Apocalypse 11 - Testament ke Siki 1960 (Kabba Laka)

¹ Darem kòbou ke to tokou kake gorè, ke mpa darem, Ï tarr òdjou tòkou kei lo Allah, ke dò bann, ke dèdè ke ndoudjou Allah mè tòkou kei Allah té.

² Òdjou da loou ke to giri tòkou kei Allah té ang, ïya ba mbata dïya yèn dare Gentildjé, ke da mbòï béh ke madji toï ase nnè doso gérè djo.

³ Ma ma kare ndjè tar nadjidjé lom ke djo singa ta pa tar ke Allah oula, ase ndò dourou gérè kòr djo ke dòmisä, doula koubou saki ròdè té.

⁴ Dèdè nto kake olive djo ke lampe djo ke arr no Mbaibé Seigneur té lo nange nèn.

⁵ Tokou mare doou ndiki ta dadè madjang, pourou téh tadè té ke ö ndjè kembaadjé lodè, tokou mare doou ndiki ta dadè madjang dase ta tòlè deo té ke ban.

⁶ Dèdè déh ke singa ta to dara, baa ta kare ndi ere ang ndò ke dèdè mpa tar ke Allah oula né, dèdè déh ke singa ta tourou man to mese ke ta tounda nange ke doo dang dang toï, dase ta da ke ndò toï tokou dèdè da ndiki.

⁷ Tokou dèdè da pa tar nadji lodè ase, da ke téh mè tokou bwa té a da kedè dòò, nè na koutadè ke singa ke na tòldè.

⁸ Nindè a to deo tokou béh té, ke mmar deo té lo ndii Sodome ke Egypte, loou ke ntòl Mbaibé Seigneur lodè kendé.

⁹ Dooudjé horo dooudjé té toï, ke horo gel dooudjé té toï, ke horo Gentildjé té toï, da ko nindè nderèng ndò mouta ke kese dan ndò kada, da mbeté ta kare ndoubou nindè bwa yo té.

¹⁰ Dooudjé ke isi do nange té da koukou mbata lodè, da da ndam ke da koula ke né kare ba karena horodè té, mbata prophètedjé djo nèn da dooudjé ke isi do nange té nèn to ndoo.

¹¹ Gè té ndò mouta ke kese dan ndò kada, kem tébe ke ï rò Allah té ande mèdè té, dèdè dï tarr do gòldè té, tokou bel waa dèdè ke dodè.

¹² Dèdè do ndou ke bar nya ï dara pa aredè, Alidjé ke nèn. Dèdè dal dara ke mè ndi té ke il kem ndjè kembaadjé té lodè.

¹³ Ke lé tén ndja nange yè ngeng, er béh kada ke dana dòkou oso, dooudjé dourou shiri woei deo yè té lo nange nèn, kesedjé isa ke bel ke dòsou gadji Allah ke dara.

¹⁴ Né ndoo ke djo ndai mbä, wo, né ndoo ke mouta ao dé gè té loshénè.

¹⁵ Bana ange ke shiri kòl tebe narè la, ndou nya bar dara, pana, Béh ko ke nange dé to béh kö lo Mbaibé Seigneur lodjè ke lo Christ la, nè na ko béh ke ndò ke ndò.

¹⁶ Boukadjé dòdjo gérè sò ke isi do ngèndé ko béh té lodè nò Allah té, ndebe natenòdè ke nwal Allah.

¹⁷ Mpana, Djèdjè ndai woio Mbaibé Allah, ndjè singa mongou, i ke éh ke éh leo, mbata i taa tokou singa mongou loi, ke i taa loou kö béh loi.

¹⁸ Mè Gentildjé ödè, a ongou loi dé mbä, ndò ta gange saria lo ndjè yodjé dé mbä, ta kare kouka nganlokisidjé loi, prophètedjé ke ndjè ko mè tédjé, ke dèdè ke mmel ri, dèdè ke ngadji ke dèdè ke tokou, ke ta toudjou dèdè ke ntoudjou nange.

¹⁹ Bana kei lo Allah ke dara òrou ke do sandoukou tar kwaana medji la mè kei Allah té, ndi tél, ke boula ounda nya, ndi ndange ke nange yè nya, ke kòdjou ke gaï ngeng.