Apocalypse 17 - Testament ke Siki 1960 (Kabba Laka)

¹ Gè té nèn ange kada ke shiri ke éh ke ngonarè shiri dé pa arem, Edé, ma ma tòdji saria lo tòkou dènè kaiya, nè ke nisi do tòkou man té nya.

² Nè ke mbaibédjé ke nange nèn da kaiya sa, ke vin da kaiya lodè da dooudjé ke isi nange nya.

³ Ange ounem ao sem deo Ndil té mè kòr té, ke ma mo dènè kada ke isi do da té ke kasè, ke dousou ke ri tadji, ke dè éh shiri ke gadjè éh dòkou.

⁴ Dènè nèn oula koubou ndörè ke kasè rè té, ke nda lor ke meré perle kendé, nè nwaa ngonarè lor dja té ke dousou ke né ke madjang nya, ke madjang kaiya la.

⁵ Nda ri tar ke yarè do natenè té, Tòkou Babylone, kö kaiyadjé, ke ko né ke madjang nya ke nange nèn.

⁶ Ma mo dènè nèn dousou ke mese lo ndjè ko mè tédjé, ke mese lo ndjè nadjidjé lo Jésus dè tokou lo koto. Tokou ma moè mem ounda do bia nya.

⁷ A ange nèn pa arem, Mei ounda do bia mbata di wa? Ma ma tòdji tar ke yarè lo dènè nèn, ke lo da ke éh ke dè shiri ke gadjè dòkou ke oto dènè nèn.

⁸ Da nèn ke i wo to leo, ke bashénè to ang, ke nè na kï mè tòkou bwa té ke soürè goto, ke nè na kao loou kem pourou té, ke dooudjé ke isi nange té nèn ke nda ridè mè maketourou té ke tébe ang, dongor baa gòl nange nèn to, mèdè a kounda do bia ta ko da nèn mbata nè nto leo, ke bashénè nè nto ang, ke nè na dé bai.

⁹ Yèn ase kedji ke kemkarè, dè shiri nèn to err shiri ke dènè nèn isi kendé.

¹⁰ Dèdè nto mbaibédjé shiri to, ndjè ke mi oso mbä, kada to ba bai, ke mare kada dé ang bai, tokou nè ndé nase kéh ndò ngadjiba.

¹¹ Tar lo da ke to leo ke bashénè to ang, nè nto yéh ke djidjo a nto ngädè shiri, ke nè nao loou kem pourou té.

¹² Gadji da dòkou ke i wo to mbaibédjé dòkou ke inga singa ko béh ang bai, a dèdè da kinga singa ta kö béh tokou lo mbaibédjé ase kade ngadji naaté ke da ndja.

¹³ Dèdè nèn déh ke kedji mè kadaba, ke dare da nèn singa ke ta kö béh lodè.

¹⁴ Dèdè da da dòò ke Ngon bati, ke Ngon bati a ndaidè ke singa, mbata nè nto Seigneur lo seigneurdjé ke Mbaibé lo mbaibédjé, ke dèdè ke déh sa to dèdè ke mmardè, ke mberedè ke nto ndjè mè ndaa kaï.

¹⁵ Ange pa arem, Man nèn ke i wo, ke dènè ke isi kendé, to dooudjé ke dooudjé baya baya, ke gel dooudjé, ke ta dooudjé dang dang.

¹⁶ Gadji da dòkou ke i wo, dèdè dè ke da, da mbeté dènè kaiya nèn, dèdè da karè nisi madjang ke da kare rè to ba, da kousa da rè ke da kare pourou öè.

¹⁷ Mbata Allah aredè mèdè té ta da né toï ke nè nedji, deo da né mè té ke kadaba lodè, ke deo kare singa ko béh lodè da nèn, sar tar lo Allah a dé ta kase toï.

¹⁸ Ke dènè nèn ke i woè to tòkou béh ke ö do mbaibédjé ke nange nèn.