Ebərəje 13 - Testament ke Siki 1960 (Kabba Laka)

¹ Ase kare ndiki ngokö eo ang.

² Ïyaidjé ta da mè madji ke ndjè mbaadjé ang, mbata deo da ban, maredjé are loou to angedjé ke dèdè ngeré ang.

³ Olidjé mèsè do ndjè té ke to kei koula té, deo kadaba tokou sésè etoidjé tokou lo ndjè kei kouladjé kedè, ke dèdè ke ndadè madjang, mbata sésè éhdjé ke da rò to.

⁴ Ase kare ngem tar taa dènè madji horosè té toï, ke ase kare twa dènè dé madjang ang, mbata Allah a gange saria ke ndjè to loou to madjang ke ndjè kaiyadjé.

⁵ Oundaidjé mèsè do ndiki narè té ang, isidjé dèkèkè ke né ke éhdjé né, mbata Allah ndja pana, Ma ma mbeté ta da sei ang, ke ma ma kïyai ndò kada ang.

⁶ Mbata yèn, djase pa ke mè koso pon, Mbaibé Seigneur to ndjè koumam, ma ma bel ang, doou ase ta da di sem wa?

⁷ Olidjé mèsè do ndjè ke tòdjousè deo, dèdè ke mpa tar lo Allah daresè, woidjé gel tébe lodè, ndadjidjé ko mè té lodè.

⁸ Jésus Christ to deo kadaba takenè, ke bokonè, ke ndò ke ndò.

⁹ Aridjé tar dang dang ke tar kòbou tourou mèsè ang, mbata to madji ta kare mè dé ngeng deo tokou mè madji té, deo mourou té ang, ke da né kada ang ke ndjè ke ounda mèdè kendé.

¹⁰ Djèdjè djéh ke bann, ke ndjè ke da koula mè kei koubou té ase ta kön mourou kendé ang.

¹¹ Mbata rò dadjé ke tòkou ndjè kòr ao ke mesedè loou té ke madji toï to né polo, mbata né ke madjang, ënro ke pourou giri béh té.

¹² To tokou ban Jésus wo ndoo giri béh té, baa ta kare dooudjé téh ta dé madji deo mese té la.

¹³ Tokou ban aridjé djao rè té giri béh té, djoto tadji deo kadaba sa.

¹⁴ Mbata djèdjè djéh ke béh nange nèn ke to ndò toï ang, a djèdjè nsange yéh ke ao dé.

¹⁵ Deo té la ase kare djare né polo kòsou gadji Allah ke eo ang, yèn pana, kandé piti ke tadjè té ke bar ria.

¹⁶ Eoidjé ta da mè madji ang, ke eoidjé ta kare né ang, mbata né polo tokou ban nèl Allah nya.

¹⁷ Woidjé tar lo ndjè ke tòdjousè, ke edaidjé tokou ndoudè pa, mbata dèdè disi ta ngem kem losè tokou dooudjé ke ase ta tòdjou gel tarè. Aridjédè nda ban ke rònèl, ke ongou ang, mbata yèn to madji mbata losè kada ang.

¹⁸ Edoudjidjé Allah mbata lodjè, mbata djèdjè ngeré djéh ke kedji né geré ke madji, ke djèdjè ndiki ta da madji mè né té toï.

¹⁹ Mam ndoudjousè nya wota ta da ban, baa ta karem ntél ròsè té ke tòkè.

²⁰ Ase kare Allah ke ndjè mè woul ke are Mbaibé lodjè Jésus tél ï mè bwa yo té, ke to tòkou ndjè koul batidjé, deo té lo mese kwaana medji ke ke ndò ke ndò,

²¹ Aresè né ke madji toï ta da tokou mèa ndiki, ke nda mèsè té né ke to madji kèmè té deo té lo Jésus Christ, nè ke ndokoo to la ke ndò ke ndè. Amen.

²² Mam ndoudjousè nya, ngakömdjé, ta kourè woursè do tar ndedji té nèn, mbata mam nda maketourou maresè ke tar baya ang.

²³ Sésè egeridjé dïya ngoködjè Timothée ta kao ba, tokou nè ndé ndjange, ma djè sa dja kao kosè.

²⁴ Edaidjé laphia ndjè tòdjousè deo toï, ke ndjè ko mè tédjé toï. Ndjè ke Italie dasè laphia.

²⁵ Tokou mè madji éh kesè toï. Amen.