1 Piyɛr 1 - Testament ke Siki 1960 (Kabba Laka)

¹ Pierre, ndjè koula lo Jésus Christ, Oula are ndjè mbaadjé ke särèna dang dang nange té ke Pont, ke Galatie, ke Cappodoce, ke Asie, ke Bithynie.

² Dèdè ke mberedè deo né té ke Allah Bòdjèdjè geré dongor, ke deo té lo Ndil ke aredè ndé gaté gaté, mbata karedè do tar lo Jésus Christ ke ta tousou mese la dòdè té. Tòkou mè madji ke mè woul bar nya mbata losè.

³ Madji éh ke Allah Bo Mbaibé lodjè Jésus Christ. Deo tokou mè madji té la, nè noudjoudjè to ke siki ke mè ngebe ke tébe, deo kï té lo Jésus Christ mè bwa yo té.

⁴ Mbata kwaa né ndouba ke ase toudjou ang, ke éh ke madjang kada ang, ke en ang, ke ngem dara mbata losè.

⁵ Sésè ke ngemsè deo singa té lo Allah deo ko mè té, mbata kadji ke ase mbä, ta téh daka ndò té ke goukou.

⁶ Aridjé yèn aresè koukou, lé loshénè mbata ndò kada kada sésè asidjé kinga ongou mè né naa té dang dang.

⁷ Baa ta kare naa ko mè té losè ke to kouka nya wota narè lor ke toudjou lé ke nnèè ke pourou, ase téh to tar kare woio ke ndokoo ke piti ndò téh té lo Jésus Christ.

⁸ Nè ke sésè ndikèdjé ke naidjé woèdjé ang bai, a lé tokou naidjé woèdjé ang bai, sésè woidjé mèsè té sa, ke ekoukidjé ke rònèl wota nya ke ta ase ta pa ang.

⁹ Mbata sésè ingaidjé dòbon kadji lo kemsè mbata kouka ko mè té losè.

¹⁰ Prophètedjé ke pa tar tòkou mè madji ke a to ngäsè, dèdè nsange ke ndoudjou gel tar kadji nèn leo.

¹¹ Dèdè nsange ndò di wa aséh nai tokou ban wa ke Ndil lo Christ ke éh mèdè té tòdjou tarè, tokou nè mpa ke dongor tar nadji né ongou lo Christ ke ndokoo ke ase dé gè té.

¹² Ntòdjoudè leo ke dèdè nda mbata lodè ndja ang a mbata losè, mè né té ke dèdè mpa daresè loshénè deo té lo dèdè ke mpa tar ke madji daresè deo Ndil té ke madji toï, ke doulè nï dara dé, nédjé ke angedjé ndiki nya ta ko gelè.

¹³ Mbata tar nèn sésè etoidjé kedji gousou losè, ke isidjé do gòlsè té, oundaidjé mè ngebe losè toï tòkou mè madji té ke ao dé ròsè té, ndò téh té lo Jésus Christ.

¹⁴ Tokou ngandjé ke ndjè ko tar, epoloidjé ròsè boo té ke leo ang tokou sésè naidjé egeridjé né ang bai.

¹⁵ A tokou nè ke mmarsè néh madji toï, éhdjé madji toï sésè ndja deo ndja té losè toï.

¹⁶ Deo kadaba tokou maketourou pa, Sésè a déidjé madji toï mbata ma méh madji toï.

¹⁷ Ke tokou sésè ebarèdjé to Bòsésè, nè ke ngange saria ase koula lo dooudjé kada kada toï, ke nè mpiti doou kada wota maredjé ang, ndjaidjé ke bel nai té toï ke isidjé nange nèn.

¹⁸ Sésè egeridjé ndokosè ke dòrousè deo gousou tar kisi té ke bòsésè pa aresè leo, ke né ke toudjou tokou narè lor aséh narè argent ang,

¹⁹ A ndokosè ke mese Christ ke to kouka nya, tokou lo ngon bati ke éh ke rò ndour aséh ke yèdo kada ang.

²⁰ Nè ke ntourè leo dongor baa gòl nange nèn to, a ntòdjè ke daka nai té ke goukou mbata losè.

²¹ Sésè ke woidjé mèsè té ke Allah deo té la, nè ke nwèè ke tarr mè bwa yo té, ke narè ndokoo, tokou ban ta kare ko mè té ke mè ngebe losè to dò Allah té.

²² Mbata sésè etokoidjé oumasè deo ko mè té ke tar ke tokoro, baa ta ndiki ngakösè ke ndiki ke madji, ndikidjéna horosè té nya ke mèsè té ndja.

²³ Mbata doudjousè to ke siki ang deo kandé té ke toudjou, a deo kandé té ke ase toudjou ang nga, ke deo tar tébe té lo Allah ke to ke ndò ke ndò.

²⁴ Mbata, Da rò toï to tokou mou, ke ndokoo la toï to tokou poutou mou. Mou toutou ke poutè gaï,

²⁵ A tar lo Allah to ke ndò ke ndò. Tarè to tar ke madji ke mpa daresè.