1 Piyɛr 4 - Testament ke Siki 1960 (Kabba Laka)

¹ Tokou ban mbata Christ wo né ndoo mè da rò té, edaidjé mèsè ndja ke kedji tokou ban to, mbata doou ke wo né ndoo mè da rò té, ngë né ke madjang eo mbä.

² Baa ta kisi ndò té ke nai bai ke da rò, deo boo té ke rò ndiki ang, a deo né té ke Allah ndiki.

³ Ase kare ndò ke leo asenga tokou edaidjé né ke Gentildjé ndiki ta da, ta ndja go né kaiya té, ke boo ke rò té dang dang, ke kaih koto, ke laa né kousa, ke né kaih ke dang dang, ke polo kòrdjé ke madjang.

⁴ Mèdè edji nya mbata sésè mbòidjé kedè bashénè ang, ta da né ke madjang wota nya deo kadaba kedè, ke dèdè ntadjisè.

⁵ A dèdè da tél tar lodè ndja kare nè ke na gange saria lo dooudjé ke kem, ke lo ndjè ke woei.

⁶ Mbata yèn mpa tar ke madji dare ndjè ke woei to, mbata lé tokou ngange saria lodè ke da rò tokou lo dooudjé, dèdè dase kisi tébe mè ndii té tokou Allah.

⁷ Gel né toï éh ngosiba, isidjé dò gòlsè té ke kemkarè ta doudjou Allah.

⁸ Wota né toï aridjé ndiki losè ke ndikidjéna horosè té eo ang, mbata ndiki òkou do né ke madjang nya.

⁹ Edaidjé mè madji kena horosè té ke nanè ang.

¹⁰ Deo kadaba tokou daresè kada kada né kare ba dang dang, ekaidjé né horosè té tokou ndjè ngem né kai ke madji, ke tokou mè madji dang dang lo Allah.

¹¹ Tokou mare doou pa tar, ase kare nè mpa tar tokou tar ke ta Allah pa, tokou mare doou da mè madji, ase kare nè nda ke singa ke Allah arè, baa ta kare Allah ase kinga piti mè né té toï deo té lo Jésus Christ. Ndokoo ke singa to la ke ndò ke ndò. Amen.

¹² Sésè ke mam ndikisè nya, aridjé mèsè bel ang mbata né ke ngeng ke téh dòsè té, ke to tokou pourou ta naasè, ta kedji to né kòbou ke dasè.

¹³ A edaidjé rònèl mbata woidjé né ndoo deo kadaba ke Christ, baa ta kare ròsè nèlsè ke ta koukou ndò téh ke né ndokoo té la tò.

¹⁴ Madji éh kesè tokou ntadjisè mbata lo ri Christ, mbata ndii lo ndokoo ke lo Allah isi dòsè té.

¹⁵ A ase kare doou kada horosè té wo ndoo tokou doou ke tòl doou ang, aséh tokou ndjè boukou, aséh doou ke da madjang, aséh doou ke ndjè ngätar ke tar lo mare dooudjé.

¹⁶ A tokou mare doou wo ndoo tokou doou lo Christ, ase kare ròkoul dè ang, a ase kare nè mpiti Allah mbata ri nèn.

¹⁷ Mbata nai téh mbä, ta kounkoutou gange saria mè kei té lo Allah, tokou dounkotè kedjè dongor, dòbon tar lo ndjè ke wo tar ke madji ang a to di wa?

¹⁸ Ke, Tokou to ngeng mbata lo ndjè ke gaté gaté baa ta kinga kadji, dooudjé ke ndjè mbeté Allah ke ndjè da né ke madjang da téh loou té ke da wa?

¹⁹ Tokou ban, ase kare dooudjé ke wo ndoo deo né té ke Allah ndiki, da né gaté gaté, ke dïya oumadè dji ndjè da né té ke mè ndaa kaï.