Apocalypse 7 - Testament ke Siki 1960 (Kabba Laka)

¹ Gè té nèn, ma mo angedjé sò arr er loou té sò ke nange nèn, dèdè dòkou lél er loou té ke sò ke nange nèn, baa ta kare lél kada ase koula do nange té aséh do tokou man té aséh do kake té kada ang.

² Bana ma mo mare ange ï loou té ke kade téh, néh ke né to lo Allah ke tébe, nè mpa ke ndou ke bar nya nare angedjé sò ke daredè singa ta toudjou nange ke tòkou man.

³ Nè mpana, Edaidjé nange aséh tòkou man aséh kake madjang ang sar djèdjè nto né natenò nganlokisidjé té lo Allah.

⁴ Ma mo baya lo dèdè ke ntòdè, dèdè ke ntòdè nto dourou dòdòkou gérè dourou dòsò ke dourou sò, dèdè ntéh horo gel dooudjé té toï lo ngandjé lo Israël.

⁵ Ntòdè dourou dòkou gérè dourou djo horo gel dooudjé té lo Juda, dourou dòkou gérè dourou djo horo gel dooudjé té lo Ruben, dourou dòkou gérè dourou djo horo gel dooudjé té lo Gad.

⁶ Dourou dòkou gérè dourou djo horo gel dooudjé té lo Aser, dourou dòkou gérè dourou djo horo gel dooudjé té lo Naphthali, dourou dòkou gérè dourou djo horo gel dooudjé té lo Manassé,

⁷ Dourou dòkou gérè dourou djo horo gel dooudjé té lo Siméon, dourou dòkou gérè dourou djo horo gel dooudjé té lo Lévi, dourou dòkou gérè dourou djo horo gel dooudjé té lo Issacar.

⁸ Dourou dòkou gérè dourou djo horo gel dooudjé té lo Zabulon, dourou dòkou gérè dourou djo horo gel dooudjé té lo Joseph, ntòdè dourou dòkou gérè dourou djo horo gel dooudjé té lo Benjamin.

⁹ Gè té nèn ma mo, ke wo, dooudjé baya baya mbona ke doou ase ta touradè ang, ntéh ke béh toï, ke gel dooudjé toï, ke dooudjé dang dang toï, ke ta dooudjé dang dang toï, dèdè darr nò ngèndé ko béh té ke nò Ngon bati té, doula koubou ke ndaa, ke barkem kake mar to djidè té.

¹⁰ Dèdè mpa ke ndou ke bar, Kadji to ngä Allah lodjè, nè ke nisi do ngèndé ko béh té, ke ngä Ngon bati.

¹¹ Angedjé toï ke arr mbòr ngèndé ko béh té ke mbòr boukadjé té ke dadjé ke tébe sò, dèdè doso natenòdè té no ngèndé ko béh té, ke dèdè nwal Allah.

¹² Dèdè mpana, Amen. Tar ke madji ke ndokoo, ke kemkarè, ke woio, ke piti, ke singa ke mongou to lo Allah lodjè ke ndò ke ndò. Amen.

¹³ Bana kada lo boukadjé pa arem, pana, Dèdè nèn nto na wa, ke doula koubou ke ndaa, dèdè dï da ndé wa?

¹⁴ Ma mpa marè, Ebemdjè, i geré. Nè mpa narem, Dèdè nto dèdè ke ntéh daka ke tokou né ndoo, dèdè ntoko koubou lodè ke ndadè daredè ndé ndaa ke mese lo Ngon bati.

¹⁵ Mbata yèn dèdè déh no ngèndé ko béh té lo Allah, ke dèdè nda sa kade rem tilti rem mè tokou kei Allah té, nè ke nisi do ngèndé ko béh té, nè na da kei koubou la dodè té.

¹⁶ Boo a dadè marè ang, aséh kounda man a ködè marè ang, kade aséh mare né ke nounga nya a koundadè ang.

¹⁷ Mbata Ngon bati ke éh horo ngèndé ko béh té a to ndjè kouldè, ke nè na kao kedè loou té ke dòman tébe té, ke Allah a bòrou man toï kemdè té.