1 Timoce 3 - Testament ke Siki 1960 (Kabba Laka)

¹ To tar ke tokoro, tokou doou sange koula ndjè ndja ta ngem kei Allah, nè ndiki koula ke madji.

² Tokou ban ase kare doou ke ndjè ndja ta ngem kei Allah éh ke mare tar dè té ang, ngao lo dènè ke kadaba, nè nto boo ke rè té. Nè nto doou ke kedji ke madji, nè ngem rè madji, nè nda madji ke ndò toï, nè ngeré tòdjou dooudjé tar.

³ Nè nto bere lo koto ang, doou ke da ngeng ang, a néh ke mè ke dèkèkè, nè nsange tar ang, nè nto ndjè ndiki narè ang.

⁴ Nè ngem kei la ndja madji, tokou nganè wo tè, dèdè disi do gòldè té deo té toï.

⁵ Mbata tokou doou geré ngem kei la ndja ang, a na ngem kei Allah tokou di wa?

⁶ Ase kare nè nto doou ke wo mè té bashénè ba ang, mbata dòmadjang a do ngeng la a télè mbe karè noso saria té lo Satan.

⁷ Ase kare dooudjé ke daka pa tar nadji la tokou madji, mbata dòmadjang a na koso tar tadji té lo dooudjé ke koulaa kiyaa té lo Satan.

⁸ Tokou ban ase kare ndjè kö dò kei Allah isi dò gòldè té, ke tourou ta ang, dèdè nto beredjé lo koto ang, déh ke boo né kinga ke madjang ang.

⁹ Dase ngem tar ko mè té ke yarè ke kedji né geré ke éh ke madjang kada ang.

¹⁰ Ase kare nnaadè dongor to, bana tokou tar goto dodè té, aredè ta da koula tokou ndjè ko do kei Allah.

¹¹ Tokou ban ase kare dènèdjé isi do gòldè té to, dènèdjé ke dabe doou ang, ke nto boo ke ròdè té, dènèdjé ke mèdè ndaa kaï ke né té toï.

¹² Ase kare ndjè kö dò kei Allah taa dènè kadaba, aredè ngem ngandè ke kei lodè ndja madji.

¹³ Mbata dèdè ke nda koula ndjè ko do kei Allah, dèdè dinga loou piti ke madji mbata lodè ndja, ke mèdè oso pon nya ke ko mè té ke éh mè Christ Jésus té.

¹⁴ Mam nda né nèn maketourou té mari, mbata mam ndiki ta kao ròi té loshénè.

¹⁵ A tokou mam ndé ndjange ang, tokou ban i ase geré ta kare dooudjé ngem ròdè tokou ban wa mè kei Allah té, ke to kei Allah lo Allah ke tébe, nè nto gadji ke gòl tar ke tokoro.

¹⁶ Ke maitar kada ang, tar ke yarè lo tar ke madji lo Allah lodjè, ke to bo, Nè ntéh da rò té, nè nto gaté gaté mè Ndil té, angedjé woè, ntòdjou tar la horo Gentildjé té, do mèdè té sa nange nèn, dwèè ke tarr ke ndokoo.