Ebərəje 10 - Testament ke Siki 1960 (Kabba Laka)

¹ Mbata tar ndedji to to ndii né ke madji ke ao dé, ke nè nto né ke tokoro nèn ang, nè nase ndò kada ang deo né polo té ke dare bal ke bal ta kare dèdè ke ndé ngosiba ta dé kase toï.

² Tokou yèn ase, dèdè dïya ta nounga né pouro ang wa? Tokou dèdè ke ndoudjou Allah ntoko ase gar kada, dèdè déh ke kedji geré né ke madjang mare bai ang.

³ Ke mè né polo té nèn mèdè olè do né ke madjang té bal ke bal.

⁴ Mbata mese boro mangedjé ke biandjé ase ta kòrou né ke madjang ang.

⁵ Mbata yèn, tokou Christ dé nange nèn, nè mpana, I ndiki né polo ke né kare ba ang, a i da rom arem.

⁶ I inga rònèl né té ke nounga pouro ang, ke né ke dare mbata né ke madjang ang.

⁷ Bana ma mpa, Wo, mam ndé ta da tokou mei ndiki, O Allah, deo kadaba tokou nda tar lom maketourou té ke dourou naaté.

⁸ Tokou nè mpa ke dongor, I ndiki, aséh inga koukou né polo té ang, ke né kare ba, ke né nounga pouro, ke né ke dare mbata né ke madjang, né nèn ke dare deo té lo tar ndedji.

⁹ Gè té nè mpa marè, Wo, mam ndé ta da tokou mei ndiki. Nè ntoudjou yéh ke dongor ta da yéh ke djo.

¹⁰ Mbata deo ndiki té nèn, djèdjè ntéh daka né té ke madjang, deo kare rò lo Jésus Christ gar kada mbata toï.

¹¹ Ndjè kòrdjé kada kada arr ndò ke ndò ta da koula lodè, ta kare né polo ke kadaba gar baya baya, ke ase kòrou né ke madjang ndò kada ang.

¹² A tokou Christ are né polo kadaba mbata né ke madjang ase ndò toï, nè nao nisi do dji kòl Allah té.

¹³ Nè ngebe loshénè sar nda ndjè kembaadjé la karedè ndé to né kongou gòlè.

¹⁴ Mbata deo né polo kadaba, nè nda dèdè ke ntéh daka dase mbata ndò toï.

¹⁵ Ke Ndil ke madji toï pa tar lodjè to, mbata gè té nè mpa,

¹⁶ Yèn to tar kwaana medji ke ma ma da kedè go ndò tén, Mbaibé Seigneur pa, ma ma kila tar ndedji lom mèdè té, ke ma ma da tokou maketourou kedji té lodè.

¹⁷ Gè té nè mpa marè, Ma ma kolè mem do né ke madjang té ke tar mbeté tar ndedji lodè marè ang nga.

¹⁸ Loou té ke dïya né ke madjang, dèdè mpolo né mbata né ke madjang marè ang.

¹⁹ Tokou ban, ngakömdjé, mbata djase kande loou té ke madji ke bel ang, deo mese Jésus té,

²⁰ Deo té ke siki ke tébe, ke nòrou mbata lodjè deo té lo tokou koubou, yèn pana, deo té lo da rè ndja,

²¹ Mbata djèdjè djéh ke tokou ndjè kòr ke doundè kei té lo Allah,

²² Ase kare djèdjè ndé ngosiba ke mè ke tokoro, ke dousou ke ko mè té, ke mè ke ntoko kedji ke madjang ke dang, ke rò ke ntoko ke man ke madji.

²³ Ase kare djwaa ngeng tar mè ngebe ke djèdjè mpa, mbata nè ke todjè nto ndjè mè ndaa kaï.

²⁴ Ase kare djounda mèdjè dòna té ta ndedjina horodjè té ta ndiki, ke ta da koula ke madji.

²⁵ Ase kare djïya ta mbòna ang, tokou maredjé ao da, ndedjina horodjè té, ke ta da wota nya tokou sésè woidjé ndò lo Christ ao dé ngosi.

²⁶ Mbata tokou mèdjè ndiki ta da né ke madjang gè té ke djèdjè ngeré tar ke tokoro, mare né ta polo mbata né ke madjang goto.

²⁷ A bè kadaba to ta ngebe saria ke ngeng, ke tokou pourou ke a kö ndjè kembaadjé.

²⁸ Doou ke mbeté tar ndedji lo Moïse woei ke nda mè madji sa ang, deo tar nadji té lo dooudjé djo aséh mouta.

²⁹ Edjidjé ang ke da gange saria ngeng wota do doou té ke ouba Ngon lo Allah ke gòlè, ke wo mese tar kwaana medji ke dè madji to né ke ba, ke nè ntadji Ndil tokou mè madji wa?

³⁰ Mbata djèdjè ngeré nè ke mpa, Baange to lom, ma ma tél kouka. Ke marè, Mbaibé Seigneur a gange saria lo dooudjé la.

³¹ To né ke ngeng nya ta koso dji Allah té ke tébe.

³² Oundaidjé mèsè dò ndò té ke dongor, ndò gè té ke sésè woidjé tar lo Allah, tokou sésè waaidjé ngeng tokou né ongou té.

³³ Ke er kada ndasè to né tadji ke ongou, ke er kada sésè edaidjé ke dooudjé ke inga ongou ke ban to.

³⁴ Mbata sésè edaidjé mè madji ke ndjè kei kouladjé, ke ndikidjé gè ke rònèl tokou ntaa né losè ba, mbata sésè egeridjé ke sésè ndja éhdjé ke né ke madji wota, ke to ke ndò toï.

³⁵ Tokou ban ïyaidjé mè koso pon losè ang, ke éh ke kouka nya.

³⁶ Mbata sésè asidjé kisi ke mè ke enge ang, baa ta da né ke mè Allah ndiki, ke ta kinga né ke Allah tòsè.

³⁷ Mbata nai ngadjiba, nè ke nata dé na dé, nè na ngebe gè eo ang.

³⁸ A doou ke gaté gaté lom a kisi ke tébe deo ko mè té, a tokou nè ntél goukou, kem lom inga koukou mèa té ang.

³⁹ A djèdjè nto lo dèdè ke ntél goukou ang ta nai, a nto lo dèdè ke déh ke ko mè té ke adji kem lodè.