Apocalypse 16 - Testament ke Siki 1960 (Kabba Laka)

¹ Bana ma mo ndou ke bar nya ke téh kei té nèn, ke pa are angedjé shiri nèn, Abidjé, mbelidjé ngonarè ongou lo Allah shiri do nange té.

² Tokou ban ange ke dongor ao mbel ngonarè la dò nange té, doo ke madjang ke ete nya dé rò dooudjé té ke éh ke ndadji lo da ke nwal make la.

³ Ange ke djo mbel ngonarè la mè tòkou man té, tòkou man dé tokou mese doou ke woei mbä, ke nédjé ke kem toï ke to mè man té doei.

⁴ Ange ke mouta mbel ngonarè la mè man ba té, ke mè dòman té ke man dé to mese.

⁵ Ke ma mo ange ke man pana, I to gaté gaté, i ke éh, ke éh leo, i kadaba ke to madji toï, mbata i gange saria tokou ban.

⁶ Mbata dooudjé ongou mese lo ndjè ko mè tédjé ke prophètedjé, ke i aredè mese ta kaih. Yèn asedè.

⁷ Ke ma mo bann pana, Aa, Mbaibé Allah ndjè singa mongou, Gange saria loi to tokoro ke gaté gaté.

⁸ Ange ke sò mbel ngonarè la do kade té, dare kade ta ko dooudjé tokou pourou.

⁹ Tokou loou nounga nounga dooudjé, dèdè ntadji ri Allah ke ö do né té ke are doo nèn, ke dèdè mbeté kedji né da ke madjang lodè ang, ke dòsou gadjè ang.

¹⁰ Ange ke mi mbel ngonarè la do ngèndé kö béh té lo da nèn, ke béh ko la ndoul toï, dooudjé ousa ndödè ke ongou.

¹¹ Dèdè ntadji Allah ke dara mbata né ndoo ke doo lodè, ke dèdè mbeté koula ke madjang lodè ang.

¹² Ange ke misä mbel ngonarè la do tokou man ba Euphrate té, ke man ai toï, ta kïya deo kare mbaibédjé ke ï loou té ke kade téh té.

¹³ Ma mo ndildjé ke madjang mouta ke to tokou indjinaidjé téh ta tòkou li té, ke ta da té nèn, ke ta prophète té ke ndjè ngem.

¹⁴ Mbata dèdè nto ndildjé lo Satan, ke nda né tòdjou, dèdè dao rò mbaibédjé té ke do nange té nèn toï, ta mbòndè ta da doo ke tòkou ndò lo Allah ke ndjè singa mongou.

¹⁵ Wo, mao ndé tokou ndjè boukou. Madji éh ke nè ke ntibi ang, ke ngem koubou rè té, baa ta kare nao ke rè ba ang ta kare do rè ba.

¹⁶ Dèdè mbòndè loou té ke mmarè ke tar Hébreu na Harmagédon.

¹⁷ Ange ke shiri mbel ngonarè la lél té, ke ndou ke bar nya téh kei Allah té loou ngèndé ko béh té, pana, Nda toï mbä.

¹⁸ Bana ndi tél, boula kounda nya, ke ndi ndange, ke nange yè nya, ounkotè ke dooudjé ke éh nange nèn loou yè tokou ban kèté ang, yè lo nange lé to nya wota.

¹⁹ Tòkou béh kai dana er mouta, ke béh lo gel dooudjé oso, ke mè Allah olè do tòkou Babylone té, ta kare nè naih ngonarè ongou la nya toï.

²⁰ Loou nange ke man ïya dana aïn toï, ke do tòkou err ke ngal marè ang.

²¹ Tòkou kòdjou oi as koi narè talent ï dara oso do dooudjé té, nderèng dooudjé tadji Allah mbata né ndoo lo kòdjou nèn, mbata né ndoo nèn to madjang nya.