1 Timoce 6 - Testament ke Siki 1960 (Kabba Laka)

¹ Ase kare dèdè toï ke nto ko kake bange né bere té, dèdè nwal ebèèdèdè ndja tokou doou ke dase kòsou gadjè, ban baa ta kare ri Allah ke tar la ndé né tadji ang.

² Dèdè ke ebèèdèdè to ndjè ko mè tédjé, are mbetédè ang mbata dèdè nto ngaköna, a ase kare dèdè nda koula lodè madji wota, mbata dèdè ke dinga né deo koula té lodè to ndjè ko mè tédjé ke ndikidè, etòdjou ke ndedji deo né té nèn.

³ Tokou mare doou tòdjou tar ke dang, ke ndiki gè ke tar ke gaté gaté lo Mbaibé lodjè Jésus Christ ang, tar ke to deo ngem tar té lo Allah,

⁴ Dè ngeng nya ke boro, nè ngeré né ang, néh ke boo doudjou tar dabe, ke ta maitar deo té ke are mè ï, ke kòlna, ke né tadji, ke sange mè ke tar ke madjang.

⁵ Kòl horo dooudjé té ke gousou lodè toudjou mbä, ke tar ke tokoro éh kedè ang, mèdè pana deo ngem tar lo Allah to ngä kinga né.

⁶ Né kinga nya éh deo ngem tar té lo Allah ke mè koukou.

⁷ Mbata djèdjè ndé ke né kada dò nange té nèn ang, ke djase ta kao ke né kada ang, tokou djèdjè djïya nange nèn.

⁸ A tokou djèdjè djéh ke né kousa ke koubou, yèn a kasedjè.

⁹ A dèdè ke ndiki kinga né kinga, doso kere té, ke koulaa kiyaa té, ke boo mbe, ke boo nya ke are ongou ke ila dooudjé loou toudjou té ke loou kem pourou té.

¹⁰ Mbata gòl né ke madjang to ka ndiki narè, to mbata boo ban ke maredjé ao dang dang, dïya deo ko mè té ke dila ròdè ndja né ongou té nya.

¹¹ A mbata i, doou lo Allah, aïn nèn toï, eda ta ndja go gaté gaté té, ke deo ngem tar lo Allah, ko mè té, ndiki, ke mè ke enge ang, ke mè ke isi dèkèkè.

¹² Eda dòò ke madji lo ko mè té, etaa tébe ke ke ndò ke ndò ke mmari ta taa leo, ndò ke i pa tar nadji ke madji no ndjè nadjidjé té nya.

¹³ Mam ndedji no Allah té, nè ke nare tébe né toï, ke nò Christ Jésus té, nè ke mpa tar nadji ke madji no Ponce Pilate té,

¹⁴ Mam ndedji ta ngem tar nèn, ta kare yèdo aséh tar tadji to kendé kada ang, sar téh lo Mbaibé lodjè Jésus Christ.

¹⁵ Ke na tòdjou yèn ke daka ndò té la, deo té lo nè ke nto tokou Mbaibé ke madji kadaba, Mbaibé lo mbaibédjé, Mbai lo mbaidjé.

¹⁶ Nè kadaba ke nisi ke tébe ke ke ndò ke ndò, ke nisi lokarè té ke doou ase ta kao kendé ang, nè ke doou kada woè ang, ke ase koè ang. Are piti ke singa ke ke ndò ke ndò to la. Amen.

¹⁷ Ndedji ndjè ke éh ke né kinga nange nèn are mboro ang, ke dounda mèdè do né kinga té ang ke ase goto, a dounda mèdè do Allah té, nè ke naredjè né nya toï mbata rònèl lodjè.

¹⁸ To tar lodè ta da madji, ta kare koula ke madji lodè to né kinga lodè, ta da mè madji ta kare né, ke ta kaina né lodè.

¹⁹ Tokou ban dèdè ngem mbata ndò ke goukou gòl né kinga ke madji mbata lodè ndja, baa ta kare ntaa tébe ke to tébe ke tokoro.

²⁰ A Timothée, ngem né ke dari ta ngem, mbeté tar kòrou sou ke tar dang dang ke ba, ke maitar gousou ke doou bar to gousou ke tokoro, a to ngem.

²¹ Ke maredjé ke ndiki gè kendé dao dang dang, dïya deo ko mè té. Tòkou mè madji éh sei.