Apocalypse 20 - Testament ke Siki 1960 (Kabba Laka)

¹ Gè té nèn ma mo ange kada ï dara disi, nè nwaa klélé tòkou bwa ke soürè goto dja té, ke tòkou koulaa narè.

² Nè nwaa tòkou li, li ke leo ke to Esou ke Satan, ke nè ntèè mbata bal dourou kada.

³ Nè nilè mè bwa té, nè noutou tè ke nrëté dè té, baa ta kare nè nere gel dooudjé marè ang nderèng tokou bal dourou kada ndai. Gè té dase ta toutè mbata ndò ngadji.

⁴ Gè té nèn ma mo mare ngèndé kö béh, ke dèdè ke daredè ta gange saria disi do ngèndé té nèn. Ma mo kem lo dooudjé ke doudja gòboudè mbata tar nadji lo Jésus ke mbata tar lo Allah, dèdè ke nwal da nèn aséh make la ang, ke ntaa ndadji la natenòdè té aséh djidè té ang. Dèdè ntél ke tébe bai, ke dèdè do béh ke Christ bal dourou kada.

⁵ Kese ndjè yodjé tél ke tébe ang nderèng bal dourou kada nèn ase ndai. Yèn to kï mè bwa yo té ke dongor.

⁶ Nè ke nï mè bwa yo té ke dongor, nè néh ke koukou ke néh madji toï. Yo ke gar djo ödè ke singa ang, a dèdè da kisi ndjè kòrdjé lo Allah ke lo Christ, ke dèdè da ko béh sa bal dourou kada.

⁷ Ke tokou bal dourou kada ndai mbä, da toutou Satan kei koula té la.

⁸ Nè na téh daka ta kere gel dooudjé ke éh er sò té ke nange nèn, yèn to Gog ke Magog, ta mbòndè mbata da dòò, baya lodè to tokou nangara ke mbòr tòkou man katé té.

⁹ Ke dèdè ndja do nange té toï, ke dèdè ngoukou loou kisi lo ndjè ko mè tédjé ke béh ke ndikè nya, a pourou téh dara disi ke ödè.

¹⁰ Ke dila Satan ke eredè mè loou kem pourou té ke koundou sa, loou té ke da ke prophète ke ndjè ngem déh kendé, ke dèdè da ko né ndoo kade rem tilt irem bal ke bal.

¹¹ Gè té nèn ma mo tòkou ngèndé ko béh ke ndaa, ke nè ke nisi dè té, nange ke dara daïn eo mbòrè té, ke dinga loou mbata lodè ang.

¹² Ke ma mo dooudjé ke woei mbä, dèdè ke tòkou ke dèdè ke ngadji, darr mbòr ngèndé ko béh té, ke dòrou maketourou. Dòrou mare maketourou to, ke to maketourou tébe. Ke ngange saria lo dooudjé ke woei mbä deo né té ke nda mè maketourou té nèn, deo kadaba ase koula ke dèdè nda leo.

¹³ Tòkou man katé tél dooudjé ke woei mè té, Yo ke Djabao ntél dooudjé ke woei mbä ke to kendé, ke ngange saria lodè toï deo kadaba ase koula ke dèdè nda leo.

¹⁴ Gè té nèn dila Yo ke Djabao loou kem pourou té. Yèn to yo ke gar djo, loou kem pourou.

¹⁵ Ke tokou dinga ri mare doou mè maketourou tébe té ang, dilè loou kem pourou té.