2 Piyɛr 1 - Testament ke Siki 1960 (Kabba Laka)

¹ Simon Pierre, bere ke ndjè koula lo Jésus Christ, Oula are dèdè ke dinga ko mè té ke asena ke ngädjè mè gaté gaté té lo Allah ke ndjè kadjidjè Jésus Christ.

² Are tòkou mè madji ke mè woul bar nya mbata losè deo geré Allah té ke Jésus Mbaibé lodjè.

³ Singa Allah la aredjè né toï ke ase tébe ke ta ngem tar lo Allah, deo geré nè té ke mmardjè leo ba deo ndokoo té la ke piti la ndja.

⁴ Ke deo té nèn, nè naredjè né ke nè nto ta da ke to kouka nya ke boui wota, baa ta karesè deo té nèn ta dé to dooudjé ke éh ke rò Allah, mbata sésè aïndjé né ke toudjou, ke to nange nèn mbata boo ke rò té.

⁵ Mbata lo tar nèn, oundaidjé mèsè toï ta kila mè madji dò ko mè té losè, ke kemkarè dò mè madji té,

⁶ Ke singa to boo ke rò té dò kemkarè té, ke mè ke enge ang do singa to boo ke rò té, ke boo ngem tar lo Allah dò mè té ke enge ang.

⁷ Ke ndiki ngaköna dò boo ngem tar té lo Allah, ke ndiki do ndiki ngaköna té.

⁸ Mbata tokou né nèn to mèsè té ke bar nya, a dasè to ndjè dabedjé ang, aséh to nè ke ao katé ang deo geré Mbaibé té lodjè Jésus Christ.

⁹ A doou ke lal né nèn, nè nto ndjè kem tò ke wo loou ndeo ang, ke ikè ke ntoko madjang la ke leo.

¹⁰ Mbata yèn ngakömdjé, oundaidjé mèsè nya ta geré bar losè ke mbere losè ke tokoro, mbata tokou sésè edaidjé né nèn a kosoidjé ngadji ang.

¹¹ Mbata tokou ban dïya deo daresè ta kao mè béh kö té ke ke ndò ke ndò lo Mbaibé ke ndjè kadjidjè Jésus Christ.

¹² Mbata yèn, ma mïya ang ta kilè mèsè do né té ke nèn ke ndò toï, lé sésè egeridjé ke ngengidjé deo tar té ke tokoro ke to mèsè té.

¹³ Ke ma mo to né gaté gaté, tokou méh rom té nèn ta kolè mèsè ke ndedji.

¹⁴ Mbata mam ngeré ndò kïya rom nèn dé ngosiba, tokou Mbaibé Seigneur lodjè Jésus Christ tòdjoum leo.

¹⁵ Mam ndiki ta da baa tokou ma mao mbä, sésè asidjé kounda mèsè do né té nèn ke ndò toï.

¹⁶ Mbata djèdjè djoun go tar kòrou sou ang, ke mpa ke gousou tokou djèdjè nda ta kare sésè egeridjé singa ke téh lo Mbaibé lodjè Jésus Christ, a djèdjè nto ndjè tar nadji ke djo bo la ke kemdjè ndja.

¹⁷ Mbata ndò ke nè ninga piti ke ndokoo dji Allah bèdjè té, ke ndou téh rè té deo ndokoo té ke boui wota, pana, Yèn to Ngonem ke mam ndikè nya, ròm nèlem nya mbata la.

¹⁸ Djèdjè djo ndou nèn ke téh dara, mbata djèdjè djéh sa do tokou err té ke madji toï.

¹⁹ Ke djèdjè djéh ke tar ke Allah oula né ke dé to ke tokoro. Sésè a daidjé madji tokou sésè ngemidjé tar nèn madji, tokou lo lampe ke ndokoo dò londoul té, sar loou arè ke djidjo ke ta lokarè té téh mèsè té.

²⁰ Ase kare sésè egeridjé né nèn dongor, tar ke Allah pa mè maketourou té la to tar ke doou òrou gelè ang.

²¹ Mbata tar ke Allah oula leo dé deo né té ke doou ndiki ang, a dooudjé ke madji toï lo Allah pa tar tokou Ndil ke madji toï ouladè.