Apocalypse 18 - Testament ke Siki 1960 (Kabba Laka)

¹ Gè té nèn ma mo mare ange kada ï dara disi, nè néh ke singa nya, ke nange arè mbata ndokoo la.

² Nè mpa ke ndou ke bar nya, Noso mbä, noso mbä, tòkou Babylone, Nè ndé to loou kisi lo ndildjé lo Satan, loou ke ndildjé ke madjang toï éh kendé, loou ke eldjé toï ke madjang ke dooudjé mbetédè déh kendé.

³ Mbata gel dooudjé toï aih vin ke ongou da kaiya la, ke mbaibédjé ke nange nèn da kaiya sa mbä, ke ndjè né ndokodjé ke nange nèn inga né kinga nya deo boo madjang té la.

⁴ Bana ma mo mare ndou ke téh dara pana, Etéhdjé ke daka horodè té, dooudjé lom, dòmadjang a edaidjé sa mè né ke madjang té la, na dòmadjang a sésè ingaidjé né ndoo sa.

⁵ Mbata né ke madjang la dousou ngal ase dara, ke mè Allah olè do né ke madjang té la.

⁶ Etél da arè deo kadaba tokou nè ndja nda mbä, ouka né arè gar djo mbata koula la, Epolè né kaih djo arè mè ngonarè té ke nè mpolè kendé.

⁷ Deo kadaba tokou nè nòsou gadjè ndja, ke ndam ke né boo nya, òdjou né ongou ke no arè deo kadaba ban. Mbata ke mèa té nè mpana, Ma misi to mbai ke dènè, mam nto dènè ndouba ang, ma ma ko no ngadji ang.

⁸ Tokou ban né ndoo la a dé mè ndò té ke kadaba, rò too nya, ke nò ke boo, ke pourou a koè, mbata Mbaibé Allah ke gange saria la to ndjè singa mongou.

⁹ Ke mbaibédjé ke nange nèn ke da kaiya sa, ke da boo deo kadaba sa, dèdè da nò ke man kemdè ke dourouki mbata la, tokou dèdè do sa pourou ke öè.

¹⁰ Dèdè da karr dèbè eo ke bel lo né ongou la, ke da pana, Ongou, ongou, i tòkou béh, i béh ke ngeng nya, Babylone. Ke kade ngadji saria loi dé mbä.

¹¹ Ndjè né ndokodjé ke nange nèn nò ke man kemdè, ke nnò ke ongou mbata la, mbata doou kada ndoko né lodè marè ang nga.

¹² Né ndoko lor, ke argent, ke meré, ke meré perle, ke koubou lin ke madji, ke koubou ndörè, ke koubou soie, ke koubou ke kasè, ke kake dang dang ke ete madji, né toï ke nda ke ngange kerè, né toï ke nda ke kake ke kouka la nya, narè ke kasè, ke mare narè, ke err ke madji,

¹³ Ke cinnamome, ke ndoudjou kandé kake ke ete, ke ndoudjou yambo, ke myrrhe, ke encens, ke vin, ke oubou, ke ndoudjou mourou ke madji, ke kandé ko, ke mangedjé ke batidjé, ke soundadjé ke pousse soundadjé, ke beredjé ke kem lo dooudjé.

¹⁴ Kandé ke kem loi ndikidè nya, dao dïyai mbä, ke né ke madji loi toï ke né koura nai mbata loi, ase kingadè marè ang nga.

¹⁵ Ndjè né ndoko lo né nèn toï ke inga né kinga sa, da karr dèbè eo ke bel lo né ongou la, da nò ke man kemdè ke nò ke tarr,

¹⁶ Ongou, ongou, mbata tòkou béh nèn, ke oula koubou la ke madji, ke koubou ndörè ke kasè, ke nda ke lor ke meré dang dang, ke meré perle.

¹⁷ Ke kade ngadjiba né kinga nèn toï toudjou mbä. Ndjè ko todjé toï ke dooudjé ke ao ke to do man té, ke ndjè ngem to ke dèdè toï ke koula lodè to do man té, darr dèbè eo.

¹⁸ Dèdè mpa ke tarr tokou dèdè do sa pourou ke ö béh nèn, Béh ke da to tokou tòkou béh nèn wa?

¹⁹ Dèdè touka boum nange dodè té, tokou dèdè dao nnò ke man kemdè, ke nnò ke ongou, mpa ke tarr, Ongou, ongou, mbata tòkou béh nèn, loou té ke dèdè toï ke déh ke to do man té dinga né kinga nya deo né kinga té la. Ke kade ngadjiba nè ntoudjou mbä.

²⁰ Ekoukidjé mbata la, i dara, sè ndjè ko mè tédjé ke ndjè kouladjé, ke prophètedjé, mbata Allah gange saria mbata losè dè té.

²¹ Bana ange kada ke ndjè singa mongou oun err kada ke to tokou tòkou biri err, nila mè tòkou man té pana, Deo kadaba ban da kila Babylone nange ngeng, tòkou béh nèn ke da koè marè ang nga.

²² Da ko bar lo ndjè kondé ke ndjè kòsou pa, ke dèdè ke kòl tebe ke tebe narè mei té marè ang nga. Ke da kinga ndjè da koula dang dang mei té marè ang nga, ke da ko bar lo tòkou biri err mei té marè ang nga.

²³ Ke lokarè lampe a ndokoo mei té marè ang nga, ke da ko ndou ndjè dènè ke siki ke dènè ke siki mei té marè ang nga. Mbata ndjè né ndokodjé loi to tòkou dooudjé ke nange nèn, ke i ere gel dooudjé toï ke né ndön loi.

²⁴ Ke dinga mese prophètedjé ke ndjè ko mè tédjé mèa té mbä, ke mese dèdè toï ke ntòldè ke nange nèn.