2 Piyɛr 2 - Testament ke Siki 1960 (Kabba Laka)

¹ A prophètedjé ke ndjè ngem ï horo dooudjé té leo tò, deo kadaba tokou ban ndjè tòdjou tar ngem a kéh horosè té tò, dèdè da dé goukou hoi ke tar kaina ke madjang, dèdè da mbeté ndjè tòdjou tar ndja ke ndokodè mbä, ke dèdè nda ta kare kwoei kem pourou té dé dodè té ndja loshénè loshénè.

² Maredjé nya a kao godè té deo boo té ke madjang lodè, da pa tar tadji dò deo tar té ke tokoro mbata lodè.

³ Deo mè koï né té ke dadè dèdè da keresè ta taa né losè ke tar ke gatang lodè, dèdè ke saria lodè ke leo to ba ang, ke kwoei lodè kem pourou té tibi ang.

⁴ Mbata tokou Allah ïya angedjé ang, ndò ke dèdè nda madjang, a nè nongoudè tokou bwa té ke ntòdè londoul té nya, ta ngemdè sar ndò gange saria.

⁵ Tokou nè nïya nange ke leo ang, a ngem Noé ndjè tòdjou tar ke gaté gaté, ke mare dooudjé shiri, tokou nè noula tokou man do nange té lo dooudjé ke mbetè.

⁶ Tokou deo tourou béh Sodome té ke Gomorrhe to bou pourou, nè ngange saria toudjou dodè té, ke nè ndadè to né tòdjou mbata dooudjé ke ao mbeté Allah gè té.

⁷ Ke tokou nè nadji Lot doou ke gaté gaté, tokou mèa tooè nya mbata boo madjang lo dooudjé ke madjang,

⁸ Mbata deo né té ke doou ke gaté gaté nèn wo ke kèmè ke mbia, tokou nè nisi horodè té, nè ninga ongou ndilè té ndò ke ndò, mbata koula mbeté tar ndedji lodè.

⁹ Bana Mbaibé Seigneur geré ta kadji dooudjé lo Allah ke deo kere té, ke ta ngem ndjè ke gatang ko saria té sar ndò gange saria.

¹⁰ Wota toï, dèdè ke ndja go da né té ke boo kaiya ke madjang, ke mbeté tar lo ndjè ke ö béh. Dèdè nda bel ang, ke dodè ngeng, dèdè déh ke bel ang ta tadji nèdjé ke ndokoo.

¹¹ A angedjé ke éh ke singa ke ngeng wotadè, dèdè ngange saria tadji dodè té no Mbaibé Seigneur té ang.

¹² A dooudjé nèn to tokou dadjé ke éh ke gousou ang, ke doudjoudè baa ta kare dwaadè ta tòldè, dèdè ntadji né ke dèdè ngeré ang, dèdè da kwoei mè tar toudjou té lodè.

¹³ Dinga kouka né ke gatang mbata koula ke gatang ke dèdè nda, to né koukou kemdè té ta da gatang ke ròdè kade rem. Dèdè nto dooudjé ke yèdo ke gatang, dèdè nkoukou ke kere lodè tokou dön mourou kesè.

¹⁴ Kaiya dousou kemdè, dase kïya né ke madjang ang. Dèdè dere ndjè ke éh ke singa ang, mèdè éh ke boo koï né, ngandjé ke ndjè né tadji.

¹⁵ Dïya deo ke gaté gaté, dao deo té ke dang dang, dèdè dao deo té lo Balaam ngon lo Bosor, nè ke ndiki kinga kouka deo da né té ke gatang.

¹⁶ A ndangè mbata né ke madjang la ndja, kororo ke geré pa tar ang, pa tar tokou ndou doou ke òkou kedji mbe lo prophète nèn.

¹⁷ Dooudjé nèn to tokou dòman ke man éh kendé ang, ke ndi ke il ke tokou lél särèdè dang dang, ngem loou ke ndoul nya mbata lodè.

¹⁸ Mbata dèdè mboro nya ke tar ke ba, ke boo kaiya ke rò té dèdè dere dooudjé ke téh loshénè bai dji dèdè té ke disi deo tar té ke gatang.

¹⁹ Dèdè mpa ta karedè tar do to lél pè, a dèdè ndja nto beredjé lo né ke toudjou, mbata doou ke né wotè ke singa to bere lo né nèn.

²⁰ Mbata tokou daïn né ke madjang ke nange nèn deo geré Mbaibé té lodjè ke ndjè kadjidjè Jésus Christ, nèn lé tél waadè wota dodè, gel madjang lodè wota yéh ke dongor.

²¹ A to madji wota mbata lodè tokou ngeré deo gaté gaté ang, wota yéh ta geré baa ta tél kïya go tar ndedji té ke madji toï ke daredè mbä.

²² Né dé dodè té tokou tar gousou ke tokoro, Bisi tél ön tomo la ndja, ke kö berre ke ndoko man mbä, tél ba berre té bai.