Apocalypse 5 - Testament ke Siki 1960 (Kabba Laka)

¹ Ke ma mo maketourou dja té ke kòl, nè ke nisi ngèndé ko béh té, ke nda mè maketourou té rem ke girè té rem, ke nto ke né shiri.

² Ke ma mo ange kada ke ndjè singa ke pa ke ndou ke bar, Na ase kòrou maketourou nèn ta toutou né ke nto né wa?

³ Doou kada ke dara aséh ke do nange té, aséh ko nange té ase ta kòrou maketourou nèn ang, aséh ta ko mèa ang.

⁴ Mam nnò nya mbata dinga doou kada ke ase ta kòrou maketourou nèn ang, aséh ta ko mèa.

⁵ Bana bouka doou kada pa arem, Enò ang, wo nam gel dooudjé lo Juda, barkem gòl David ndai ke singa ta kòrou maketourou nèn ke né shiri ke ntò né.

⁶ Ke dan ngèndé ko béh té ke dadjé ke tébe sò ke horo bouka dooudjé té, ma mo ngon bati arr tén ke to tokou ntòlè mbä, néh ke gadjè shiri ke kèmè shiri ke to ndildjé shiri lo Allah ke ouladè do nange té nèn toï.

⁷ Nè nao ntaa maketourou lé dji kòl nè té ke nisi ngèndé ko béh té.

⁸ Tokou nè ntaa maketourou mbä, dadjé ke tébe sò, ke bouka dooudjé dòdjo gérè sò doso nò gòl ngon bati té, dèdè kada kada déh ke kondé djidè té, ke ngonarè lor ke dousou ke né ke ete, ke to doudjou Allah lo ndjè ko mè tédjé.

⁹ Dèdè dòsou pa ke siki kada, mpana, I ase ta taa maketourou nèn ke ta toutou né ke nto né, mbata ntòli mbä ke deo mese té loi i tél adji dooudjé mbata Allah, maredjé ke horo dooudjé té ke dang dang toï ke ta dang dang toï, ke horo dooudjé té toï, ke gel dooudjé toï.

¹⁰ I dadè to béh ko ke ndjè kòrdjé mbata Allah lodjè, ke dèdè da kö dò nange.

¹¹ Ma maa loou ke mo mbòr ngèndé ko béh té, ke mbòr dadjé té ke tébe ke bouka dooudjé, ndou angedjé ke baya, dèdè nto baya baya dourou dourou baya.

¹² Dèdè mpa ke ndou ke bar, Ngon bati ke ntòlè mbä ase kinga singa, ke né kinga, ke kemkarè, ke mongou, ke piti, ke ndokoo ke kòsou gadji.

¹³ Né toï ke Allah da mbä ke dara té, ke do nange té, ke ko nange té, ke mè tòkou man té, ke né toï ke to kendé, ma mo dèdè mpana, Kòsou gadji ke piti ke ndokoo ke singa ke ndò ke ndò to lo nè ke nisi dò ngèndé kö béh té, ke lo Ngon bati.

¹⁴ Dadjé ke tébe sò pana, Amen, ke bouka dooudjé oso nò gòlè té ke nwalè.