Apocalypse 6 - Testament ke Siki 1960 (Kabba Laka)

¹ Ma mo tokou Ngon bati toutou né kada ke shiri ke ntò, ke ma mo kada lo dadjé ke tébe sò pa ke ndou ke bar tokou lo ndi ke ndange, pana, Edé.

² Ma mo, ke wo, sounda ke ndaa kada téh, ke nè ke nisi dè té néh ke giri, ke darè djòkedò, ke nè ntéh daka ke nda ke singa, ke nao ta ndai ke singa.

³ Tokou nè ntoutou né ke nto ke djo, ma mo da ke tébe ke djo pana, Edé.

⁴ Ke mare sounda téh daka, sounda ke kasè mbiti mbiti, dare nè ke nisi dè té ta kòrou mè woul ke nange nèn, baa ta kare dooudjé tòlna horodè té, ke darè tòkou kiaa ke boui.

⁵ Tokou nè ntoutou né ke nto ke mouta, ma mo da ke tébe ke mouta pana, Edé. Ma mo, ke wo, sounda ke ndoul téh, nè ke nisi dè té néh ke né ta kòdjou né dja té.

⁶ Ma mo né ke to tokou ndou horo dadjé té ke tébe sò, pana, Kandé blé ke kaa kada mbata denier kada, ke kandé orge ke kaa mouta mbata denier kada, a etoudjou oubou ke vin ang.

⁷ Tokou nè ntoutou né ke nto ke sò, ma mo ndou lo da ke tébe ke sò pana, Edé.

⁸ Ma mo, ke wo, sounda ke ndaa pou téh, ke ri nè ke nisi dè té na Yo, ke loou kisi ke djabao ao gè té. Daredè singa ta ndai do er kada té lo er sò ke nange nèn, ta tòl ke tòkou kiaa, ke boo biriri, ke rò too ke madjang, ke deo dadjé té ke mè mou té ke nange nèn.

⁹ Tokou nè ntoutou né ke ntò ke mi, ma mo ko bann té ndii lo dèdè ke ntòldè mbata tar lo Allah, ke mbata tar ke madji ke dèdè mpa mbä.

¹⁰ Dèdè mpa ke ndou ke bar, O tòkou Mbaibé Seigneur ke to madji ke to tokoro, i ngebe ndò ban wa dongor i a gange saria ke i a kouka saria mese lodjè kare dèdè ke disi do nange té nèn?

¹¹ Bana daredè kada kada koubou ke ndaa, ke mpa daredè ta kisi dèkèkè mare ngadji bai san toura ndjè koumana koula té nganlokisidjé ke ngaködè a kase toï, dèdè ke dase tòldè deo kadaba tokou ntòldè ndja to.

¹² Tokou nè ntoutou né ke ntò ke misä, ma mo, ke wo, nange yè nya ke kade dé ndoul tokou koubou saki, nnè toï dé tokou lo mese.

¹³ Ndètélendèdjé ke dara gaï nange tokou kandé kake toungoutisa gaï nange nai koul té tokou lél boura yèè.

¹⁴ Dara ndai tokou maketourou ke dèdè nkèè, ke dòrou tòkou err toï ke nange ke man ïya dana loou té lodè.

¹⁵ Ndò tén mbaibédjé ke nange nèn ke tòkou dooudjé, ke ndjè ngem ndjè pouroudjé, ke ndjè né kingadjé, ke ndjè singadjé, ke maredjé toï, beredjé aséh dooudjé ke ao dodè to lél pè, dïya ròdè mè bolo err té ke horo ngan err té do tòkou err té.

¹⁶ Dèdè mmar tokou err ke ngan err mpana, Osoidjé dòdjè té, iyaaidjédjè kem nè té ke nisi do ngèndé ko béh té, ke iyaaidjédjè ke saria lo Ngon bati.

¹⁷ Mbata tokou ndò saria la dé mbä, ke na ase karr nòè té wa?