1 Timoce 1 - Testament ke Siki 1960 (Kabba Laka)

¹ Paul, ndjè koula lo Christ Jésus, deo kare ta té lo Allah ndjè kadjidjè ke lo Christ Jésus mè ngebe lodjè.

² Moula mare Timothée ngonem ke tokoro deo ko mè té. Tokou mè madji ke mè madji, ke mè woul éh sei deo té lo Allah Bòdjèdjè, ke Christ Jésus Mbaibé lodjè.

³ Ma molè mei ndedji té ke ma mpa mari tokou ma mao Macédoine té, ta kisi Ephèse té, ta kare i ase ndange mare dooudjé ta tòdjou tar ke dang ang.

⁴ Ta karedè do tar kòrou sou ang, ke gel tar ke leo ke tourè goto, mbata tar nèn to deo maina té, a tòdjou koula lo Allah ke éh ke ko mè té ang.

⁵ A gel ndedji lodjè to ndiki ke téh ke mè ke éh ke madjang kada ang, mè kedji né geré té ke madji, ke ko mè té ke tokoro.

⁶ Mare dooudjé mbata dèdè dao gatang, dèdè dïya né nèn, dèdè ntél tar té dang dang ke ba.

⁷ Dèdè ndiki ta dé ndjè tòdjou maketourou ndedjidjé ka dèdè ngeré ta ke dèdè mpa ang, aséh deo tar té ke dèdè mpa ke singa.

⁸ A djèdjè ngeré tar ndedji to madji tokou doou pa tar ndedji ke deoè.

⁹ Ngeré yèn, tar ndedji to mbata dooudjé ke gaté gaté ang, a mbata dooudjé ke mbeté Allah ke dooudjé ke ndjè né da ke madjang, mbata ndjè ke madjidjé ang, ke dooudjé ke bar ri Allah to né ke gatang, mbata dooudjé ke tòl bòdèdè ke ködèdè, ke mbata dooudjé ke ndjè tòl doou.

¹⁰ Mbata dooudjé ke ndjè kaiya, mbata dooudjé ke to ke mare dooudjé koutoudè té, mbata dooudjé ke ndoko mare doou, mbata dooudjé ke ere ngem, mbata dooudjé ke ndjè pa tar nadji ngem, ke mbata mare né toï ke mbeté tar ke madji,

¹¹ Deo tar ndokoo té ke madji lo Allah ke éh ke madji, ke dïya darem ta ngem.

¹² Mam nda woio nè ke narem singa mbata yèn, Christ Jésus Mbaibé lodjè, mbata nè nom to doou ke mèa ndaa kaï, mbata nè mmarem koula té la.

¹³ Lé tokou mam nto ndjè né tadji leo, ke ndjè ngätar, ke doou ke mbetè, a ma minga mè madji mbata mam nda tokou ban tokou mam nai ngeré ang, ke mo mem té ang.

¹⁴ Tòkou mè madji lo Mbaibé Seigneur lodjè dé nya wota mbata lom, ke ko mè té ke ndiki ke éh mè Christ Jésus té.

¹⁵ Tar nèn to tar ke tokoro ke ase kare dooudjé wo toï, Christ Jésus dé nange nèn mbata kadji ndjè né da ke madjang, ke horodè té mam nto ndjè né da ke madjang ke dongor.

¹⁶ A mbata tar nèn minga mè madji, mbata deo té lom ke to ndjè né da ke madjang ke dongor, Jésus Christ ase ta tòdjou ke daka mèa ke madji toï ke enge ang, tokou né tòdjou mbata dèdè ke gè té ke da ko mèdè té sa, mbata tébe ke ke ndò ke ndò.

¹⁷ Mbaibé ke ke ndò ke ndò ke ase ta kwoei ang, ke kem woè ang, Allah ke kadaba, piti ke ndokoo to ngë ke ndò ke ndò. Amen.

¹⁸ Mïya tar nèn mari, ngonem Timothée, deo tar té ke Allah oula dongor ke tòdjou tar loi, mbata deo tar té nèn i ase ta da dòò ke madji.

¹⁹ Deo ngem ko mè té ke kedji né geré ke madji. Mbata maredjé ïya deoè tokou ban, dèdè ntoudjou ko mè té lodè tokou to woei mè man té.

²⁰ Ke horodè té Hyménée ke Alexandre déh tén, dèdè ke mïyadè mare Satan, baa ta karedè ngeré ta tadji né ang.