1 Timoce 2 - Testament ke Siki 1960 (Kabba Laka)

¹ Dongor lo né toï, mam ndedji ta koi nya ke ta doudjou Allah ke da rò to ndoo, ke ta da woio Allah mbata dooudjé toï.

² Mbata mbaibédjé ke dooudjé toï ke to tòkou dooudjé, baa ta kare djèdjè to djisi dò gòldjè té ke mè woul, ta ngem tar lo Allah ke mè madji deo té toï.

³ Mbata yèn to madji, ke ase kem Allah té ndjè kadjidjè.

⁴ Nè ke ndiki ta kare dooudjé toï inga kadji, ke ta karedè ngeré tar ke tokoro.

⁵ Mbata Allah ke kadaba, ke ndjè moso tar kada to horo Allah té ke dooudjé, nè ndja nto doou, Christ Jésus.

⁶ Nè ke noun rè ndja tokou lo andé ta kouka né dooudjé toï, tar nadji lo tar nèn dé ndò té la ndja.

⁷ Mbata tar nèn, mmarem ke daka to ndjè tòdjou tar, ke ndjè koula, ma mpa tar ke tokoro, mere ngem ang, ndjè tòdjou tar lo Gentildjé ke ko mè té ke tar ke tokoro.

⁸ Tokou ban mam ndiki ta kare dingaodjé ndja doudjou Allah loou té toï, ta kare doula djidè ke madji toï ke tarr, ke ongou ke maitar goto.

⁹ Tokou ban tò, mam ndiki ta kare dènèdjé oula koubou ke ase ròkoul ke kem té ang, ke kemkarè ngem ròdè, dèdè dwaa bi dodè ang, dèdè do lor ang aséh mere perle ang, aséh doula koubou ke narè ngeng nya ang.

¹⁰ A ase kare dèdè nda koula ke madji asedè, dènèdjé ke éh deo ngem tar té lo Allah.

¹¹ Ase kare dènè isi dèkèkè wo tar ta geré gelè.

¹² Mam ndiki ta kare dènè kada tòdjou tar aséh ö dò dingao ang, nè nase ta kisi dèkèkè.

¹³ Mbata Allah da Adam dongor, gè té Eve.

¹⁴ Adam wo kere ang, a dènè wo kere, ke nè noso deo mbeté tar ndedji té.

¹⁵ A dènè a kinga kadji deo koudjou ngon té, tokou nè nisi ke ko mè té ke ndiki, ke ngem rè mbata Allah, deo ndoi rè té ang.