Apocalypse 19 - Testament ke Siki 1960 (Kabba Laka)

¹ Gè té nèn ma mo mare né ke to tokou ndou ke bar nya lo dooudjé baya baya ke dara, pana, Alléluia, Kadji ke ndokoo ke singa to lo Allah lodjè,

² Mbata gange saria la to tokoro ke gaté gaté, nè ngange saria lo tòkou dènè kaiya ke toudjou nange nèn ke kaiya la, ke nè nouka mese nganlokisidjé la dò dènè té nèn.

³ Dèdè mpa ke tarr gar djo, Alléluia. Sa pourou la ï tarr ke ndò ke ndò.

⁴ Boukadjé dòdjo gérè sò ke dadjé ke tébe sò doso no Allah té ke nwalè, nè ke nisi dò ngèndé kö béh té, mpana, Amen, Alléluia.

⁵ Ndou téh ngèndé ko béh té pana, Òsidjé gadji Allah lodjè, sésè nganlokisidjé la toï, sésè ke ebelèdjé, sésè ke ngadji ke sésè ke tòkou.

⁶ Bana ma mo né ke to tokou ndou lo dooudjé ke baya baya, tokou bar lo man nya, ke tokou boula lo ndi ke ndange ke singa, mpana, Alléluia. Mbata Mbaibé lodjè Allah ke ndjè singa mongou ö loou.

⁷ Ase kare djèdjè nkoukou ke djare ròdjè nèldjè nya ke djòsou gadjè, mbata ndò taa dènè lo Ngon bati dé mbä, ke dènè la da rè ndja ase.

⁸ Darè ta koula koubou lin ke madji rè té ke ndokoo ndaa, ke né yèdo kada goto, mbata koubou lin ke madji to koula ke gaté gaté lo ndjè ko mè tédjé.

⁹ Ange nèn pa arem, Eda né nèn mè maketourou té, Madji éh ke dèdè ke mmardè ta kon mourou kisi kei lo dènè ke siki lo Ngon bati nèn. Ke nè mpa narem, Yèn to tar ke tokoro lo Allah.

¹⁰ Bana ma moso nò gòlè té ta walè, a nè mpa narem, Eda ban ang, mam nto ngonlokisi mari ke ngaköidjé ke ngem tar nadji lo Jésus. Ewal Allah. Mbata tar nadji lo Jésus to ndii pa tar lo Allah ke daka.

¹¹ Gè té nèn ma mo dara teï, ke wo, sounda ke ndaa. Nè ke nisi dè té mmarè na Ndjè mè ndaa kaï ke Tokoro, ke nè ngange saria ke nè nda doo gaté gaté.

¹² Kèmè to tokou ndò pourou, ke djòkedò nya to dè té, ke ri to kendé ke doou kada geré ang, sè nè ndja kadaba.

¹³ Nè noula koubou rè té ke ntousou mese kendé, ke ria na Tar lo Allah.

¹⁴ Ke ndjè dòòdjé ke dara ke doula koubou lin ke madji ròdè té, ke to ndaa ke né yèdo kada goto, dèdè dao gè té dò soundadjé té ke ndaa.

¹⁵ Tòkou kiaa ke ate téh tè té, ta tounda né gel dooudjé, ke nè na ködè ke kake narè, nè na mbòï tòkou biri korè man kandé ongou lo Allah ke ndjè singa mongou.

¹⁶ Do koubou té la, ke dò bingè té, nè néh ke ri ke nda kendé, Mbaibé lo mbaibédjé, ke Seigneur lo seigneurdjé.

¹⁷ Bana ma mo ange kada arr mè kade té, nè mmar eldjé toï ke ao dan dara té ke ndou ke bar nya, Edéidjé, mbòidjéna mbata tòkou mourou lo Allah.

¹⁸ Ta kön da rò mbaibédjé, ke da rò padjadjé, ke da rò tòkou dooudjé, ke da rò soundadjé ke dooudjé ke isi dòdè té, ke da rò dooudjé toï, dèdè ke dao dòdè to lél pè ke beredjé tò, dèdè ke ngadji ke dèdè ke tòkou tò.

¹⁹ Ke ma mo da nèn ke mbaibédjé ke nange nèn mbona ke ndjè dòòdjé lodè ta doo ke nè ke nisi do sounda té ke ndjè dòòdjé la.

²⁰ Dèdè dwaa da nèn ke prophète ke ndjè ngem sa tò, nè ke nda né tòdjou nò da té, ke né tòdjou nèn nè nere dèdè ke dinga ndadji lo da nèn, ke dèdè ke nwal make la. Diladè djokem mè loou kem pourou té ke ö ke koundou sa, tokou dèdè nnai ke kem.

²¹ Ntòl kesedjé ke tòkou kiaa lo nè ke nisi do sounda té, tòkou kiaa ke téh tè té. Ke eldjé toï ön da rò dooudjé nèn, ke mèdè ndan nya.