Apocalypse 1 - Testament ke Siki 1960 (Kabba Laka)

¹ Gel tar lo Jésus Christ ke téh daka, ke Allah arè ta tòdjou nganlokisidjé la né ke a téh loshénè, nè nda nare ngeré deo koula ange té la rò Jean té, ngonlokisi la.

² Nè ke mpa tar nadji tar lo Allah ke tar ke tokoro lo Jésus Christ, ke né toï ke nè no.

³ Madji éh ke nè ke ntoura, ke dèdè ke do tar ke Allah oula né, ke ngem né ke nda mè maketourou té nèn, mbata ndò éh ngosiba.

⁴ Jean oula are kei Allah shiri ke éh Asie té. Daresè tòkou mè madji ke mè woul deo té lo nè ke néh, ke néh leo, ke nè ke nao ndé, ke deo té lo ndildjé shiri ke éh no ngèndé té la.

⁵ Ke deo té lo Jésus Christ, ndjè tar nadji ke tokoro, nè doou ke dongor kï mè bwa yo té, nè ndjè ko do mbaibédjé ke nange nèn. Are nè ke ndikidjè ke nòroudjè né té ke madjang lodjè deo mese té la.

⁶ Nè ke ndadjè to béh kö, ndjè kòrdjé mbata Allah bèdjè. Ndokoo ke singa to la bal ke bal. Amen.

⁷ Woidjé, nè ndé ke ndi ke il, ke kem toï a koè, ke dèdè toï ke dèsè leo, gel dooudjé toï ke nange nèn a no mbata la. Tokou ban, Amen.

⁸ Mam nto Alpha ke Oméga, Mbaibé Allah pa, nè ke néh, ke néh leo, ke nao ndé, nè ndjè singa mongou.

⁹ Ma Jean, ngokösè ke wo ndoo deo kadaba kesè, ke béh kö ke mè ke enge ang mè Jésus té, méh nange té ke man ïya dana ria na Patmos, mbata tar lo Allah ke tar nadji lo Jésus.

¹⁰ Ma méh ke Ndil ndò té lo Mbaibé Seigneur, ke ma mo gom té ndou ke bar deo kadaba tokou bar lo tebe narè.

¹¹ Ke pana, Né ke i wo eda mè maketourou té, oula né kei Allah té ke shiri, ke Ephèse, ke Smyrne, ke Pergame, ke Thyatire, ke Sardas, ke Philadelphie, ke Laodicée.

¹² Bana mam ntourou ròm ta ko ndou ke pa tar sem, tokou mam ntourou rom ma mo lampe narè lor shiri.

¹³ Ke horo lampe té nèn mo doou ke to tokou Ngon lo doou ke oula tokou koubou ke ngal, nwaa karè ke ndar lor.

¹⁴ Dè ke bi dè ndaa tokou bi bati, ndaa tokou kòdjou neige, kèmè to tokou ndö pourou.

¹⁵ Gèlè to tokou narè ke kasè ke ndokoo tokou narè ke ndjiri pouro mbä, ke ndouè to tokou man ke bar nya.

¹⁶ Nwaa ndètélendèdjé shiri dja té ke kòl, kiaa ke ate ke ndë djo téh tè té, kèmè to tokou kade ke òsou ke singa la toï.

¹⁷ Tokou ma moè, moso nange kò gòlè té tokou nin. A nè nila dja ke kòl dom té, mpana, Eda bel ang, mam nto nè ke dongor ke nè ke télè té, nè ke nisi tébe.

¹⁸ Ma moei leo, a wo, ma misi tébe mbata ndò ke ndò, ma méh ke klélé yo ke loou ke djabao.

¹⁹ Tokou ban eda maketourou té né ke i wo, né ke to ke né ke a dé gè té.

²⁰ Gel tar ke yarè lo ndètélendèdjé ke shiri ke wo djim té ke kòl, ke lampe lor shiri, ndètélendèdjé ke shiri nèn to angedjé ke kei Allah té shiri, ke lampe lor shiri nèn to kei Allah shiri.