Apocalypse 4 - Testament ke Siki 1960 (Kabba Laka)

¹ Gè té nèn ma mo, ke wo, tadeo kei kada òrou dara. Ndou ke dongor ke mo pa tar sem ke to tokou tebe narè ke bar, pana, Al nèn, ke ma ma tòdji né ke ase téh goukoudang nèn.

² Loshénè loshénè ma méh ke Ndil, wo, ngèndé kö béh kada to dara, ke do ngèndé ko béh té nèn mare doou kada isi kendé.

³ Nè ke nisi kendé, ndörè to tokou err jaspe ke sardoine, ngabourandi goukou giri ngèndé ko béh té ke to tokou err émeraude.

⁴ Ke mbòr ngèndé ko béh té nèn, mare ngèndé dòdjo gérè sò to, ke boukadjé dòdjo gérè sò isi kendé ke doula koubou ke ndaa, ke djòkedò lor to dodè té.

⁵ Ke ngèndé ko béh té nèn ndi tél, ke ndou, ke ndange lo ndi ntéh kendé, pourou ngèl shiri ö no ngèndé ko béh té nèn, ke to ndildjé shiri lo Allah.

⁶ Ke no ngèndé kö béh tén, né to tokou tòkou man ke to koyo koyo, deo kadaba tokou cristal. Ke horo ngèndé ko béh tén ke girè té toï dadjé ke tébe sò to, kemdè to ròdè té kèté ke goukou.

⁷ Da ke tébe ke dongor to tokou nam, yéh ke djo to tokou boro mange, yéh ke mouta éh ke nòè tokou nò doou, ke yéh ke sò to tokou tende ke ï tarr.

⁸ Dadjé ke tébe sò nèn, dèdè kada kada déh ke bakedè misä, kemdè dousou ròdè giri té ke nodè té toï, kade rem tilti rem deo ang ta pana, Madji toï, madji toï, madji toï, to to Mbaibé Allah ke to ndjè singa mongou, Nè ke néh leo, ke néh, ke nao ndé.

⁹ Tokou dadjé ke tébe nèn òsou gadji ke piti, ke nda woio nè ke nisi do ngèndé ko béh té, nè ke nisi tébe ke ndò ke ndò,

¹⁰ Bouka dooudjé ke dòdjo gérè sò oso nò gòl nè té ke nisi dò ngèndé kö béh té, ke nwal nè ke nisi tébe ke ndò ke ndò, dèdè dila djòkedò lodè nò ngèndé ko béh tén, dèdè mpana,

¹¹ I ase toï, Mbaibé lodjè ke Allah lodjè, ta kinga ndokoo ke piti ke singa. Mbata i da né toï, ke deo mè ndiki té loi dèdè déh ke ndadè mbä.