Apocalypse 3 - Testament ke Siki 1960 (Kabba Laka)

¹ Eda maketourou are ange ke kei Allah té ke Sardes, Tar lo nè ke néh ke ndildjé lo Allah shiri, ke ndètélendèdjé shiri. Mam ngeré koula loi, i edji i éh ke tébe a i woei mbä.

² Ndol, ounda mei kendé ta ngeng kesedjé ke dé ngosi ta kwoei, mbata ma minga koula loi ase kem Allah té lom ang.

³ Olè mei do tar té ke i inga ke wo, ngem ban, ke mbeté kedji né da ke madjang loi. Tokou i ndol ang, ma ma téh tokou ndjè boukou, ke i a geré ndò ke ma ma dé dòi té ang.

⁴ A i éh ke mare dooudjé Sardes té ke nda koubou lodè dare waa yèdo ang, dèdè da ndja sem ke koubou ke ndaa, mbata dèdè dase.

⁵ Nè ke ndai ke singa nè na koula koubou ke ndaa tokou ban, ke ma ma toudjou ria maketourou tébe té ang, ma ma bar ria no Bòi té ke no angedjé té la.

⁶ Nè ke néh ke mbi ase kare nè no tar ke Ndil pa are ndjè ke kei Allah té.

⁷ Eda maketourou are ange ke kei Allah té ke Philadelphie, Tar lo nè ke nto madji toï, nè ke nto tokoro, ke nè ke néh ke klélé lo David, nè ke nòrou ke doou kada a koutou ang, ke nè ke noutou ke doou kada a kòrou ang.

⁸ Mam ngeré koula loi, wo, ma mòrou tadeo kei nòi té ke doou kada ase ta koutou ang, mbata mam ngeré i éh ke singa ngadji a i ngem tar lom, ke i mbeté rim ang.

⁹ Wo, ma ma da ta kare maredjé ke kei lo Satan ke pana dèdè nto Juifdjé, a dèdè nto tokou ban ang, dèdè dere ngem, wo, ma ma da ta karedè ndé dongou no gòli té, ke da geré mam ndiki mbä.

¹⁰ Mbata i ngem tar lom ke mè ke enge ang, ma ma ngemi to ndò né naa té ke ao dé dò nange té nèn toï, ta naa dèdè ke disi nange té nèn.

¹¹ Ma mao ndé loshénè, waa ngeng né ke i éh kendé, ta kare doou kada a taa djòkedò loi ang.

¹² Nè ke ndai ke singa ma ma dè to kake gadji tòkou kei Allah té lo Bòi, ke nè na téh kendé ndò kada ang, ma ma da ri Allah lom dè té, ke ri béh lo Allah lom, Jérusalem ke siki ke ï rò Allah té ke dara disi, ke rim ke siki ndja.

¹³ Nè ke néh ke mbi ase kare nè no tar ke Ndil pa are ndjè ke kei Allah té.

¹⁴ Eda maketourou are ange ke kei Allah té ke Laodicée, Tar lo nè ke nto Amen, ke nto ndjè tar nadji mè ndaa kaï ke tokoro, nè ke nto kounkoutou né da lo Allah.

¹⁵ Mam ngeré koula loi, i woul ang aséh nounga ang, mam ndiki ta kare i woul aséh nounga.

¹⁶ Tokou ban, mbata i nounga soré ba, ke i woul ang aséh nounga ang, ma ma tomi ke tarn.

¹⁷ Mbata i pana, Mam nto ndjè né kinga, né kinga lom to nya, ke né doum kada ang. I geré ang ke i isi madjang, i isi to ndoo, to dangeté, to ndjè kem to, ke ròi to ba.

¹⁸ Tokou ban mam ndedji ta ndoko sem narè lor ke ndjiri pouro mbä, baa ta kare i dé to ndjè né kinga, ke koubou ke ndaa ta koula ròi té, baa ta kare ròkoul ròi ke to ba téh kem té ang, ke kouma ta kòrou kemi té, baa ta kari wo loou.

¹⁹ Dèdè ke mam ndikidè, mam ndangedè ke mam ntoundadè, tokou ban éh ke boo ke madji ke mbeté kedji né da ke madjang loi.

²⁰ Wo, ma marr tadeo kei té, mounda, tokou mare doou wo ndoum òrou tadeo kei, ma ma kande dè té, ke ma ma kon mourou sa ke nè na kön sem.

²¹ Nè ke ndai ke singa ma ma karè ta kisi sem ngèndé kö béh té lom, deo kadaba tokou ma ndja mam ndai ke singa ke misi ke Bòi ngèndé ko béh té la.

²² Nè ke néh ke mbi ase kare nè no tar ke Ndil pa are ndjè ke kei Allah té.