1 Piyɛr 5 - Testament ke Siki 1960 (Kabba Laka)

¹ Yéh nèn to ndedji ke mam ndedji tokou dooudjé ke horosè té, ma ke nto tokou doou naaté kedè, ke nto doou ke wo ndoo lo Christ, deo kadaba mam nto doou ke inga mare né ndokoo ke ata téh.

² Ngemidjé né kouldjé lo Allah ke to tar losè ta ngem, ngemidjé madji ke singa ang a mbata mèsè ndiki deo kadaba tokou Allah ndiki, mbata kinga né kinga ke madjang ang a ke mè ke ndiki nya.

³ Öidjé dòdè ang, dèdè ke daresè ta ngemdè, a edéidjé to né tòdjou lo né kouldjé.

⁴ Ke tokou tòkou ndjè ngem né kouldjé téh, sésè a kingaidjé djòkedò ndokoo ke a toudjou ang.

⁵ Tokou ban basädjé, woidjé tar lo tòkou dooudjé. Etoidjé mèsè toï ta da horosè té ke mè ke dèkèkè, mbata Allah mbeté dooudjé ke ndoi ròdè a nè nare tokou mè madji dooudjé ke da ròdè ngadji.

⁶ Tokou ban edaidjé ròsè ngadji ko singa dji Allah té, tokou ban nè na kòsou gadjisè ndò té ke ase madji.

⁷ Ke né toï ke esangidjé mèsè kendé ïyaidjé arè, mbata nè ndja ngemsè.

⁸ Isidjé do gòlsè té, ngemidjé, mbata ndjè kembaa losè Satan ndja tokou nam ke ao nò, ke sange mare doou ta kousè.

⁹ Mbetèdjé ke ko mè té ke ïya ang, mbata sésè egeridjé né ndoo tokou ban da ngakösè ke nange nèn toï.

¹⁰ A Allah ke ndjè tokou mè madji toï, nè ke mmarsè ta téh ndokoo té la ke ke ndò ke ndò mè Christ té, gè té ke sésè woidjé né ndoo ndò kada kada, nè ndja na da kare asidjé toï, ke nè na ngengsè ke nè na karesè singa.

¹¹ Singa to la ke ndò ke ndò. Amen.

¹² Ma moula maketourou nèn maresè deo dji Silvain té, nè ke moè kem té to ngokö ke mè ndaa kaï, baa mam ndedjisè ke ma mpa tar nadji ke yèn to tokou mè madji lo Allah ke tokoro, arridjé kendé ngeng.

¹³ Ndjè ke kei Allah té ke Babylone, ke Allah mbere deo kadaba kesè, dasè laphia, ke ngonem Marc dasè laphia tò.

¹⁴ Edaidjéna laphia ke to mbina horosè té ke ndiki. Mè woul éh kesè toï ke éhdjé mè Christ té.