1 Timoce 5 - Testament ke Siki 1960 (Kabba Laka)

¹ Ndange tokou doou ang, a ndedjè tokou lo bòidjè, eda ke dooudjé ke to basädjé tokou lo ngaköi.

² Tokou dènèdjé tokou lo köidjèdèdè, ngamandédjé tokou lo ngakönani ke mè ke to madji toï.

³ Wal dènè ndoubadjé ke to dènè ndoubadjé ke tokoro.

⁴ A tokou mare dènè ndouba éh ke ngandjé, aséh ngandjé lo nganè, are dèdè ngeré dongor ta tòdjou deo ngem tar lo Allah mè kei té lodè ndja, ke ta tél kouka bòdèdè ke kòdèdè madji ke né ke dèdè dinga, mbata yèn to madji kem Allah té.

⁵ Nè ke nto dènè ndouba ke tokoro ke nisi la ke kadèba, nè nounda mè ngebe la ke rò Allah té, ke ndò toï nè ndoudjou Allah nya ke doudjou tilti rem kade rem.

⁶ A nè ke noun rè ndja to né kinga koukou, nè nto yo, lé nisi tokou kem.

⁷ Epa tar nèn aredè to, ta kare tar ke madjang dé dodè té ang.

⁸ Tokou mare doou ngem ndjè ang ke to la ndja, nè mbeté ko mè té mbä, nè nto madjang nouta madjang lo doou ke wo mèa té ang.

⁹ Eda ri dènè ndouba maketourou té lo dènè ndoubadjé ang, tokou bal la ase dòmisä ang, aséh tokou nè ntaa dingao wota gar kadaba.

¹⁰ Dase pa tar nadji madji dò koula té la ke madji, tokou nè ngem ngandjé, tokou nè nda madji ke ndjè mbaadjé, tokou nè ntoko gòl ndjè ko mè tédjé, tokou nè nda madji ke ndjè ke éh ke ongou, tokou nè ngem ta da koula ke madji deo té toï.

¹¹ I mbeté ta da ri dènè ndoubadjé ke nai mandé mè maketourou té, mbata tokou dèdè nda ta mbeté Christ mbata boo ke rò té, dèdè ndiki ta taa ngao.

¹² Tokou ban dèdè dinga saria mbata dèdè mbeté ko mè té lodè ke dongor.

¹³ Dò tar té nèn, dèdè ndé to ndjè dabe, dèdè ndja dang dang ta kei té kada kada, ke dèdè nda dabe ke kadèba ang, a ndé to ndjè ton tam ba ke ndjè tar ke dèkerè, dèdè mpa tar ke ase kare mpa ang.

¹⁴ Tokou ban mam ndiki kare dènè ndoubadjé ke nai mandé taa ngao, kare doudjou ngandjé, ngem kei lodè, ke dare deo ndjè kembaa ta toula dòdjè ang.

¹⁵ Mbata loshénè maredjé tél ao ke go Satan té.

¹⁶ Tokou mare ndjè ko mè té ke dingao aséh ke dènè déh ke dènè ndoubadjé, ase kare nè ndja ngemdè, are kei Allah ngemdè ang, tokou ban kei Allah ase ngem ndjè ke to dènè ndoubadjé ke tokoro.

¹⁷ Tòkou dooudjé ke ngem deo lodè madji, are dooudjé òsou gadjidè nya wota, dèdè ndja ke nto ndjè da koula pa tar, ke ntòdjou tar.

¹⁸ Mbata maketourou lo Allah pa, Ase kare eto ta mange ang, tokou nè nouba kandé ko, ke, Ndjè koula ase kinga kouka la.

¹⁹ Epa tar toula dò dò tokou doou té ang tokou ndjè tar nadji éh djo aséh mouta ang.

²⁰ Dèdè ke nda né ke madjang, ndangedè nò dooudjé té toï, ta kare bel da kesedjé.

²¹ Mam ndedji no Allah té ke Christ Jésus ke angedjé ke mmardè ke daka, eda né nèn ke mè ke geré tar dongor ang, ke ta ndiki marè wota marè ang.

²² Ila dji dò doou té kada ndjange ba ang, eda naaté ke madjang lo mare doou ang, ngem ròi ndja are madjang òrou ang.

²³ Aih man ke ba marè ang, aih vin ngadji mbata wouri ke mbata rò too ke dai ke ndò ndò.

²⁴ Né ke madjang lo mare dooudjé téh daka kem dooudjé té, baa dao kedè saria té, a né ke madjang lo maredjé téh gè té goukoudang.

²⁵ Deo kadaba ban to, koula ke madji téh daka kem dooudjé té, ke yéh ke téh ang da kiyaadè pi.