Ebərəje 12 - Testament ke Siki 1960 (Kabba Laka)

¹ Tokou ban, mbata tar nadji nya ban dibidjè tokou ndi ke il, ase kare djïya né koto ke né ke madjang ke dadjè mborang, ase kare djèdjè djaïn ke deo ke to nodjè té ke mè ke enge ang.

² Djounda kemdjè do Jésus té, nè ke nto ndjè gel tar ko mè té, ke ndjè da ase toï, nè ke no ndoo kake dèse té mbata rònèl ke to nèè té, nè no ròkoul to né ang, ke nè nisi do dji kòl ngèndé té lo Allah.

³ Woidjé nè ke nourè wourè mbeté té ke ndjè da né ke madjang da sa nya, baa ta kare ròsè yäsè ke mèsè enge ang.

⁴ Deo dòò té ke né ke madjang, sésè arridjé ta mbeté sar mese téh ang bai.

⁵ Ke mèsè woei ndedji té ke ndedjisè tokou ngandjé wa? Ngonem, wo ndedji tounda lo Mbaibé Seigneur to né ke ba ang, are mei ïya ang tokou nè ndangi.

⁶ Mbata Mbaibé Seigneur ndange doou ke nè ndikè, ke nè ntounda dèdè toï ke ntaadè to nganè.

⁷ Tar ndange to ta karesè wouridjé mèsè ngeng. Allah da kesè tokou ngandjé, mbata ngon ke da ke bèdjè ndangè ang wa?

⁸ Tokou sésè ingaidjé tar ndange ang, ke dooudjé toï inga, sésè etoidjé to ngan keidjé, etoidjé to ngandjé ke tokoro ang.

⁹ Deo kadaba ke tar nèn, djèdjè djéh ke bòdjèdjè ke nange nèn leo ke ndangedjè ke djèdjè mmeldè. To tar lodjè ta ko tar lo Bò ndildjé wota ang wa ke ta kisi ke tébe?

¹⁰ Mbata dèdè ndangedè ndò kada kada tokou dèdè do ase, a Allah ndangedjè ta dadjè madji, baa ta kare djinga né ke madji la toï.

¹¹ Ndò kinga ndange toï to tokou né ongou, to né koukou ang, gè té nan kandé mè woul gaté gaté mbata dèdè ke ngeng deoè té.

¹² Tokou ban ounidjé djisè ke ounda, ngengidjé do mekedjé gòlsè té ke mongou ang.

¹³ Edaidjé deo gaté gaté mbata gòlsè, baa ta kare to singa gòl ke mete mboi ang, a ta kare dé madji.

¹⁴ Edaidjé ta kisi ke mè woul ke dooudjé toï ke mè ke madji toï, mbata doou ke éh né ang a ko Mbaibé Seigneur ang.

¹⁵ Ngemidjé madji ta kare tòkou mè madji lo Allah dou doou kada ang, ke ta kare ngira mè katé käng téh ang, ke are tar ï, ke maredjé nya dé madjang deoè té.

¹⁶ Ta kare doou kada to ndjè kaiya aséh ndjè mbeté Allah ang, tokou Esaü ke ndoko dere la mbata mourou ke kaa kada.

¹⁷ Mbata sésè egeridjé, goukoudang tokou nè ndiki ta kinga kòrou ndou ke madji, mbeté darè mbata nè ninga deo ta tél tourou kedji né da ke madjang la ang, lé tokou nè nsangè ke man kèmè.

¹⁸ Sésè edéidjé ngosi ang ke tokou err ke dase naa, ke ndò pourou nya, ke londoul, ke lodibi ke tokou lél,

¹⁹ Ke bar lo tebe narè, ke ndou ke pa tar, dèdè ke do tar nèn ndoudjou nya ta kare mpa marè daredè ang.

²⁰ Mbata dèdè dase ko tar nèn ke mpa kedè ang, lé tokou da kada òrou tokou err nèn, da tilè ke err.

²¹ Né nèn ke do to ngeng nya, Moïse pana, Rom isa ke bel.

²² A sésè edéidjé ngosi ke tokou err Sion, ke béh té lo Allah ke tébe, Jérusalem ke dara, ke ngosi ke angedjé ke dase toura ang ke mbona ta ndam,

²³ Ke ngosi ke ndjè ke mbòna ke to ngan deredjé ke nda ridè dara, ke ngosi ke ndjè gange saria ke to Allah lo dooudjé toï, ke ngosi ke ndii lo dooudjé ke gaté gaté ke dé ase toï.

²⁴ Ke ngosi ke Jésus, ndjè moso tar kwaana medji ke siki, ke ngosi ke mese ke ntousou ke pa tar madji wota mese Abel.

²⁵ Ngemidjé mbata mbetidjé nè ke mpa kesè ang, mbata tokou dèdè daïn saria leo ang, tokou dèdè mbeté nè ke ndedjidè nange nèn, djèdjè dja kaïn ngadji goto tokou djèdjè mbeté nè ke mpa tar loou té ke dara.

²⁶ Nè ke ndò té ke nou, ndouè yè nange, a bashénè nè mpa, Ma ma kare nange yè mare gar kada bai ke kadè ang, a dara to.

²⁷ Tar nèn ke pana, mare gar kada, tòdjou tourou lo né ke yè né ke nda mbä, baa ta kare né ke yè ang ase karr.

²⁸ Mbata yèn, ase kare djèdjè nda woio mbata djèdjè djinga béh ko ke ase yè ang, tokou ban ase kare nda ke Allah deo té ke ase kèmè ke piti ke bel.

²⁹ Mbata Allah lodjè to pourou ke ö né toï.