kada kada, I ounda né ndokoo ke piti dè té, I arè ta ko do koula toï ke dji da.

⁸ I ongou né toï ko gòlè té. Deo kongou né toï dji doou té, Allah ïya né kada ke to dja té ang goto, a bashénè djèdjè djo né toï dja té ang bai.

⁹ A djèdjè djo Jésus, nè ke Allah doukou tar la ko angedjé té ngadji mbata ndò kada kada, nounda né ndokoo ke piti dè té mbata lo yo ke nè no ndooè, baa ta karè deo tokou mè madji té lo Allah, nè nase naa yo mbata dooudjé toï.

¹⁰ Mbata to madji mbata la, nè ke né toï to mbata la, ke né toï dé deo té la, ke nè ke ndé ke ngandjé baya ndokoo té, ta kare ndjè gel kadji lodè dé ase toï deo ko ndoo té.

¹¹ Nè ke nare dooudjé dé madji, ke dèdè ke ntéh ndé madji mbä, dèdè ntéh mè koubou té ke kadaba. Mbata yèn ròkoul dè ang ta bardè ngaköè.

¹² Nè mpana, A ma ma bar ri kare ngakömdjé, Ma ma piti horo ndjè té ke mbòna.

¹³ Ke marè, Ma ma kounda mem dè té. Ke marè, Ma méh nèn, ke ngandjé ke Allah arem.

¹⁴ Tokou ban mbata ngandjé éh ke da rò ke mese, nè ndja ntaa da rò deo kadaba to, baa ta kare deo yo té nè nase toudjou nè ke néh ke singa lo yo, yèn pana Satan.

¹⁵ Ke ta kòrou dèdè toï ke nto beredjé ndò tébe té lodè, mbata déh ke bel yo.

¹⁶ Mbata tokoro to angedjé ke nè noumadè ang, a to gel dooudjé lo Abraham.

¹⁷ Mbata yèn nè nase ta dé tokou lo ngaköèdjé ke né toï, baa ta kare nè nase dé tokou ndjè kòr ke mè madji ke mè ndaa kaï koula té lo Allah, ta kouka né mbata né ke madjang lo dooudjé.

¹⁸ Ke mbata nè ndja no ndoo mè né kere té ke nèè leo, nè nase kouma dèdè ke né kere naadè.