Apocalypse 10 - Testament ke Siki 1960 (Kabba Laka)

¹ Bana ma mo mare ange ke mongou ï dara dé, ndi ke il dibi rè ke ngabourandi to dè té. Kèmè to tokou lo kade, ke gòlè to tokou gòl pourou.

² Maketourou ke òrou mbä to dja té. Nè nounda gòlè ke kòl do tòkou man té, ke nounda gòlè ke gèl dò nange té.

³ Nè mpa ke ndou ke bar nya, tokou lo nam ke ao nò, tokou nè mpa ke tarr mbä, ndi shiri ndange are do ndoudè.

⁴ Tokou ndi ke shiri ndange mbä, mao ta da maketourou, a ma mo ndou ke téh dara pana, Etò tar lo ndi shiri ke ndange, eda mè maketourou té ang.

⁵ Ange ndja ke ma mo arr do tòkou man té ke do nange té, oula dja ke kòl ke dara.

⁶ Nè noubou yo deo té lo nè ke nisi ke ndò ke ndò, nè ke nda dara ke né toï ke to kendé, ke nda nange ke né toï ke to kendé, ke nda tòkou man ke né toï ke to kendé, ta kare mare ndò ngebe ang.

⁷ A ndò ke ange ke shiri a kòl tebe narè, tar ke yarè lo Allah ke nè mpa nare nganlokisidjé la prophètedjé, a dé to tar ke tokoro.

⁸ Bana ndou ke ma mo ke ï dara pa arem marè bai, pana, Ao oun maketourou ke òrou mbä ke to dji ange té ke arr do tòkou man té ke do nange té.

⁹ Tokou ban ma mao rò ange té, ke mam ndoudjè ta karem ngon maketourou nèn, nè mpa narem, Etaa, ousa, a to né ke ate mei té, a na nèl tokou oubou tèdjé tai té.

¹⁰ Mam ntaa ngon maketourou ke dji ange té mousa, nè nnèl tokou oubou tèdjé tam té, a tokou ma mousa mbä mem ate.

¹¹ Mpa darem, I ase ta pa tar ke Allah oula marè bai mbata dooudjé nya, ke mbata gel dooudjé, ke mbata ta dooudjé, ke mbata mbaibédjé.