Apocalypse 21 - Testament ke Siki 1960 (Kabba Laka)

¹ Gè té nèn ma mo dara ke siki ke nange ke siki, mbata dara ke dongor ke nange ke dongor ndai mbä nga, ke tòkou man katé to marè ang nga.

² Ke ma mo béh ke madji toï, Jérusalem ke siki ï dara ke nò Allah té disi, ndè tokou dènè ke siki da rè madji mbata ngaoèdjè.

³ Ke ma mo ndou ke boui ke téh ngèndé ko béh té pana, Wo, loou kisi lo Allah éh ke dooudjé. Nè na kisi kedè, ke dèdè da to dooudjé la, ke Allah ndja a kéh kedè.

⁴ Nè na bòrou man nò ke kemdè té toï, ke yo a to marè ang nga, ke ongou ke nò ke rò too a to marè ang nga, mbata nédjé ke dongor ndai mbä nga.

⁵ Ke nè ke nisi do ngèndé ko béh té mpana, Wo, mam nda nédjé toï ke siki. Nè mpa to, Eda yèn mè maketourou té, mbata tar nèn to ase ta ko ke to tokoro.

⁶ Ke nè mpa narem, Nda mbä. Mam nto Alpha ke Oméga, yéh ke dongor kèté ke yéh ke télè. Nè ke kounda man öè, ma ma karè man ba, man ke dòman ke tébe.

⁷ Nè ke ndai ke singa na kinga né ndouba nèn, ke ma ma to Allah la ke nè na to to ngonem.

⁸ A mbata dèdè ke bel dadè, ke dèdè ke do mèdè té ang, ke dèdè ke nto yèdo nya, ke dèdè ke nto ndjè tòl doou, ke ndjè kaiyadjé, ke ndjè né ndöndjé, ke ndjè polo kòrdjé, ke ndjè kere ngemdjé toï, da kinga né lodè mè kem pourou té ke ö ke koundou sa, ke to yo ke gar djo.

⁹ Gè té nèn ange kada ke shiri ke éh ke ngonarè shiri, ke dousou ke dòbon né ke are doo shiri, nè mpa narem, mpana, Edé, ma ma tòdji dènè ke siki, dènè lo Ngon bati.

¹⁰ Deo té lo Ndil nè nounem nao sem do tokou err té ke ngal nya, ke nè ntòdjoum béh ke madji toï Jérusalem, ke ï dara no Allah té disi.

¹¹ Nè néh ke ndokoo lo Allah, ndokoo la arè tokou err ke madji nya ke kouka la nya, to tokou meré jaspe koyo koyo tokou lo cristal.

¹² Béh nèn éh ke tòkou ndooko ke ngal nya, tadeo ndooko éh dòkou gérè djo, ke angedjé dòkou gérè djo isi tadeo té. Nè nda ri gel dooudjé dòkou gérè djo lo ngandjé lo Israël do tadeo té nèn.

¹³ Er té ke kade téh tadeo to mouta, er té ke tarr tadeo to mouta, er té ke ber tadeo to mouta, ke er té ke kade woei tadeo to mouta.

¹⁴ Ndooko béh nèn éh ke gòl dòkou gérè djo, ke ri dòkou gérè djo lo ndjè kouladjé lo Ngon bati dòkou gérè djo to do gòlè té.

¹⁵ Nè ke mpa narem néh ke kake lor ta kòdjou béh nèn, ke tadeo la ke ndooko la.

¹⁶ Béh nèn to ke er sò naaté, kourou ngalè asena ke kourou taaté, nè nòdjou béh nèn ke kake la ase kourou deo dourou djo gérè kòr sò, ngalè ke taaté ke ndeoè asena.

¹⁷ Nè nòdjou ndooko la tò, ase mere dji ke dana dòdòkou gérè dòsò ke sò tokou kòdjou lo doou, yèn pana, tokou kòdjou lo ange.

¹⁸ Nda ndooko nèn ke err jaspe, a béh ndja to lor, ndokoo koyo koyo tokou verre.

¹⁹ Dounda err ke dang dang toï gòl ndooko té béh té nèn, yéh ke dongor to jaspe, yéh ke djo to saphir, yéh ke mouta to calcédoine, yéh ke sò to émeraude,

²⁰ Yéh ke mi to sardonyx, yéh ke misä to sardoine, yéh ke shiri to chrysolite, yéh ke djidjo to béryl, yéh ke djikada to topase, yéh ke dòkou to chrysoprase, yéh ke dòkou gérè kada to hyacinthe, yéh ke dòkou gérè djo to améthyste.

²¹ Tadeo dòkou gérè djo to meré perle dòkou gérè djo, nda tadeo kada kada ke meré perle kada kada, deo ke dana béh té to lor ke madji ke ndokoo koyo koyo tokou verre.

²² Ma mo kei mè béh té nèn ang, mbata Mbaibé Allah ndjè singa mongou ke Ngon bati to kei ke kendé.

²³ Ke kade aséh nnè ase ta ndokoo béh té nèn ang, mbata ndokoo lo Allah to lokarè kendé, ke Ngon bati to lampe kendé.

²⁴ Gel dooudjé a ndja deo lokarè té la, ke mbaibédjé ke nange nèn a koto né ndokoo lodè dé mè té.

²⁵ Da koutou tadeo la kade rem ndò kada ang, ke til a kéh nou ang.

²⁶ Dèdè da koto né ke ndokoo ke piti lo gel dooudjé dé mè té.

²⁷ A né yem a kande mè béh té nèn kada ang, aséh doou kada ke da madjang aséh ke ere ngem, a dèdè ke nda ridè mè maketourou té ke tébe lo Ngon bati kadaba.