Apocalypse 2 - Testament ke Siki 1960 (Kabba Laka)

¹ Eda maketourou are ange ke kei Allah té ke Ephèse, Yèn to tar lo nè ke nwaa ndètélendèdjé shiri dja té ke kòl, ke ndja horo lampe lor té ke shiri.

² Mam ngeré koula loi ke né ke i da, ke mei ke enge ang, mam ngeré i ase kourè wouri ke ndjè né da ke madjang ang, a i naa dèdè ke mpana dèdè nto ndjè kouladjé, a nto tokou ban ang, ke i wodè to ndjè ngemdjé.

³ Mam ngeré i éh ke mè ke enge ang, ke i waa ngeng mbata rim, ke ròi wotai ang.

⁴ Né ke mam ndiki sei ang to mbata i ïya ndiki loi ke leo ke dongor.

⁵ Tokou ban, olè mei mbata loou ke i oso kendé, mbeté kedji né da ke madjang loi, eda koula ke i da dongor. Tokou i da ban ang, ma ma dé ròi té, ma ma kòrou lampe loi loou té la tokou i mbeté kedji né da ke madjang loi ang.

⁶ A né ke i éh né, i mbeté koula lo Nicolaïtedjé ke mam mbeté to.

⁷ Nè ke néh ke mbi ase kare nè no tar ke Ndil pa are ndjè ke kei Allah té. Nè ke ndai ke singa ma ma karè nousa kandé kake ke tébe ke to mè loou té ke madji lo Allah.

⁸ Eda maketourou are ange ke kei Allah té ke Smyrne, Tar lo nè ke nto nè ke dongor, ke nè ke nto nè ke télè té, nè ke noei leo ke ntél to ke tébe.

⁹ Mam ngeré ko ndoo loi ke dangeté loi, a i to ndjè né kinga, ke ngem lo ndjè ke pana dèdè nto Juifdjé, a dèdè nto ban ang, dèdè nto kei kisi lo Satan.

¹⁰ Eda bel ang mbata né ke a ko ndooè. Wo, Satan a kongou maredjé horosè té kei koula té, baa ta naasè, ke sésè a koidjé ndoo ke ndò dòkou. Isi ndjè mè ndaa kaï sar yo ke ma ma kari djòkedò tébe.

¹¹ Nè ke néh ke mbi ase kare nè no tar ke Ndil pa are ndjè ke kei Allah té. Nè ke ndai ke singa nè na ko ndoo yo ke djo ang.

¹² Eda maketourou are ange ke kei Allah té ke Pergame, Tar lo nè ke néh ke kiaa ke ate ke ndë djo.

¹³ Mam ngeré loou ke i to té, loou ke ngèndé lo Satan to kendé, i waa rim ngeng ke i mbeté ko mè té lom ang, lé ndò té lo Antipas ndjè pa tar nadji lom ke ndjè mè ndaa kaï lom, ke ntòlè horosè té, loou ke Satan to kendé.

¹⁴ A mare né ke mam mbeté sei, i éh ke maredjé ke ao go tar té lo Balaam, nè ke ntòdjou Balak ta kila err touka gòl no ngandjé té lo Israël, ta kare dön mourou ke dare kòrdjé, ke ta karedè nto loou to madjang.

¹⁵ Ban tò, i éh ke dooudjé ke ao go tar té lo Nicolaïtedjé.

¹⁶ Tokou ban mbeté kedji né da ke madjang. Tokou eda ban ang, ma ma dé ròi té loshénè, ke ma ma dòò kedè ke tokou kiaa ke tarn té.

¹⁷ Nè ke néh ke mbi ase kare nè no tar ke Ndil pa are ndjè ke kei Allah té. Nè ke ndai ke singa ma ma karè mourou manne ke yarè, ke ma ma karè err ke ndaa, ke nda ri ke siki kendé ke mare doou geré ang, sè nè ke ninga.

¹⁸ Eda maketourou are ange ke kei Allah té ke Thyatire, Tar lo Ngon lo Allah, nè ke néh ke kem tokou ndò pourou, ke gèlè to tokou narè ke kasè ke ndokoo.

¹⁹ Mam ngeré koula loi, ke ndiki loi, ke ko mè té loi, né ke i da ke mei ke enge ang, ke koula loi ke goukou wota yéh ke dongor.

²⁰ A né ke ma mbeté sei to mbata i are dènè Jézabel, nè ke mpana nè nto prophète ke dènè, nè ntòdjou tar kere nganlokisidjé lom ta karedè nto loou to madjang, ke ta kon mourou ke dare kòrdjé.

²¹ Ma marè ndò ta mbeté kedji né da ke madjang la, a nè mbeté ta kïya loou to madjang la.

²² Wo, ma ma kilè twa rò too té, ke dèdè ke nda kaiya sa ma ma kiladè tokou ongou té, tokou dèdè mbeté kedji né da ke madjang lodè ang.

²³ Ma ma tounda nganè ke yo. Ndjè ke kei Allah té toï a geré mam nto nè ke nsange kedji ke mè to, ke ma ma karesè kada kada ase koula losè.

²⁴ A maredjé losè ke Thyatire ke ao go tar té nèn ang, ke egeridjé ang né ke maredjé pana to gel tar lo Satan, ma mpa maresè, Ma mila mare né koto dòsè té ang.

²⁵ Lé ta kwaa ngeng né ke éhdjé kendé sar mam ndé.

²⁶ Nè ke ndai ke singa ke ngem koula lom sar ndò té ke goukou, ma ma karè singa ta kö dò gel dooudjé.

²⁷ Nè na ködè ke kake narè, na youroudè deo kadaba tokou yourou djo andji, deo kadaba tokou ma ndja minga singa dji Bòi té.

²⁸ Ma ma karè ndètélendè ke to Djidjo.

²⁹ Nè ke néh ke mbi ase kare nè no tar ke Ndil pa are ndjè ke kei Allah té.