1 Timoce 4 - Testament ke Siki 1960 (Kabba Laka)

¹ A Ndil ke madji toï pa tokoro, ke ndò té ke goukou maredjé a kïya ko mè té, dèdè da ko tar lo ndii kere ke tar ke ndildjé ke madjang tòdjou.

² Deo ngem té lo dooudjé ke tòdjou tar ngem, dèdè ke kedji né geré lodè ndja to tokou andé ke pourou nya notè.

³ Dèdè dare tar ndedji na doou taa dènè ang, dèdè dare tadè dooudjé ta kousa nédjé ang ke Allah dadè ta taa ke woio, mbata dèdè ke do mèdè té ke ngeré tar ke tokoro.

⁴ Mbata né toï ke Allah da to madji, yéh ke ta mbeté goto tokou doou taa ke woio,

⁵ Mbata yèn ndé madji toï deo tar té lo Allah ke deo doudjou Allah té.

⁶ Tokou i pa né nèn are ngaködjèdjè, i a dé to doou tòdjou tar ke madji lo Christ Jésus, ngeng ke tar ko mè té ke tar ke madji ke i ao ndja gè té.

⁷ A mbeté tar ke gatang, ke tar kòrou sou lo bouka dènèdjé.

⁸ Ngem ròi ndja deo ngem tar té lo Allah, mbata da rò inga né ngadji deo ndam té, a doou inga né ke ase né toï deo ngem tar té lo Allah, mbata tar tòna to tén mbata tébe ke loshénè, ke mbata tébe ke ao dé tò.

⁹ To tar ke tokoro ke ase kare dooudjé wo toï.

¹⁰ Mbata tar nèn djèdjè nda koula ke djinga ongou ke tar tadji dòdjè té, mbata djèdjè djounda mè ngebe lodjè ke rò Allah té ke tébe, ke to ndjè kadji dooudjé toï, to ndjè kadji ke tokoro lo ndjè ke wo mèdè té.

¹¹ Epa né nèn ke daka, etòdjoudè.

¹² Are doou kada mbeti ang mbata i nai basä bai, a edé to né tòdjou lo dèdè ke do mèdè té, ke tar ke i pa, ke ngem rò, ke ndiki, ke ko mè té ke mè ke éh ke madjang kada ang.

¹³ Nderèng mam ndé, ounda mei dò toura maketourou té no dooudjé té, ke ta ndedji ke ta tòdjou tar.

¹⁴ Eda sä ke né kare ba ke to mei té ang, ke dari deo tar té ke Allah oula, tokou tòkou dooudjé ila djidè dòi té.

¹⁵ Ngem né nèn toï madji, ounda mei toï kendé, tokou ban dooudjé toï ase ko bar loi.

¹⁶ Ngem ròi ndja, ke tar ke i tòdjou, eda né nèn ke ndò toï, mbata ke koula té nèn i a kadji ròi ndja ke ndjè ke wo tai tò.