Ebərəje 11 - Testament ke Siki 1960 (Kabba Laka)

¹ Bana ko mè té to né ke mè oso pon kendé, né ke djèdjè ngebe, to ta geré tokoro né ke djèdjè djo ang.

² Mbata ke deoè té dooudjé ke leo inga tar nadji ke madji.

³ Deo ko mè té, djèdjè ngeré nda nange deo tar té lo Allah, tokou ban né ke kem wo nda ke né ke téh kem dooudjé té ang.

⁴ Deo ko mè té, Abel are Allah né polo ke madji wota Caïn, deoè té Allah pa tar nadji la ke nè nto gaté gaté, mbata nè ndiki gè ke né kare ba la. Nè noei, a deo ko mè té la nè nai mpa tar.

⁵ Deo ko mè té, dòrou Énoch ke tarr, ke nè no yo ang, ke doè ang mbata Allah orè, mbata dongor baa dòrè, nè ninga tar nadji ke nè nto madji kem Allah té.

⁶ Tokou ko mè té goto, ase ta dé madji kem Allah té ang, mbata doou ke ndiki ta dé ngosiba ke Allah, nase ta ko mèa té ke nè nisi ke nè nto ndjè kouka dèdè ke nsangè.

⁷ Deo ko mè té, bel da Noé tokou Allah ndedjè do né té ke kem wo ang bai, nè ntòl to ta kadji noudjoudjé la, deoè té nè ngange saria do nange té nèn, ke nè ndé ndjè kwaa né ndouba né ke gaté gaté ke dé deo ko mè té.

⁸ Deo ko mè té, tokou Allah bar Abraham ta kao loou té ke nè na kinga to né ndouba, nè no tar, nè nao loou té ke nè ngeré ang.

⁹ Deo ko mè té, nè nda béh nange té ke Allah tòè, ke to tokou nange la ndja ang. Nè nto kei koubou té ke Isaac ke Jacob, ndjè kwaa né ndouba ke ntòdè sa naaté.

¹⁰ Mbata nè ngebe béh ke gòlè arr ngeng, ke Allah to ndjè kodjè ke ndjè dè.

¹¹ Deo ko mè té, Sara ndja inga singa ta kwaa sem tokou bal koudjou la ndai mbä, mbata nè no ndjè tòè to ndjè mè ndaa kaï.

¹² Tokou ban deo té lo doou kada, ke rè to tokou woei mbä, oudjou gel dooudjé baya baya tokou ndètélendèdjé ke dara, ke tokou nangara ke kare tokou man katé té ke ase ta toura ang.

¹³ Dèdè nèn toï doei ke ko mè té, tokou dèdè nai dinga né ke ntòdè kendé ang bai, a dèdè do ke ndiki gè ke né ke to ndeo. Dèdè mpana dèdè nto ndjè mbaadjé ke ndjè kase loou do nange té nèn.

¹⁴ Mbata dooudjé ke pa ban, tòdjou ke dèdè nsange béh mbata lodè ndja.

¹⁵ Tokou dèdè dedji nange ke dèdè ntéh kendé, a lé dase ta tél.

¹⁶ A bashénè dèdè ndiki béh ke madji wota, yèn pana béh ke dara. Mbata yèn Allah éh ke ròkoul ang tokou dèdè mmarè Allah lodè, mbata nè nda béh naredè.

¹⁷ Deo ko mè té, tokou nnaa Abraham, nè nare Isaac to né polo, nè ke ninga tar ke tòè kendé, ndiki ta kare ngonè ke kadaba to né polo.

¹⁸ Nè ke mpa tar la, Da bar gel dooudjé loi deo té lo Isaac.

¹⁹ Nè nedji Allah ase kare dooudjé ï mè bwa yo té, bana ntél ningè tokou lo nï mè bwa yo té.

²⁰ Deo ko mè té, Isaac òrou ndou do Jacob té ke Esaü mbata né ke madji ke a dé.

²¹ Deo ko mè té, tokou Jacob ao ta kwoei, nòrou ndou do ngan lo Joseph té kada kada, nè ndoudjou Allah tokou nè ndoukou do kake té la.

²² Deo ko mè té, tokou ndò kwoei lo Joseph nai ngosiba, nè mpa tar téh lo ngandjé lo Israël, ke naredè tè mbata ninè.

²³ Deo ko mè té, tokou doudjou Moïse, bèdjè ke këndjè diyèè nnè mouta, mbata dèdè doè nè nto ngon ke koura, ke dèdè nda bel tar lo mbaibé ang.

²⁴ Deo ko mè té, tokou nè ndé tokou, nè mbeté ta kare mmarè ngon lo ngon ke dènè lo Pharaon.

²⁵ Nè ndiki nya ta kinga ongou ke dooudjé lo Allah wota ke ta kinga koukou mbata ndò ngadji mè né té ke madjang.

²⁶ Nè no né tadji ke ninga mbata Christ to né kinga ke boui wota né kinga ke Egypte té, mbata nè ngebe kouka la.

²⁷ Deo ko mè té, nè nïya Egypte, nè mmel ongou lo mbaibé ang, nè nwaa ngeng tokou doou ke wo nè ke kem wo ang.

²⁸ Deo ko mè té, nè nda Pâque ke ntousou mese, baa ta kare ndjè toï doou òrou ngan deredjé ke Israël té ang.

²⁹ Deo ko mè té, dèdè ngange ba ke kasè tokou nange ke ai, a Egyptiendjé tokou dèdè ndiki ta gange deo kadaba to, man waadè.

³⁰ Deo ko mè té, ndooko ke Jéricho té ounda nange gè té ke ngoukou karè ndò shiri.

³¹ Deo ko mè té, Rahab, dènè kaiya woei ang ke dooudjé ke mbeté tar, mbata nè ntaa ndjè baädjé ke madji.

³² Ma ma pa mare tar di wa? Mbata ndò lom ase ang ta pa tar lo Gédéon, lo Barak, lo Samson, lo Jephté, lo David, lo Samuel, ke lo prophètedjé.

³³ Ke deo ko mè té, dèdè ndai béh ko nya ke singa, dèdè nda né gaté gaté, dèdè dinga né ke ntòdè kendé, dèdè dòkou kil namdjé.

³⁴ Ntòl ndò pourou ke ngeng, daïn ndò kiaa ke até, dinga singa loou té ke dèdè mongou té ang, dèdè ngeng doo té, ntouba doo lo ndjè kembaadjé.

³⁵ Dènèdjé inga nindè deo kï mè bwa yo té. Maredjé wo né ndoo ongou nya, ke dèdè mbeté ta téh kendé, baa ta kinga kï mè bwa yo té ke madji wota.

³⁶ Maredjé wo ndoo koukou ke ndoo ndei, ke koula narè ke kei koula.

³⁷ Ntiladè ke err, doudjadè ke narè koudja kake, ntòldè ke tokou kiaa, dèdè ndja loou té dang dang ke ngira batidjé ke ngira biandjé ròdè té, né kinga lodè goto toï, né ongou dadè, ndadè madjang.

³⁸ Nange nèn asedè ang, dèdè ndja mè kòr té dang dang horo tokou err té, ke bolo err té ke boudja té.

³⁹ Dèdè nèn toï, mpa tar nadji lodè madji mbata ko mè té, sè dinga né ke ntòdè kendé ang bai,

⁴⁰ Mbata Allah da né ke madji wota mbata lodjè, baa ta kare dèdè ndé dase toï ang tokou djèdjè djéh kedè ang.