Apocalypse 13 - Testament ke Siki 1960 (Kabba Laka)

¹ Gè té ma mo da kada téh mè tòkou man té, nè néh ke gadjè dòkou ke dè shiri, djòkedò dòkou to do gadjè té, ke ri tadji to dè té.

² Da nèn ke moè to tokou kaake, gòlè to tokou gòl ours, ke tè to tokou ta nam. Tòkou li arè singa la, ke ngèndé ko béh la ke tòkou singa.

³ Ma mo dè kada to tokou inga doo yo, a doo yo la nèn ere mbä, mè dooudjé ke nange nèn toï ounda do biä go da té nèn.

⁴ Dooudjé wal tòkou li nèn mbata nè nare singa da nèn, ke dèdè nwal da ndja, mpana, Na to tokou da nèn, na a kase doo sa wa?

⁵ Dare da nèn tè ke pa tar boro ke tar tadji, ke darè ta da singa nderèng nnè dòsò gérè djo.

⁶ Nè nteï tè ta pa tar tadji do Allah té, ke nè ntadji ria ke loou kisi la ke dèdè ke disi dara.

⁷ Darè ta da doo ke ndjè ko mè tédjé ke ta ndaidè ke singa, darè singa do gel dooudjé té toï, ke dooudjé toï, ke ta dang dang toï, ke nange toï.

⁸ Dèdè toï ke disi nange da walè, dèdè kada kada toï ke nda ridè baa gòl nange nèn to mè maketourou tébe té lo Ngon bati ang, nè ke ntòlè.

⁹ Nè ke néh ke mbi ase kare nè no,

¹⁰ Tokou mare doou waa doou to bere, nè na kao to bere, Tokou mare doou tòl doou ke kiaa, nè nase ta kwoei deo té lo kiaa. Yèn to ndò ta kare ko mè té ke mè lo ndjè ko mè tédjé enge ang.

¹¹ Gè té ma mo mare da kada téh nange, nè néh ke gadji djo ke to tokou gadji ngon bati, ke nè mpa tar tokou tòkou li.

¹² Nè nda ke singa toï lo da ke dongor nòè té, nè nda ta kare nange ke dooudjé ke isi kendé nwal da ke dongor, nè ke doo yo la ere mbä.

¹³ Nè nda tòkou né tòdjou nderèng ta kare pourou ï dara disi do nange té kem dooudjé té.

¹⁴ Deo né tòdjou té ke darè ta da nò da té, nè nere dooudjé ke isi do nange té, nè mpa naredè ta da make mbata da nèn ke inga doo kiaa ke isi tébe bai.

¹⁵ Darè ta kare kem make lo da nèn, baa ta kare make lo da nèn pa tar, ke ta kare dèdè ke ndiki wal make lo da nèn ang, ntòldè.

¹⁶ Nè nda ta kare dooudjé toï, ndjè ke ngadji ke ndjè ke tòkou to, ndjè né kingadjé ke dangetédjé tò, dooudjé ke dòdè to lél pè ke beredjé to, ta kinga ndadji djidè té ke kòl aséh natenòdè té.

¹⁷ Tokou ban ta kare doou kada ndoko né aséh labe né ang tokou nè néh ke ndadji nèn ang, yèn pana ri da aséh né toura ria.

¹⁸ Yèn ase kemkarè, ase kare doou ke éh ke kemkarè toura baya lo ri da nèn, mbata to né toura doou, né toura la to kòr misä gérè dòmisä ke misä.