Apocalypse 12 - Testament ke Siki 1960 (Kabba Laka)

¹ Tòkou né tòdjou téh dara, to to dènè kada ke kade dibè, ke nnè to ko gòlè té, djòkedò ndètélendè dòkou gérè djo to dè té.

² Nè nwaa sem ke nourouki mbata ndoo ï sa, ke néh ke ongou koudjou ngon.

³ Mare né tòdjou téh dara, to to tòkou li ke kasè, néh ke dè shiri ke gadjè dòkou, ke djòkedò shiri to dè té.

⁴ Bongè òrou er kada ke dana mouta lo ndètélendèdjé ke dara, ntiladè do nange té. Tòkou li nèn arr no dènè té ke ao ta koudjou ngon, baa ta kourou ngonè tokou nè noudjou mbä.

⁵ Nè noudjou ngon ngao, nè ke nto tar la ta ko do Gentildjé toï ke kake gorè narè, a dòrou ngonè dao nè mbòr Allah té ke ngèndé kö béh la.

⁶ Dènè nèn aïn ao mè kòr té, néh ke loou nou ke Allah da arè ta ngemè nou ndò dourou gérè kòr djo ke dòmisä.

⁷ Doo ï dara, Michel ke angedjé la nda dòò ke tòkou li nèn, ke tòkou li ke angedjé la nda dòò,

⁸ A dèdè nda dòò pi, ke mare loou mbata lodè goto dara.

⁹ Dare tòkou li nèn oso, li ke leo ke mmarè Esou ke Satan, nè ke nto ndjè kere ke nange nèn toï, dilè nange ke angedjé la sa tò.

¹⁰ Ma mo ndou ke bar nya dara, pana, Bashénè kadji ke singa ke ko béh lo Allah lodjè ke singa lo Christ la dé mbä, mbata dila ndjè toula do ngaködjèdjè nange, nè ke ntoula dòdè kade rem tilti rem no Allah té lodjè.

¹¹ Dèdè ndaiè ke singa deo mese té lo Ngon bati, ke deo tar nadji té lodè, dèdè ndiki tébe lodè ang lé tokou dase kwoei.

¹² Tokou ban edaidjé rònèl dara ke sésè ke isidjé kendé. A ongou dasè, nange ke tòkou man, mbata Satan disi dòsè té ke tòkou ongou nya mbata nè ngeré ndò la to ngadjiba.

¹³ Tokou tòkou li nèn wo dèdè dilè do nange té mbä, nè ndji go dènè té ke oudjou ngon ngao.

¹⁴ A dare dènè nèn bake djo tokou lo tòkou tende, baa ta karè nï né nao mè kòr té deo eo ke tòkou li, loou té la ke ngemè kendé mbata nai kada, ke mare nai ke kese nai dan nai kada.

¹⁵ Li nèn tiwëré man tè go dènè té tokou man ba, baa ta kare man ba wèè.

¹⁶ A nange ouma dènè nèn, nange teï tè ke man ba ke tòkou li tiwëré tè té en.

¹⁷ Bana ongou da tòkou li ke dènè nèn, nè nao nda doo ke kese nganè, ke dèdè ke ngem tar ndedji lo Allah, ke ngem tar nadji lo Jésus. Nè narr tarr do nangara tòkou man té.