Apocalypse 9 - Testament ke Siki 1960 (Kabba Laka)

¹ Ange ke mi kòl tebe narè la, ma mo ndètélendè kada ï dara oso nange, darè klélé ta tokou bwa ke soürè goto.

² Nè nòrou ta tokou bwa ke soürè goto, sa pourou téh tè té tokou sa pourou ke ö nya, kade ke lél ndoul deo té lo sa ke téh ta bwa té nèn.

³ Ebètèdjé téh mè sa té nèn dase do nange, daredè singa tokou singa lo ïdjé ke nange nèn.

⁴ Mpa daredè ta da madjang ke mou ke nange ang, aséh ke kamnai aséh kake kada ang, a bè to dooudjé ke éh ke né lo Allah ke nto natenòdè té ang.

⁵ Daredè ta dadè to ndoo nnè mi, a ta tòldè ang, ndoo ke dèdè dare to tokou ndoo lo ï tokou nè nouta doou.

⁶ Ndò té ke nou, dooudjé a sange yo a da ko yo ang, dèdè da ndiki ta kwoei a yo a kaïndè deo eo.

⁷ Ebètèdjé nèn to tokou soundadjé ke ndadè mbata dòò, né to dodè té ke to tokou djòkedò lor, nòdè to tokou nò dooudjé.

⁸ Bi dòdè to tokou bi do dènèdjé, ngangedè to tokou ngange namdjé.

⁹ Déh ke der tokou der narè, boula bakedè to tokou boula sounda pousse poussedjé nya ke aïn ke dòò té.

¹⁰ Déh ke bongedè tokou bonge ï ke ngao bongedè, singa lodè ta da madjang ke dooudjé nnè mi to bongedè té.

¹¹ Déh ke mbaibé dodè té kada ke to ange lo tokou bwa, ria na Hébreu na Abaddon, ke Grec na Apollyon.

¹² Ongou ke dongor ndai mbä, wo, ongou djo nai ta dé gè té.

¹³ Bana ange ke misä kòl tebe narè la, ma mo ndou téh mè tebe té sò do bann lor té ke to no Allah té.

¹⁴ Mpa nare ange misä ke éh ke tebe narè, Etoutou angedjé sò ke ntòdè kare tòkou ba Euphrate té.

¹⁵ Tokou ban ntoutou angedjé sò nèn ke ngemdè mbata kade, ndò, nnè ke bal, baa ta kare ntòl dooudjé er kada ke dana mouta.

¹⁶ Baya lo ndjè sounda dòòdjé to dourou dòkou gar dourou dòkou gar djo, ma mo baya lodè.

¹⁷ Mo soundadjé tokou ban mè ni té lom, dèdè ke disi dòdè té déh ke der ke ndangè to tokou pourou ke hyacinthe ke koundou sa, dò soundadjé nèn to tokou dò namdjé, pourou ke sa ke koundou sa téh tadè té.

¹⁸ Deo né ndoo té mouta nèn, pourou, sa ke koundou sa ke téh tadè té, dèdè ntòl dooudjé er kada ke dana mouta.

¹⁹ Mbata singa lo soundadjé to tadè té ke bongedè té, bongedè to tokou lidjé ke éh ke dèdè, deoè tén ke dèdè nda né madjang.

²⁰ Kese dooudjé ke ntòldè deo né ndoo té nèn ang, dèdè mbeté koula ke djidè da ang, aséh dïya ta wal ndildjé ke madjang ang, ke kòrdjé ke to lor ke to narè ke ndaa ke to narè kasè ke to err ke kake, ke ase ta ko loou ang, aséh ta ko tar ang, aséh ta ndja ang.

²¹ Dèdè mbeté deo tòl dooudjé lodè ang, aséh deo kere ngem né ndön lodè ang, aséh loou to madjang lodè ang, aséh boukou lodè ang.